Spòrs

Tùs an deilbh, SNS

Tha Ross County is Hamilton Accies fhathast co-ionnan aig mullach Lìog a h-Aon is iad air crìochnachadh co-ionann 1-1 ann an Inbhir Pheofharain oidhche Mhàirt.

Chuir Dylan Mac a' Ghobhainn County air thoiseach goirid às dèidh leth-uair le oidhirp bho oir a' bhocsa.

Beagan mhionaidean às dèidh sin fhuair Stuart McKinstry Accies co-ionann.

Cha b' urrainn do thaobh seach taobh tadhal a lorg 'son an geam a bhuannachadh is chrìochnaich e 1-1.

Tha na sgiobaidhean ri chèile fhathast gun geama a chall san lìog gu seo is iad còmhla air 32 puing, ged a tha na Staggies air thoiseach air tadhail.

Thuirt manaidsear Chounty Stuart Kettlewell gun robh e a' faireachdainn gur e "cothrom caillte a bh' ann gu ìre" is e den bheachd gun robh barrachd smachd aig an sgioba aigesan air a' gheama.

Thuirt Kettlewell cuideachd ge-tà, gun robh e den bheachd nach do chruthaich County cothroman gu lèor.

"Bha mi a' faireachdainn gun do rinn sinn gu leòr 'son an geama a bhuannachadh is air là eile, bhiodh sinn air a bhith nas clionaigaich timcheall air an tadhal is bhiodh sinn air na puingean fhaighinn.

"Feumaidh sinn urram a shealltainn do dh'Accies ge-tà airson mar a fhuair iad iad fhèin air ais anns a' gheama".

Bidh County air falbh Cille Bhrìghde an Ear Disathairne is Accies aig an taigh an aghaidh Mhon Rois

Tùs an deilbh, TG4

Thuirt Iain Robinson gun robh fireannaich na h-Alba air leth pròiseil às dèidh dhaibh an gnothach a dhèanamh air na h-Èireannaich sa gheama eadar-nàiseanta oidhche Shathairne.

Bhuannaich na h-Albannaich 4-12 (24) gu 2-17 (23) ann an geama anabarrach teann ann am Páirc Uí Chaoimh ann an Corcaigh.

Bha na h-Albannaich air a bhith trì puingean air thoiseach aig lethach slighe is an dà thadhal aca air tighinn bho Chalum McLay.

Bha coltas ann gun robh an geama a' dol taobh nan Èireannach nuair a chaidh iadsan air thoiseach a' dol a-steach dha na mionaidean mu dheireadh.

Fhuair Robinson fhèin treas tadhal do dh'Alba ge-tà, is nochd Innes Blackhall an uairsin le tadhal eile ann an ùine a chaidh a chur ris a' gheama.

Bha ùine ann fhathast airson Robinson am ball a chur dhan lìon a-rithist, ach thug an rèitire an cluich air ais gus buille-peanais a thoirt do dh'Alba is fear de na h-Èireannaich air an caman aige a thilgeil.

Chuir Alexander Michie am buille sin os cionn a' mhaide-tarsainn 'son an aon phuing a bha a dhìth air Alba fhaighinn.

"Geama gu math cruaidh is gu math doirbh is tha sgioba na h-Èireann dìreach sgoinneil," thuirt Robinson ri TG4 às dèidh a' gheama.

"Bha feum againn a bhith suas airson a' gheama is tha sinn pròiseil gun do bhuannaich sinn an geama".

Nas tràithe air an là bha boireannaich na h-Èireann air pronnadh a thoirt air Alba 9-11 (38) gu 1-3 (6).

'S i Megan Ralph a fhuair tadhal na h-Alba air là nuair a bha na h-Èireannaich pìos math air thoiseach orra.

Thug an uairsin an droch shìde buaidh air sgiobaidhean na h-Alba is iad glaicte ann an Èirinn le plèanaichean air an cur dheth.

Chìthear geama nam fear air TG4 an seo, taobh a-muigh is geama nam ban an seo, taobh a-muigh.

Tùs an deilbh, SNS

Thèid seann darbaidh bho Lìog na Gàidhealtachd a chluich às ùr is Ross County is Brora Rangers air an taghadh còmhla san treas chuairt de Chupa na h-Alba.

Chaidh an taghadh a dhèanamh le fear-glèidhidh na h-Alba is na h-Eaglaise Brice Scott Bain oidhche Dhòmhnaich.

Tha mòran bhliadhnaichean bho chluich County is Brùra geama farpaiseach an aghaidh a chèile ach thèid iad a-steach dhan gheama seo sa chupa ann an sunnd is County aig mullach Lìog 1 is Brùra aig bàrr Lìog na Gàidhealtachd.

Cluichidh Caley Thistle an aghaidh sgioba air a bheil iad eòlach gu lèor cuideachd is iadsan gus fàilte a chur air Cove Rangers.

Tha slighe fhada ro Chlach na Cùdainn is iadsan air an taghadh air falbh an aghaidh na Sròine Reamhaire.

Tha an taghadh slàn an seo.

Bidh na geamaichean ann air an deireadh-sheachdain mu dheireadh den t-Samhain.

Chaidh an geam mu dheireadh de sheusan Lìog Thaobh Siar na Gàidhealtachd eadar Iar-Thuath an Eilein Sgitheanaich is Malaig Disathairne a chur dheth air sgàth na droch shìde.

'S e seo an dàil as ùire air a' gheam leis gu bheil sgioba an Iar-Thuath air a bhith trang ann an Cupa Amaitearach na h-Alba.

Tha Malaig air an lìog a bhuannachadh mar-tha ach tha iad ag amas air an an t-seusan a chrìochnachadh gun puing idir a leigeil seachad san lìog.

Crìochnachaidh An Iar-Thuath san dàrna àite ge brith dè thachras.

Cha tàinig dearbhadh fhathast airson là ùr son a' gheam.

Thig seusan a' bhuill-choise ionadail gu ceann Disathairne nuair a chluicheas Iar-Thuath an Eilein Sgitheanaich an aghaidh Mhalaig sa gheama mu dheireadh ann an Lìog Thaobh Siar na Gàidhealtachd.

Tha cha mhòr dà mhìos ann bho bhuannaich Malaig an tiotal ach tha dàil air a dhol air a' gheama seo is an Iar-Thuath - a chrìochnaicheas san dàrna àite às bith dè thachras - air a bhith trang ann an Cupa Amaitearach na h-Alba.

Rinn iad an gnothach air Bon Accord City air breaban-peanais ann an Obar Dheathain às dèidh dha na sgiobaidhean a bhith co-ionnan 3-3.

Bha a' chiad gheama eatorra san Eilean Sgitheanach air crìochnachadh 2-2.

• Malaig a' buannachadh Lìog Taobh Siar na Gàidhealtachd

Bha an Iar-Thuath an uairsin co-ionnan 3-3 ann am Port Rìgh san ath chuairt an aghaidh St Anthony's, mus do chaill iad 5-0 ann an Glaschu.

Bha briseadh-dùil eile ann dhaibh Disathairne nuair a rinn Caol Àcain an gnothach orra 5-3 air breaban-peanais is na sgiobaidhean air crìochnachadh co-ionnan 2-2 sa chuairt dheireannaich de Chupa Eòghainn MhicRath.

Ged a tha Malaig air a bhith nan tàmh nuair a bha sin uile a' tachairt, bidh iad fhèin gu mòr ag amas air an geama a bhuannachadh is an seusan a chrìochnachadh gun puing idir a leigeil seachad san lìog.

Tha dùil gun tèid an geama air adhart ann an Ùige aig 11:30m.

Tùs an deilbh, Camanachd na Camanachd

'S e Ruairidh Ceannadach à Baile Ùr an t-Slèibh an caiptean a bhios aig sgioba nam fear aig Alba nuair a chluicheas iad an aghaidh na h-Èireann ann an Corcaigh Disathairne.

Tha an Ceannadach, 34, air a bhith na phàirt air leth cudromach do loidhne-dìon a' Bhaile Ùir thairis air iomadh bliadhna is e air na duaisean mòra uile ann an iomain a bhuannachadh leis a a' chluba.

Aig ìre phearsanta bhuannaich e cuideachd Bonn Albert Mhic a' Ghobhainn mar shàr-chluicheadair cuairt dheireannach Chupa na Camanachd ann an 2019.

"Tha mi air mo dhòigh a bhith nam phàirt de sguad cho tàlantach agus 's e fìor urram a th' ann a bhith nam sgiobair," thuirt e.

"'S e an-còmhnaidh geama gu math farpaiseach a th' ann an aghaidh nan Èireannach ach tha sinn air trèanadh còmhla gu math anns na seachdainean mu dheireadh is tha sinn deiseil is deònach a dhol an sàs Disathairne."

Chaidh Rona Stiùbhart aig Bàideanach ainmeachadh mar-tha mar chaiptean air sgioba nam ban.

Bidh an dà gheama aig Páirc Uí Chaoimh ann an Corcaigh Disathairne, na boireannaich aig 4f is na fir aig 6f.

Chithear iad air YouTube TG4, taobh a-muigh.

Tùs an deilbh, Comann Camanachd nam Ban

Chaidh Rona Stiùbhart ainmeachadh mar chaiptean air sgioba nam ban aig Alba 'son a' gheama iomain eadar-nàiseanta ann an Corcaigh Disathairne.

Tha Rona air a bhith na pàirt den sgioba aig Bàideanach a bhuannaich air an t-seusan seo a' Phrìomh Lìog, Cupa Valerie Fhriseil is Cupa ùr na Prìomh Lìge.

'"S e urram mòr a th' ann a bhith nam sgiobair," thuirt Rona.

"Tha buidheann gu math làidir againn is tha mi air mo dhòigh a bhith os on cionn".

Thèid boireannaich na h-Alba an aghaidh na h-Èireann aig Páirc Uí Chaoimh aig 4f.

Bidh geama nam fear ann an uairsin aig 6f.

Tha an dà sguad mar a chaidh ainmeachadh an seo, taobh a-muigh.

Tha atharrachadh ann am buidheann nam fear is Alasdair MacIlleathain aig Gleann Urchadain a' tighinn a-steach an àite Chaluim Ghrannd aig Ceann a' Ghiùthsaich is esan air a ghoirteachadh.

Bidh na geamaichean air an craoladh beò air YouTube TG4, taobh a-muigh.

Tha Ceann a' Ghiùthsaich ann an suidheachadh làidir 'son grèim a chumail air tiotal na Prìomh Lìge às dèidh dhaibh a' chùis a dhèanamh air na nàbaidhean aca Baile Ùr an t-Slèibh Disathairne.

Bha am Baile Ùr feumach air puing aig an Dell gus an tiotal a bhuannachadh iad fhèin is chaidh iad air thoiseach le tadhal bho Chonor Jones às dèidh 33 mionaidean.

Bha buille ann dhaibh cha mhòr sa bhad nuair a chaidh Jones a chur far na pàirce.

Bha Ceann a' Ghiùthsaich co-ionnan tràth san dàrna leth tro Lee Bain, is chuir an sgiobair aca Ruairidh MacAnndrais iad an uairsin 2-1 air thoiseach le 17 mionaidean air fhàgail.

Sin mar a chrìochnaich an geama - is le càirt dhearg eile do Struan Ros aig a' Bhaile Ùr anns na mionaidean mu dheireadh - is làmh an uachdair a-nise aig Ceann a' Ghiùthsaich san rèis.

• Ceann a' Ghiùthsaich air Cupa na Camanachd a bhuannachadh

Tha seusan a' Bhaile Ùir ullamh is iad aig an ìre seo ceithir puingean air thoiseach air Ceann a' Ghiùthsaich aig mullach na lìge.

Thèid Ceann a' Ghiùthsaich seachad orra ge-tà, ma 's e is gum buannaich iad an dà gheama a tha air fhàgail aca.

Bidh iad an aghaidh Loch Abair an ath-sheachdain is an uairsin Ceann Loch Seile air an t-seachdamh là den t-Samhain.

Ged a rinn an droch aimsir sgrios air tòrr de chlàr na h-iomain chaidh farpaisean a' Mhòid air adhart ann an Glaschu.

Bha fìor dheagh là aig Glaschu Meadhan Earra-Ghàidheal is iadsan a' togail nam prìomh fharpaisean do bhoireannaich agus dha na fir.

• Urram Camanachd a' Mhòid air iomanaiche Uibhisteach Ghlaschu

Ann an geama nam ban rinn GMA a' chùis 3-1 air Oilthigh Ghlaschu gus Cupa Dùbhlain LearnGaelic a bhuannachadh.

'S iad Lexie NicCoinnich, Rose Watson is Beth Page a bha air an targaid do GMA às dèidh do Hannah NicDhòmhnaill na h-oileanaich a chur air thoiseach tràth.

Thòisich GMA gu làidir ann an geama nam fear is Calum Moireasdan, Logan Adam is Ryan MacCoinnich (2) uile le tadhail sa chiad leth an aghaidh Obar Dobhair.

Chuir Fionnlagh Penman tadhal eile do GMA tràth san dàrna mus d' fhuair Calum Moireach fear air ais dha sgioba Fhìobha.

Chrìochnaich e 5-1 is Geall-dùbhlain na h-Aghaidh Mòire a' dol gu GMA.

Trì seachdainnean bho chuairt dheireannach Chupa na Camanachd tha geama fìor mhòr eile san amharc Disathairne eadar Ceann a' Ghiùthsaich is Baile Ùr an t-Slèibh.

Coinnichidh na sgiobaidhean aig an Dell is puing a dhìth air a' Bhaile Ùr airson an tiotal a dhearbhadh.

Ma 's e is gun dèan Ceann a' Ghiùthsaich an gnothach ge-tà, bidh an tiotal nan làmhan fhèin is cothrom aca a ghlèidheadh le ceithir puingean bhon dà gheama eile a tha air fhàgail aca.

Bidh na geamaichean sin air falbh an aghaidh Loch Abair is Ceann Loch Seile.

Tha Baile Ùr an t-Slèibh is Ceann a' Ghiùthsaich air coinneachadh ceithir tursan mar-tha air an t-seusan seo.

• Cupa MhicThàmhais le Ceann a' Ghiùthsaich

• Ceann a' Ghiùthsaich air Cupa na Camanachd a bhuannachadh

Bhuannaich am Baile Ùr a' chiad gheama 1-0 san lìog tràth san t-seusan.

Bhon uairsin ge-tà, tha Ceann a' Ghiùthsaich air a' chùis a dhèanamh orra 2-0 ann an Cupa MhicThàmhais, 4-1 ann an Cupa MhicAmhlaigh, is 2-1 ann an Cupa na Camanachd air a' mhìos a chaidh.

Bhuannaich Ceann a' Ghiùthsaich an geama mòr sin a dh'aindeoin is gu bheil grunnan de na cluicheadairean aca air a bhith air an goirteachadh, is tha dùil gum bi iad às aonais feadhainn dhiubh a-rithist Disathairne.

Tha e coltach gu bheil am Baile Ùr fhèin fhathast an dòchas gun urrainn dha Kenny Ros cluich eadar na puist, a dh'aindeoin is mar a chaidh a ghoirteachadh e fhèin sa chuairt dheireannaich de Chupa na Camanachd.

Tillidh Declan Brannan dhaibh is esan air a' chuairt dheireannach a chall is e air a chasg.

Tuilleadh an seo.

Tùs an deilbh, SNS

Tha ceistean gu leòr ann do choidse ùr na h-Alba Sebastien Pocognoli is an sgioba aige air call 2-1 ri Slobhinia ann an Glaschu ann an Lìog nan Nàiseanan oidhche Mhàirt.

Thàinig seo seachdain às dèidh do Phocognoli a' chiad gheama aige aig Hampden a chall 3-0 ris an Eilbheis.

Ged a bha Ryan Christie air Alba a chur air thoiseach is leth-uair air a' chloc, bhuannaich tadhail bho Matko is Šturm san dàrna leth an geama dha Slobhinia.

Bha grunn chothroman eile aca a bhiodh air an geama a dhèanamh fiù 's na bu chofhurtaile.

"Bha cus mhearachdan ann bho chluicheadairean le eòlas" thuirt Stiùbhart Urchadain, a bha ag aithris air a' gheama do BhBC Spòrs oidhche Mhàirt.

"Bha beàrnan air feadh an àite san loidhne-dìon.

"Tha gu leòr aig a' mhanaidsear ri smaoineachadh mu dheidhinn ach bhiodh e air an t-uabhas ionnsachadh thairis air na ceithir geamaichean seo."

Bidh Alba an dòchas gum bi cùisean nas fheàrr an ath-mhìos nuair a thilleas an sgioba nàiseanta airson gheamaichean an aghaidh Masadonia a Tuath aig Hampden agus an Eilbheis ann an St Gallen.

Tùs an deilbh, SNS

Cluichidh sgioba na h-Alba an ceathramh geama aca ann an nas lugha na cola-deug oidhche Mhàirt nuair a thig Slobhinia gu Hampden ann an Lìog nan Nàiseanan.

Bha na sgiobaidhean mar-tha co-ionnan 0-0 ann an Ljubljana sa chiad gheama fharpaiseach aig Sebastien Pocognoli.

Bhon uairsin tha na h-Albannaich air call 3-0 ris an Eilbheis is air a' chùis a dhèanamh 2-0 air Masadonia a Tuath oidhche Shathairne.

Thogadh trì puingean Dimàirt Alba os cionn Slobhinia sa bhuidhinn.

A' bruidhinn air Aithris na Maidne Dimàirt, thuirt Calum Dòmhnallach gur e geama cudromach a th' ann dhan choidse ùr aig Alba.

"Ma thèid againn buannachadh bidh a h-uile duine a' faireachdainn math mu dheidhinn Pocognoli.

"Mura tèid bidh 's dòcha ceist no dhà a' nochdadh. Mar sin tha mi a' smaoineachadh gur e sgioba an ìre mhath làidir a bhios ann."

Bidh Calum fhèin ann an sgioba BBC Spòrs oidhche Mhàirt.

Cluinnear an geama beò air BBC Radio nan Gàidheal is air BBC Sounds is am prògram a' tòiseachadh aig 7f.

'S iad GA United a thog Cupa Chlann Dòmhnaill às dèidh dhaibh an gnothach a dhèanamh 6-5 air Port Rìgh.

'S iad Joel Goldby (3), Ryan Watson (2) is Corey MacIllinnein a fhuair na tadhail do GA United is Kerien Austin (2), Sean MacAnndrais, Iain MacLeòid is Jamie Ros air an targaid do Phort Rìgh.

Dh'fhàg seo GA United aig mullach na buidhne is an cupa a' dol thuca.

Bha geama mòr cuideachd aig Iar-Thuath an Eilein Sgitheanaich Disathairne is iad a' cluich an aghaidh Saint Anthony's à Glaschu ann an Cupa Amaitearach na h-Alba.

Ged a bha sgioba Ghlaschu 2-0 air thoiseach ann am Port Rìgh, thàinig an Iar-Thuath air ais is trì tadhail bho Gus Dòmhnallach gam fàgail air thoiseach.

Fhuair Saint Anthony's breab-peanais a chuir iad dhan lìon, ge-tà, is an geama a' crìochnachadh 3-3.

Feumaidh na sgiobaidhean mar sin cluich a-rithist ann an Glaschu Disathairne seo tighinn.

Tùs an deilbh, Thomas Nugent/Geograph

Cha bhi Caol Bhòid ann am Prìomh Lìog na h-iomain an ath-sheusan 'son a' chiad turas bho 2007 is iad air a dhol sìos gu h-oifigeil air an deireadh-sheachdain.

Rinn na nàbaidhean aca Caol-Gleann a' chùis orra 1-0 ann an Clachan Ghleann Da-Ruail Disathairne - rud a bha eachdraidheil ann fhèin is seo a' chiad turas riamh a rinn Caol-Gleann a' chùis air Caol Bhòid aig ìre na ciad sgioba.

'S e Anndra MacBhiocair a chuir an tadhal cudromach.

Tha an dà phuing a' ciallachadh gu bheil cothrom fhathast aig Caol-Gleann fhèin fuireach sa Phrìomh Lìog.

Tha dà gheama aca air fhàgail - ri chèile an aghaidh Camanachd an Eilein Sgitheanaich - is a h-uile coltas gum bi feum aca air rudeigin bhon dà gheama sin.

Ghabh na Sgitheanaich iad fhèin ceum mòr a dh'ionnsaigh a bhith sàbhailte nuair a rinn iad a' chùis air Cabar Fèidh 4-2 ann an Srath Pheofhair.

• Dùthaich Bhòidheach is Iomain Mhòr sa Phrìomh Lìog

Chuir Dàn Dòmhnallach is Eàirdsidh Millar dà thadhal ri chèile dha na Sgitheanaich is Blair is Craig Moireasdan air an targaid 'son Cabers.

Cha robh Craig - a tha air a bhith air a ghoirteachadh 'son ùine - air a' phàirc ach gu sgiobalta 'son buille-peanais a chur dhan lìon.

Thog seo na Sgitheanaich os cionn Loch Abair san lìog.

Tha aona gheama air fhàgail aig na h-Abraich is sin an aghaidh Cheann a' Ghiùthsaich, is dùil gum bi sùil gheur acasan air na thachras anns na geamaichean eadar Caol-Gleann is na Sgitheanaich.

San Lìog Nàiseanta rinn Inbhir Aora a' chùis 4-1 air Lòbhat.

'S e 4-1 a bha ann cuideachd dha Cill Mhàilidh an aghaidh Loch Carran ann an Lìog Tuath 2.

Thog seo Cill Mhàilidh gu bàrr na lìge os cionn Camanachd Leòdhais, is chuir e às mar sin dha dòchas sam bith a bh' aig na Leòdhasaich air an tiotal.

Tha co-dhiù cuid den Arm Thartan dòchasach fhathast mu fhireannaich na h-Alba fo stiùir Sebastien Pocognoli.

Bithear an dòchas na 3 puingean fhaighinn ann am Masadonia a Tuath oidhche Shathairne.

Tùs an deilbh, Thomas Nugent/Geograph

Chaidh an geama mòr aig bonn Prìomh Lìog na h-iomain Disathairne eadar Caol-Gleann is Caol Bhòid a ghluasad bho Chlachan Ghleann Da-Ruail gu Stèideam Dhùn Omhain.

Tha na nàbaidhean aig bonn na lìge an-dràsta.

Chan eil cùs dòchais ann do Chaol Bhòid is thèid iad sìos gu h-oifigeil Disathairne ma chailleas iad.

Tha Caol-Gleann iad fhèin ann an suidheachadh dùbhlanach is bidh dà phuing deatamach dhaibhsan ma tha cothrom gu bhith aca An t-Eilean Sgitheanach no Loch Abar a ghlacadh.

• Dùthaich Bhòidheach is Iomain Mhòr sa Phrìomh Lìog

Bidh an geama ann a-nise air a' phàirc uachdaraich ann an Dùn Omhain aig 2:30f

Tha dùil ri uisge trom air a' Ghàidhealtachd Dihaoine a dh'fhaodadh buaidh a thoirt air clàr na h-iomain Disathairne, anns a bheil grunn gheamaichean cudromach.

A bharrachd air a' gheama ann an Dùn Omhain, tha dà gheama mòr eile sa Phrìomh Lìog.

Feumaidh Ceann a' Ghiùthsaich an dà phuing an aghaidh Cheann Loch Seile ann an Rèaraig air neo bidh an tiotal aig Baile Ùr an t-Slèibh.

Bidh na Sgitheanaich ag amas air na puingean ann an Srath Pheofhair an aghaidh Chabar Fèidh 'son sreap air falbh bhon bhonn.