په تایلنډ کې "۱۴ کلن زدکوونکي د ځان او نیا او نیکه په ګډون اته تنه وژلي"
د عکس سرچینه، Reuters
تایلنډي چارواکي د ادعا له مخې وايي چې د نهم ټولګي یوه "۱۴ کلن زدکوونکي" ښوونځي باندې تر برید مخکې خپل نیا او نیکه هم وژلي دي.
د تایلنډ د روغتیا وزیر ویلي چې مشکوک بریدګر په ښوونځي کې دننه تر ډزو مخکې خپل نیا او نیکه هم وژلي دي چې مړي یې د دوی په کور کې موندل شوي دي.
پولیسو مخکې په دغه برید کې د وژل شوو شمېر شپږ تنه ښودلی و خو اوس وايي چې د مشکوک بریدګر او د هغه د نیا او نیکه په ګډون ټولټال اته کسان وژل شوي چې پنځه یې ښوونکي دي.
پولیس وايي چې زدکوونکي په دغه برید کې د خپل نیکه (۹اېماېم) توپنګچه کارولې او وروسته یې ځان هم پرې وژلی دی.
تر اوسه د دغه برید تر شا انګېزه نه ده روښانه شوې.
"بریدګر کوټه په کوټه ګرځېده"
د عکس سرچینه، Reuters
د عکس سرچینه، Reuters
د پېښې له ځایه په خپرو شوو ویډيوګانو کې ښکاري چې د ښوونځي کارکوونکي په چټکۍ سره زدکوونکي له ټولګیو باسي او په سیمه کې پولیس او امبولانسونه هم لیدل کېږي.
پېښه د نونتابوري ولایت په بانګ کروای ولسوالۍ کې شوې او د برید ښکار شوي ښوونځي په ګډون سیمې ته څېرمه ځينې مکتبونه او وړکتونونه رخصت کړای شوي دي.
بيبيسي ته د دغه ښوونځي د اووم ټولګي یوې زدکوونکې د خپلو سترګو لیدلی حال ویلی. هغه وايي چې له خپل ټولګي یې بریدګر لیده چې کوټه په کوټه ګرځېده او وروسته یې د دوی په ټولګي کې ولاړه ښوونکې هم وویشته.
دا زدکوونکې وايي چې له هغې وروسته یې نور څه و نشوای لیدلی.
دې پېښې اوس په تایلنډ کې د وسلو ګرځولو قانون په اړه بحثونه راپورته کړي دي او د حکومت مخالف ګوند ورته د بیاکتنې غوښتنه کړې ده.
