Dominican Republic Joheirry Mola win Miss World 2026 beauty pageant
Wia dis foto come from, Ivan Apfel/Getty Images
Joheirry Mola of Dominican Republic don win di Miss World crown for her home kontri.
Di 24-year-old, model win di competition on Saturday evening for Vietnam, wia di international pageant hold dis year.
Mola win di second crown for Dominican Republic as Mariasela Alvarez bin win di kontri first crown for 1982.
Mola win against 111 contestants wey also contest in di competition wey hold for Nha Trang city, Vietnam.
Elisabeth Reynes Alabern of Spain na di first runner-up for di competition and Miss Malaysia, Taanusiya Chetty emerge as di second runner-up and winner of di beauty-with-purpose competition.
Eritrea, Malaysia, Vietnam, Dominican Republic, Spain and South-Africa make am to di final rounds as di top six in di Miss world competition.
Nigerian contestant, Tamunosoye Karibi-George also reach di top 12 through di People's Choice Award for di competition.
Julia Morley, CEO of di Miss world organisation annouce di winners and runner-ups on Saturday.
End of Di one wey oda users dey read well well
Di event start around 9:00pm Hanoi time zone (2:00 WAT time zone) for Nha Trang city, Vietnam.
Opal Suchata, winner of di 73rd Miss World crown Joheirry Mola .
Miss world competition mark dia 75th anniversary as dem hold di 73rd Miss World beauty pageant competition for Vietnam.
Di competition bin start wit 111 contestants on 8 August and end on 5 September.
2024 Mr World Daniel Mejía from Puerto-Rico and Miss world 2016 Stephanie del Valle host di event.
Nigerian contestant, Tamunosoye Karibi-George wey reach di top 12 lose to Miss Eritrea.
Di 26-year-old also win di top model competition for Africa continent during di competition, while Miss South-Africa Romanda Hombir emerge as di continental winner for Africa.
Di competition start wit pageants from 111 countries. Di list include di winners of top model, beauty-wit-purpose, talent, sports, People's Choice Award and di judges choice.
Tanzania go hold di 74th Miss World competition.
Profile of 24-year-old Joheirry Mola
Joheirry Mola na 24-year-old teacher, journalist and community advocate from Santo Domingo
She be graduate of Business Management and Administration from Universidad Iberoamericana (UNIBE).
She establish one social initiative - di Voices of Tomorrow to help children and young pipo for her community to expand dia knowledge of English education. Di aim of di project na to give young pipo greater access to opportunities, confidence and tools for dia future.
Mola bin represent Distrito Nacional wen she win di Miss World Dominican Republic title for 2025. She be di winner of di top model competition for Americas & Caribbean continent and she finally win di crown, afta she earn her spot for di top 40 for di Miss World 2026 final for Vietnam.
Education na main part of Mola work as she dey teach Literature and Social Studies for schools. Mola also dey involved in community programmes wey dey support children.
For March 2026, she bin work as live reporter for Univision, during di UNICEF telethon for di Dominican Republic, wia dem help promote di campaign to raise $24.752 million for programmes to support children.
