ဗန်းမော်ကနေ ပြန်စုန်ဆင်းလာတဲ့စစ်တပ်ရေယာဉ် ၃ စီးကို KIA တိုက်ခိုက်
ဓာတ်ပုံ ရင်းမြစ်, Screengrab
ကချင်ပြည်နယ်၊ ဗန်းမော်ဘက်ကနေ ဆင်းလာတဲ့ စစ်တပ် ကုန်တင်ရေယာဉ် ၃ စင်းကို ကချင်လွတ်လပ်ရေးတပ် (KIA)က ထပ်မံတိုက်ခိုက်ခဲ့တာကြောင့် မီးလောင်ပျက်စီးခဲ့တယ်လို့ KIA ရဲ့ပြန်ကြားရေးတာဝန်ခံ ဗိုလ်မှူးကြီးနော်ဘူက ဘီဘီစီကို ပြောပါတယ်။
“မနေ့က မနက်ပိုင်း တစ်စီး၊ ညနေပိုင်း တစ်စီးနဲ့ ဒီနေ့မနက်မှာ နောက်တစ်စီးကို ထပ်မံတိုက်ခိုက်လို့ မီးလောင်ပျက်စီးခဲ့ပါတယ်” လို့ ဗိုလ်မှူးကြီးနော်ဘူက ပြောပါတယ်။
ဒီရေယာဉ်တွေကို KIA နဲ့ ပူးပေါင်းတပ်တွေက ရွှေကူနဲ့ ဗန်းမော်ကြား ဧရာဝတီမြစ်ကူးတံတား စင်းခန်းတံတားအနီးမှာ တိုက်ခိုက်ခဲ့တာလို့ ပြောပါတယ်။
စစ်တပ်က ဗန်းမော်ကို ပြန်လည်ထိန်းချုပ်နိုင်ဖို့ ဧရာဝတီမြစ်ကြောင်းတလျှောက်ကနေ စစ်သည်အင်အား၊ ရိက္ခာတွေတင်လာတဲ့ ရေယာဉ်တွေ စေလွှတ်နေတာလို့ KIA ဘက်က ပြောပါတယ်။
စစ်တပ်ဟာ ဧရာ၀တီမြစ် ရေတက်နေချိန်မှာ ကုန်းလမ်းကနေ ထောက်ပို့လို့အဖြစ်နိုင်တဲ့ ဗန်းမော်ကို စစ်တပ်ရေယာဉ်တွေခြံရံပြီး လူနဲ့ ပစ္စည်း ထောက်ပို့နေတာဖြစ်ပါတယ်။
အခုလအစောပိုင်းကစလို့ စစ်တပ်ရဲ့ စစ်သင်္ဘောတွေအပါအ၀င် ရေယာဉ်အုပ်စုကို KIA နဲ့ ပူးပေါင်းအဖွဲ့တွေက အစုန်အဆန်မှာ တိုက်ခိုက်နေတာဖြစ်ပါတယ်။
တိုက်ခိုက်ချိန်ကို ရိုက်ကူးထားတဲ့ ဒရုန်းရုပ်သံတွေလည်း လူမှုကွန်ရက်မှာ ပျံ့နှံ့နေပါတယ်။
ဒီရေယာဉ်တွေကို လုံခြုံရေးယူပေးနေတဲ့ ရွှေကူမြို့နယ်၊ ဇင်းဘုံရွာက စစ်တပ်စခန်းကိုလည်း KIA က ပြီးခဲ့တဲ့တစ်ပတ်ကတည်းက ထိန်းချုပ်ခဲ့ပါတယ်။
စက်တင်ဘာ ၁၂ ရက်ကလည်း ဗန်းမော်ဘက်ကနေ ရွှေကူဘက်ပြန်ဆင်းလာတဲ့ စစ်တပ်ရဲ့တွန်းသင်္ဘော ၃ စင်း၊ တိုက်ခိုက်ရေးသင်္ဘော ၁ စင်းနဲ့ အမြန်စက်လှေ တစ်စင်း တိုက်ခိုက်ခံရပြီး ပျက်စီးခဲ့တယ်လို့ သတင်းရင်းမြစ်တွေက အစောပိုင်းကတည်းက ပြောပါတယ်။
လက်ရှိ စစ်တပ်ရဲ့ခန့်မှန်း အင်အားတစ်ရာကျော်ပါတဲ့ စစ်ကြောင်းတစ်ကြောင်းဟာ ဗန်းမော်ကနေ မန်စီမြို့နယ်ထဲ အောင်ဂျာရွာကို တိုးလာလို့ KIA နဲ့ ပူးပေါင်းတပ်တွေအကြား တိုက်ပွဲတွေ ပြင်းထန်နေတယ်လို့ ဗိုလ်မှူးကြီး နော်ဘူက ပြောပါတယ်။
စစ်တပ်က အခုလို ရေယာဉ်တွေ တိုက်ခိုက်ခံရတာနဲ့ ပတ်သက်လို့တော့ သတင်းထုတ်ပြန်တာ မရှိသေးပါဘူး။
