Trioblaidean ChalMac a' leantainn 's soitheach Steòrnabhaigh a-nis briste

Dhearbh Caledonian Mac a' Bhriuthainn gun deach seòlaidhean an MV Loch Seaforth a chur dheth airson a' chòrr den là Diluain.

Tha an soitheach, a tha a' dol eadar Steòrnabhagh agus Ullapul, air a bhith ga càradh on bhris ramp a' chinn-toisich aice Là na Sàbaid.

Thuirt CalMac nach deach aig innleadairean air sin a chur ceart agus, mar sin, nach seòl i à Steòrnabhagh aig 2:00f neo às Ullapul aig 5:30f.

Tha a' chompanaidh ag ràdh gum foillsich iad naidheachd mun t-suidheachadh as ùire an-diugh fhathast.

Nuair a ràinig an Loch Seaforth Steòrnabhagh feasgar na Sàbaid bha luchd-siubhail còrr is uair de thìde air deic nan càraichean mus d' fhuair iad dheth.

'S ann tro dheic nan càraichean a tha luchd-siubhail air chois cuideachd a' faighinn far a' bhàta an-dràsta fhad 's a tha an drochaid-coise aca ga càradh.

Tha am bàta fhathast ceangailte ann an Steòrnabhagh.

Cha robh i gu bhith a' dol air ais a dh'Ullapul co-dhiù feasgar an-dè leis gun deach an seòladh a chur dheth agus dùil ri gaoith mhòir.

Gheibhear fiosrachadh mu sheirbheisean na companaidh an seo., taobh a-muigh

Seo an dùbhlan as ùire do Chaledonian Mac a' Bhriuthainn a dh'innis an t-seachdain a chaidh gun robh faisg air an treas cuid den chabhlach aca a-mach à seirbheis.

Aig aon àm, bha sia bàtaichean mòra aca agus ceithir den fheadhainn bheaga an dàrna cuid briste neo a' faighinn na seirbheis bliadhnail aca.

B' fheudar dhaibh soithichean a ghluasad air feadh an lìonra airson agus gum faigheadh gach coimhearsnachd, thuirt iad, seirbheis air choireigin.

Dh'fhoillsich iad clàran-ama eadar-amail a mhaireas chun an 17mh là den Ghiblean.