அசாமில் இருந்து 3000கி.மீ கடந்து தமிழக கோயில்களுக்கு வரும் 5 யானைகள் - சர்ச்சை எழுவது ஏன்?

அசாம் மாநிலத்தில் இருந்து சுமார் 3,000 கி.மீ. தொலைவு சாலை வழியாகக் கொண்டு வரப்பட்ட துர்கா என்ற ஐந்து வயது யானை, மதுரை மீனாட்சி அம்மன் கோயிலை செப்டம்பர் 14ஆம் தேதி வந்தடைந்தது. மேலும் நான்கு யானைகளை தமிழ்நாட்டிலுள்ள மூன்று கோயில்களுக்கும் ஒரு மடத்திற்கும் வழங்குவதற்கான விண்ணப்பங்கள் பரிசீலனையில் உள்ளன.

இந்த யானைகளை அசாமில் உள்ள தனியார் உரிமையாளர்களிடம் இருந்து நன்கொடையாளர்கள் வாங்கி, தமிழக கோயில்களுக்கு வழங்குவதாக தமிழ்நாடு அரசு தெரிவித்துள்ளது. ஆனால் துர்காவின் முந்தைய உரிமை, அது மானஸ் தேசியப் பூங்கா வளாகத்தில் இருந்து இடமாற்றம் செய்யப்பட்டதற்கான காரணம், நீண்டதூர பயணத்தின்போது விதிமுறைகள் கடைபிடிக்கப்பட்டனவா, கோயில்களில் யானைகளின் உடல்நலம் மற்றும் சமூக தேவைகள் எவ்வாறு பூர்த்தி செய்யப்படும் என்பன உள்ளிட்ட கேள்விகளை விலங்கு நல மற்றும் காட்டுயிர் அமைப்புகள் எழுப்பியுள்ளன.

அசாமில் இருந்து யானைகளைக் கொண்டு வருவது தேவையற்ற நடவடிக்கை என்கிறார் காட்டுயிர் ஆர்வலர் முரளீதரன். அசாமில் பராமரிக்கப்பட்ட யானைகளை தமிழகக் கோயில்களின் சூழல் மற்றும் காலநிலைக்கு மாற்றிப் பராமரிப்பது சிரமமாக இருக்கலாம் என்கிறார் யானை ஆராய்ச்சியாளர் சிவசுப்பிரமணியம்.

ஆனால் உரிய போக்குவரத்து மற்றும் பராமரிப்பு ஏற்பாடுகள் இருந்தால், யானைகளால் நீண்டதூரம் பயணம் செய்யவும் புதிய காலநிலைக்கு ஏற்ப வாழப் பழகிக் கொள்ளவும் முடியும் என்கிறார் மத்திய அரசின் யானைகள் திட்ட உயர்மட்டக் குழு உறுப்பினரும், பல யானைகள் மீட்பு நடவடிக்கைகளில் ஈடுபட்டவருமான ஓய்வுபெற்ற வனக் கால்நடை மருத்துவர் மனோகரன்.

தமிழ்நாடு வனத்துறை முகாம்களில் உள்ள யானைகளை கோயில்களுக்கு வழங்க முடியாது என்று பிபிசியிடம் தெரிவித்த தமிழ்நாடு வனத்துறையின் முதன்மைத் தலைமை வனப் பாதுகாவலர் ராகேஷ் குமார் டோக்ரா, அந்த யானைகளுக்கு அவற்றின் காட்டுயிர்த் தன்மை மாறாத வகையிலேயே பயிற்சி அளிக்கப்படுவதாகக் கூறினார். அசாமில் இருந்து வரும் யானைகளின் உரிமை மற்றும் அவற்றின் போக்குவரத்துக்கான சட்ட நடைமுறைகளை முதன்மையாக உறுதிப்படுத்த வேண்டிய பொறுப்பு அசாம் வனத்துறைக்கு இருப்பதாகவும் அவர் தெரிவித்தார்.

தமிழகம் வரும் 5 யானைகள்

தமிழ்நாடு இந்து சமய அறநிலையத் துறை கட்டுப்பாட்டில் உள்ள சில கோயில்களுக்கு ஐந்து யானைகளை நன்கொடையாக வழங்குவதற்கான விண்ணப்பங்கள் தமிழக அரசிடம் சமர்ப்பிக்கப்பட்டுள்ளன. முதல் கட்டமாக அசாம் மாநிலத்தில் இருந்து கொண்டு வரப்பட்ட துர்கா என்ற ஐந்து வயது யானை மதுரை மீனாட்சி அம்மன் கோயிலை செப்டம்பர் 14ஆம் தேதி அதிகாலையில் வந்தடைந்தது.

துர்கா தவிர, திருவண்ணாமலை அருணாச்சலேஸ்வரர் கோயில், காஞ்சிபுரம் மடம், மயிலாடுதுறை வைத்தியநாத சுவாமி கோயில், ராமேஸ்வரம் ராமநாதசுவாமி கோயில் ஆகியவற்றுக்கு மேலும் நான்கு யானைகளை அசாமில் இருந்து கொண்டு வந்து நன்கொடையாக வழங்குவதற்கான விண்ணப்பங்கள் அளிக்கப்பட்டுள்ளதாக தமிழக அரசு தெரிவித்துள்ளது. இந்த விண்ணப்பங்கள் மீதான ஆய்வு இன்னும் நிறைவடையவில்லை.

துர்கா, ரூப்சிங், சிவா, ஹீராலால், பிஜுலி ஆகிய ஐந்து யானைகளும் ஐந்து முதல் பத்து வயதுக்கு உட்பட்டவை என்றும், அவற்றில் துர்காவுக்கு ஐந்து வயதே ஆவதாகவும் இந்தியாவில் கால்நடைகளுக்கான மக்கள் அமைப்பு (PFCI) தெரிவித்துள்ளது.

இதுகுறித்து ஊடகங்களிடம் பேசிய அந்த அமைப்பின் நிறுவனர் அருண் பிரசன்னா, "இந்த யானைகளைப் பராமரிக்கத் தங்களுக்குப் பொருளாதார வசதி இல்லை என்று தனிநபர்கள் கூறுகின்றனர். தனியாருக்குச் சொந்தமானதாகக் கூறப்படும் துர்கா, அந்த உரிமையாளரின் இடத்திலிருந்து அல்லாமல் அரசு கட்டுப்பாட்டில் உள்ள வளாகத்தில் இருந்து இடமாற்றம் செய்யப்பட்டது, அதன் உண்மையான உரிமை மற்றும் இதுவரையிலான பராமரிப்பு குறித்து கேள்விகளை எழுப்புகிறது," என்றார்.

துர்கா தனியார் உரிமையிலிருந்த யானையா, மானஸ் தேசியப் பூங்கா வளாகத்தில் அது எந்த அடிப்படையில் பராமரிக்கப்பட்டது, அதன் உரிமை எப்போது, யாரிடமிருந்து நன்கொடையாளருக்கு மாற்றப்பட்டது என்பதற்கான ஆவணங்கள் பொதுவெளியில் முழுமையாக வெளியிடப்படவில்லை. இது தொடர்பான உரிமைச் சான்றிதழ், இடமாற்ற அனுமதி மற்றும் கால்நடை மருத்துவச் சான்றிதழ்களை வெளியிட வேண்டுமென்று அசாம் மற்றும் தமிழகத்தைச் சேர்ந்த விலங்கு நல அமைப்புகள் கோரியுள்ளன.

இதற்கிடையே, கோயில் குடமுழுக்கு மற்றும் பிற விழாக்களின்போது யானைகளைப் பயன்படுத்த அனுமதி வழங்குவதில் ஏற்படும் தாமதத்தைத் தவிர்க்க வழிகாட்டு நெறிமுறைகளை வகுக்க வேண்டுமென சேவா டிரஸ்ட் என்ற அமைப்பு சென்னை உயர் நீதிமன்றத்தில் மனு தாக்கல் செய்தது.

துர்காவை கொண்டு வருவதற்கு தடையின்மைச் சான்று அளிக்கப்பட்டு விட்டதாக தமிழக வனத்துறை நீதிமன்றத்தில் தெரிவித்தது. மற்ற நான்கு யானைகள் தொடர்பான விண்ணப்பங்கள் ஆய்வில் இருப்பதாகக் கூறியதைத் தொடர்ந்து, அவற்றின் மீது ஒரு வாரத்திற்குள் முடிவு எடுக்கப்பட வேண்டுமென தலைமை நீதிபதி தலைமையிலான அமர்வு உத்தரவிட்டது. மாவட்ட அளவிலான சிறைபிடிக்கப்பட்ட யானைகள் நலக் குழுக்கள், யானைகள் பராமரிக்கப்படவுள்ள இடங்களையும் அங்குள்ள வசதிகளையும் ஆய்வு செய்து அறிக்கை அளிக்குமாறும் வனத்துறை கேட்டுள்ளது.

லலிதா என்ற யானை தொடர்பான மற்றொரு வழக்கில், தமிழக கோயில்கள் மற்றும் தனிநபர்கள் புதிதாக யானைகளைப் பெறுவதற்குத் தனி நீதிபதி விதித்திருந்த மாநிலம் தழுவிய தடையை சென்னை உயர் நீதிமன்ற அமர்வு செப்டம்பர் 2ஆம் தேதி ரத்து செய்தது. அந்தத் தடை விதிக்கப்படும்போது, அதனால் பாதிக்கப்படும் கோயில்கள் வழக்கில் கேட்கப்படவில்லை என்று அமர்வு குறிப்பிட்டது. அதேநேரத்தில், யானைகளைப் பெறுவது அல்லது இடமாற்றம் செய்வது தொடர்பான சட்டங்கள் மற்றும் விலங்கு நல விதிகளைப் பின்பற்ற வேண்டிய தேவை நீக்கப்படவில்லை.

தமிழகத்தில் இருந்து மட்டுமின்றி, அசாம் உள்ளிட்ட வடகிழக்கு மாநிலங்களைச் சேர்ந்த காட்டுயிர் பாதுகாப்பு அமைப்புகளிடம் இருந்தும் இந்த இடமாற்றங்களுக்கு எதிர்ப்பு எழுந்துள்ளது. மதுரை மீனாட்சி அம்மன் கோயிலுக்கு வந்துள்ள துர்காவின் வயது, உரிமை மற்றும் இடமாற்றம் தொடர்பான ஆவணங்களை அசாம் வனத்துறை வெளியிட வேண்டுமென அரண்ய சுரக்ஷா சமிதி என்ற அமைப்பு கோரியுள்ளது.

அந்த அமைப்பு பகிர்ந்த தகவலின்படி, அசாமின் மானஸ் தேசியப் பூங்கா வளாகத்தில் இருந்து செப்டம்பர் 7ஆம் தேதி பூங்கா இயக்குநர் சோனாலி கோஷின் மேற்பார்வையில் பயணத்தைத் தொடங்கிய துர்கா, செப்டம்பர் 14ஆம் தேதி அதிகாலை 1.30 மணியளவில் மதுரையை வந்தடைந்தது. பல ஆயிரம் கி.மீ. தொலைவுக்கு யானைகளை சாலை வழியாகக் கொண்டு வரும்போது, யானைகளின் இடமாற்றத்திற்கான சட்ட விதிகள் மற்றும் போக்குவரத்து வழிகாட்டு நெறிமுறைகள் முழுமையாகப் பின்பற்றப்பட்டனவா என்றும் பல தரப்பினர் கேள்வி எழுப்பியுள்ளனர்.

யானைகளை இடமாற்றம் செய்வதற்கான விதிகள் என்ன?

மத்திய அரசின் யானைகள் திட்டம் வகுத்துள்ள யானைகள் இடமாற்றம் தொடர்பான விதிமுறைகளில் கீழ்க்கண்ட விஷயங்கள் குறிப்பிடப்பட்டுள்ளன. கடந்த 1972ஆம் ஆண்டின் காட்டுயிர் (பாதுகாப்பு) சட்டத்தின் கீழ் பிரிவு 11 (1) (a) (பிடிப்பதற்கு அனுமதித்தல்), பிரிவு 48 (A) (விலங்குகளைக் கொண்டு செல்வதற்கு) ஆகியவற்றின் கீழ் முதன்மைத் தலைமை வனப் பாதுகாவலரிடம் இருந்து பெறப்பட்ட எழுத்துபூர்வ உத்தரவு மற்றும் மாநிலத்தின் போக்குவரத்து விதிகள்படி போக்குவரத்துக் குழு அமைக்க வேண்டும்.

இந்தக் கருத்துகளை உள்ளடக்கி விதிமுறைகளில் விரிவாக விளக்கப்பட்டுள்ளது. ஆனால் இந்த வழிகாட்டுதல் நெறிமுறைகள் அனைத்தும் காடுகளில் பிடிக்கப்படும் காட்டு யானைகளை இடமாற்றம் செய்வதற்கான விதிமுறைகள் என்று கூறும் காட்டுயிர் ஆர்வலர் முரளீதரன், "காட்டுயிர் பாதுகாப்புச் சட்டத் திருத்தம் 2022இல் சேர்க்கப்பட்டுள்ள பிரிவு 43இன் படி, காப்பிடத்தில் இருக்கும் யானைகளை (captive elephants) கோயில்களுக்கு இடமாற்றம் செய்வதற்கான விதிமுறைகளே பொருந்தும்" என்றார்.

இந்தப் பிரிவு பிடிக்கப்பட்ட யானைகளை கோயில்களுக்கு இடமாற்றம் செய்ய வழிவகுக்கும் என்பதை ஒப்புக்கொள்ளும் வனத்துறை அதிகாரிகள், அவற்றை இடமாற்றம் செய்யும்போது கடைபிடிக்க வேண்டிய பாதுகாப்பு வழிமுறைகள் எப்போதும் போலவே கடைபிடிக்கப்பட வேண்டுமென வலியுறுத்துகின்றனர்.

அசாம் யானைகள் தமிழகத்தின் காலநிலைக்குப் பழகுமா?

இதுதொடர்பாக பிபிசியிடம் பேசிய யானை ஆராய்ச்சியாளர் சிவசுப்பிரமணியம், ஒரு யானையை ஓரிடத்தில் இருந்து வேறு இடத்திற்கு மாற்றும்போது, அதன் தற்போதைய வாழ்விடம் மற்றும் புதிய இடத்தின் சூழலை ஒப்பிட்டு ஆராய வேண்டும் என்றார்.

"ஒரு யானையைப் பிடித்து வேறு இடத்திற்கு மாற்றுவதாக இருந்தால், அதே தன்மையுடைய வாழ்விடத்தில் மாற்றிப் பராமரிப்பதுதான் பொருத்தமானது. உதாரணமாக, முதுமலையில் பிடிக்கப்படும் யானையை ஆனைமலையில் வைத்துப் பராமரிக்கலாம். ஆனால் அதை முற்றிலும் வேறுபட்ட கடற்கரைச் சூழலில் வைத்தால், புதிய சூழலைச் சமாளிப்பது சிரமமாக இருக்கலாம்," என்றார் அவர்.

ஒரு காலத்தில் தமிழகத்தில் இருந்து அந்தமான் தீவுகளுக்கு யானைகள் கப்பலில் கொண்டு செல்லப்பட்டதைக் குறிப்பிட்ட அவர், இரண்டு பகுதிகளின் காலநிலையிலும் சில ஒற்றுமைகள் இருந்ததாகக் கூறினார். அதே வேளையில், கப்பலில் யானைகளை ஏற்றிச் செல்வதையும், சுமார் 3,000 கி.மீ. தொலைவுக்கு லாரியில் கொண்டு செல்வதையும் ஒரே மாதிரியாகக் கருத முடியாது என்றும், நீண்ட சாலைப் பயணம் யானைக்கு உடல் மற்றும் மன அழுத்தத்தை ஏற்படுத்தக்கூடும் என்றும் அவர் தெரிவித்தார்.

"மேற்கு வங்கம், ஒடிசா போன்ற பகுதிகளில் பராமரிக்கப்பட்ட யானைகளால் இங்குள்ள சூழலுக்கு ஒப்பீட்டளவில் எளிதாகப் பழக முடியும். ஆனால் துர்கா முன்பு பராமரிக்கப்பட்ட இடத்தின் மழைப் பொழிவு, ஈரப்பதம், வெப்பநிலை ஆகியவற்றுடன் ஒப்பிடும்போது, தமிழகத்தில் அதற்குக் கிடைக்கவுள்ள சூழல் வேறுபட்டிருக்கலாம். குளிர்காலத்தில் கொண்டு வந்திருந்தால், புதிய சூழலுக்குப் படிப்படியாகப் பழகுவதற்கு அவகாசம் கிடைத்திருக்கும். தற்போது வெப்பநிலை அதிகமாக உள்ள சூழலில் கொண்டு வந்திருப்பது சரியான முடிவல்ல என்பது எனது கருத்து," என்றார் சிவசுப்பிரமணியம்.

கடந்த 2026ஆம் ஆண்டின் எல் நினோ வலுப்பெற்று வருவதாக சர்வதேச வானிலை அமைப்புகள் கூறியுள்ளன. இருப்பினும், எல் நினோ நிலை மட்டும் ஒரு யானையின் உடல்நலத்தில் ஏற்படுத்தும் தாக்கத்தைத் தீர்மானிக்காது. உள்ளூர் வெப்பநிலை, ஈரப்பதம், நிழல், தண்ணீர், குளியல் வசதி, நடப்பதற்கான இடம் மற்றும் கால்நடை மருத்துவக் கண்காணிப்பு போன்றவற்றையும் சேர்த்தே மதிப்பிட வேண்டும் என்று நிபுணர்கள் கூறுகின்றனர்.

ஆனால் உரிய ஏற்பாடுகளுடன் யானைகளால் தொலைதூரப் பயணத்தை மேற்கொள்ளவும் புதிய காலநிலைக்குப் பழகிக் கொள்ளவும் முடியும் என்று மத்திய அரசின் யானைகள் திட்ட உயர்மட்டக் குழு உறுப்பினரும், யானைகள் மீட்பு மற்றும் சிகிச்சைப் பணிகளில் அனுபவம் கொண்டவருமான ஓய்வுபெற்ற வனக் கால்நடை மருத்துவர் மனோகரன் கூறுகிறார்.

பிபிசியிடம் பேசிய அவர், "1990களிலேயே தமிழகத்தில் இருந்து கலீம், பல்லவன் ஆகிய யானைகளை மேற்கு வங்கத்தின் ஜல்தாபாராவுக்கு கொண்டு சென்று, அங்கு குடியிருப்புப் பகுதிகளுக்குள் புகுந்த காட்டு யானைகளை விரட்டும் பணியில் ஈடுபடுத்தியுள்ளோம். பல்வேறு காலகட்டங்களில் தமிழகத்தில் இருந்து யானைகள் வேறு மாநிலங்களுக்கும் கொண்டு செல்லப்பட்டுள்ளன. எங்களுக்குத் தெரிந்தவரை, அந்தப் பயணத்தாலோ சென்ற இடத்தின் காலநிலையாலோ அவற்றுக்குப் பெரிய உடல்நல பாதிப்பு ஏற்படவில்லை," என்றார்.

யானைகள் புதிய காலநிலைக்குப் பழகும் திறன் கொண்டவை என்றாலும், ஒவ்வொரு யானையின் வயது, உடல்நிலை, பழக்கவழக்கம் மற்றும் கிடைக்கும் பராமரிப்பு வசதிகளே அதன் நிலையைத் தீர்மானிக்கும் என்பதையும் அவர் ஏற்றுக்கொண்டார். எனவே இடமாற்றம் யானையைப் பாதிக்காது என்று பொதுவாக முடிவு செய்வதைவிட, ஒவ்வொரு யானையையும் தனித்தனியாகக் கண்காணிக்க வேண்டும்.

"அந்தக் காலத்தில் சாதாரண லாரிகளில்தான் யானைகளைக் கொண்டு சென்றோம். இப்போது அவற்றை இடமாற்றம் செய்வதற்காக வடிவமைக்கப்பட்ட பிரத்யேக வாகனங்கள் உள்ளன. யானையின் உடலில் தண்ணீர் தெளிப்பது, கழிவுகளை அகற்றுவது, உணவு மற்றும் தண்ணீர் வழங்குவது போன்ற வசதிகளுடன் அவை அமைக்கப்படுகின்றன. உரிய வாகனம், அனுபவமுள்ள பணியாளர்கள், மருத்துவக் கண்காணிப்பு இருந்தால், அசாமில் பராமரிக்கப்பட்ட யானைகளாலும் தமிழகச் சூழலுக்குப் படிப்படியாகப் பழக முடியும்," என்றார் மனோகரன்.

தமிழக முகாம் யானைகளை கோயில்களுக்கு வழங்காதது ஏன்?

தமிழக வனத்துறை முகாம்களில் யானைகள் பராமரிக்கப்படும் நிலையில், அசாமில் இருந்து தமிழகக் கோயில்களுக்கு யானைகளை ஏன் கொண்டுவர வேண்டும் என்ற கேள்வியும் சமூக ஊடகங்களில் எழுப்பப்படுகிறது.

யானைகள் திட்டக் கணக்கெடுப்புகளின்படி, கர்நாடகா, அசாம், தமிழ்நாடு ஆகிய மாநிலங்களில் இந்தியாவின் யானைகளில் கணிசமான எண்ணிக்கை காணப்படுகிறது. யானைகள் திட்டம் 2017ஆம் ஆண்டில் நடத்திய யானைகள் கணக்கெடுப்பில் இந்தியா முழுவதும் 27,312 காட்டுயானைகள் இருந்தன. கர்நாடகா 6,013 யானைகளுடன் முதலிடத்தில் இருந்தது. அசாம் 4,159, தமிழ்நாட்டில் 3,136, கேரளா 2,785 யானைகள் எணணிக்கையுடன் அடுத்தடுத்த இடங்களில் இருந்தன. கடந்த ஆண்டில் அண்டை மாநிலங்களுடன் இணைந்து நடத்தப்பட்ட ஒருங்கிணைந்த கணக்கெடுப்பில் தமிழகத்தில் யானைகளின் எண்ணிக்கை 3,170 யானைகள் என்று தமிழ்நாடு வனத்துறை தகவல் வெளியிட்டது.

மேலும், அசாமில் அதிக எண்ணிக்கையிலான சிறைபிடிக்கப்பட்ட அல்லது வளர்ப்பு யானைகள் இருப்பதாகக் கூறப்படுகிறது. அங்கு தனியார் உரிமையில் உள்ள யானைகளையே நன்கொடையாளர்கள் பெற்று தமிழகக் கோயில்களுக்கு வழங்குவதாக தமிழக அரசு தெரிவித்துள்ளது.

முதலில் தமிழக அரசே இந்த யானைகளை வாங்கியதாக வெளியான தகவல் குறித்து இந்து சமய அறநிலையத் துறை அமைச்சர் ரமேஷிடம் செய்தியாளர்கள் கேட்டபோது, "அவை எதுவுமே அரசால் வாங்கப்படவில்லை. அந்த யானைகள் அனைத்தும் நன்கொடையாளர்களால் வாங்கிக் கொடுக்கப்பட்டவை," என்று அவர் பதிலளித்தார்.

ஆனால் அசாமில் இருந்து யானைகளைக் கொண்டு வருவது தேவையற்றது என்று கூறும் காட்டுயிர் ஆர்வலர் முரளீதரன், "தமிழக முகாம்களில் பராமரிக்கப்படும் யானைகளில் இருந்தே ஆண், பெண் என ஒரு ஜோடியை ஒவ்வொரு கோயிலுக்கும் வழங்குவதற்கான சாத்தியத்தை அரசு பரிசீலிக்கலாம்" என்கிறார்.

யானைகள் பாதுகாப்பு தொடர்பான பல வழக்குகளை நடத்தி வரும் முரளீதரன், ஒவ்வொரு கோயிலிலும் யானைகளைத் தனிமையில் வைக்காமல், மற்றொரு யானையின் துணையுடன் பராமரிக்க வேண்டும் என்று தான் தொடர்ந்த வழக்கு ஒன்றில் உத்தரவு பெற்று இருப்பதாகவும் கூறினார்.

பிபிசியிடம் பேசிய அவர், "முதுமலையில் நூறு ஆண்டுகளாக நடந்து வந்த யானை சவாரியை விலங்கு நலக் காரணங்களுக்காக வனத்துறை நிறுத்தியுள்ளது. அப்படியிருக்கும்போது, யானைகளை 3,000 கி.மீ. தொலைவுக்கு சாலை வழியாகக் கொண்டு வர அனுமதிப்பதன் அடிப்படை என்ன என்பதை அரசு தெளிவுபடுத்த வேண்டும். அசாமில் இருந்து வரும் யானைகள் இங்குள்ள கோயில்களில் சிறப்பாகப் பராமரிக்கப்படுமென்ற நம்பிக்கை இருந்தாலும், அவற்றைத் தனியாக வைத்திருக்காமல் மற்றொரு யானையின் துணையுடன் பராமரிக்க வேண்டும்," என்றார்.

கர்நாடகத்தில் உள்ள தர்மஸ்தலா ஸ்ரீ மஞ்சுநாத சுவாமி கோயிலில் ஆண் மற்றும் பெண் யானைகள் ஒன்றாகப் பராமரிக்கப்படுவதைச் சுட்டிக்காட்டிய முரளீதரன், "தமிழக கோயில்களிலும் யானைகளுக்கு சமூகத் தொடர்பு கிடைக்கும் வகையில் குறைந்தது இரண்டு யானைகளைச் சேர்த்துப் பராமரிக்க வேண்டும்" என்றார்.

ஆனால் ஆண் யானையும் பெண் யானையும் ஒரே இடத்தில் இருப்பதால் மட்டுமே அவை இனப்பெருக்கம் செய்துவிடும் என்று கூற முடியாது என்றும், அதற்குப் பல்வேறு உயிரியல் மற்றும் சுற்றுச்சூழல் காரணிகள் அவசியம் என்றும் வனக் கால்நடை மருத்துவர் மனோகரன் தெரிவித்தார். அதேநேரத்தில், யானைகள் சமூக வாழ்க்கை கொண்ட விலங்குகள் என்பதால், அவற்றைத் தனிமைப்படுத்தாமல் மற்ற யானைகளுடன் தொடர்பு கொள்ளும் வாய்ப்பை வழங்குவது நல்லது என்பதையும் குறிப்பிட்டார்.

அசாமில் இருந்து யானைகளை தமிழக கோயில்களுக்கு கொண்டு வருவது குறித்து தமிழகத் முதன்மை தலைமை வனப் பாதுகாவலர் ராகேஷ் குமார் டோக்ராவிடம் பிபிசி தமிழ் கேள்வி எழுப்பியபோது, "தற்போது வந்துள்ள துர்காவை தவிர மற்ற யானைகளுக்கு அசாம் அரசு முழுமையான அனுமதி அளித்த பிறகே, தமிழக வனத்துறையால் தடையின்மைச் சான்று வழங்கப்படும்" என்று அவர் தெரிவித்தார்.

மேலும், "இந்த யானைகள் அசாமில் தனியார் உரிமையில் இருப்பதாகக் கூறப்பட்டுள்ளது. அவற்றை நன்கொடையாளர்கள் பெற்று தமிழகக் கோயில்களுக்கு வழங்க விண்ணப்பித்துள்ளனர். உரிமைச் சான்றிதழ், யானையின் சட்டபூர்வமான இடமாற்றம் மற்றும் போக்குவரத்து விதிமுறைகள் பின்பற்றப்பட்டுள்ளனவா என்பதை உறுதிசெய்ய வேண்டிய முதன்மைப் பொறுப்பு அசாம் மாநிலத்தின் முதன்மை தலைமை வனப் பாதுகாவலருக்கு உள்ளது. இருப்பினும் தமிழக வனத்துறையும் அந்த ஆவணங்களையும் இங்குள்ள பராமரிப்பு வசதிகளையும் ஆய்வு செய்யும்," என்றார் அவர்.

"தமிழக வனத்துறையின் யானைகள் முகாம்களில் 110க்கும் அதிகமான யானைகள் உள்ளன. அவற்றைக் கோயில்களுக்கு வழங்குவது தற்போதைய நடைமுறையில் சாத்தியமில்லை. முகாம்களில் பராமரிக்கப்படும் யானைகளுக்கு அவற்றின் காட்டுயிர்த் தன்மை முழுமையாக மாறாத வகையிலேயே பயிற்சி அளிக்கப்படுகிறது. அவற்றைக் கோயில்களுக்கு வழங்குவது கொள்கை ரீதியாக அரசு எடுக்க வேண்டிய முடிவு," என்றார் டோக்ரா.

"காட்டில் பிடிக்கப்படும் அல்லது தாயிடமிருந்து பிரிந்து கிடைக்கும் யானைகளை இயன்றவரை மீண்டும் காட்டுக்குள் அனுப்பவே முயல்கிறோம். அந்த முயற்சிகள் பலனளிக்காதபோது மட்டுமே சில யானைகள் முகாம்களில் பராமரிக்கப்படுகின்றன அல்லது கும்கிகளாகப் பயிற்றுவிக்கப்படுகின்றன. குறிப்பாகத் தாயிடமிருந்து பிரிந்த குட்டிகளை எந்த ஆதரவுமின்றி காட்டில் விட்டால் அவை உயிரிழக்கும் அபாயம் உள்ளது," என்றும் அவர் சுட்டிக்காட்டினார்.

துர்காவுக்கும் மற்ற நான்கு யானைகளுக்கும் சட்டப்படி உரிமை மாற்றம் செய்யப்பட்டுள்ளதா, நீண்டதூரப் பயணத்திற்கான உடல்நல சான்றிதழ்கள் வழங்கப்பட்டுள்ளனவா, அவை சென்றடையும் கோயில்கள் மற்றும் மடத்தில் போதுமான இடம், தண்ணீர், நிழல், நடைபயிற்சி மற்றும் மற்ற யானைகளுடன் சமூகத் தொடர்புக்கான வாய்ப்பு உள்ளதா என்பவையே இந்த இடமாற்றங்களைத் தீர்மானிக்கும் முக்கியக் கேள்விகளாக இருக்கின்றன.

அசாம் மற்றும் தமிழக அரசுகள் அனுமதி அளிப்பது மட்டுமின்றி, இந்த ஆவணங்களையும் பராமரிப்பு ஆய்வு அறிக்கைகளையும் வெளிப்படையாக வெளியிட வேண்டும் என்பதே விலங்கு நல அமைப்புகளின் கோரிக்கையாக உள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு