Raysal Wasaaraha Israa’iil oo sheegay in la xiray duuliyihii mindida ku weeraray kan kale

Tebin toos ah

1. 30 Sebtembar 2026Netanyahu wuxuu soo dhaweeyay ninkii “qolka duulista xoog ku galay”

   

   Xigashada Sawirka, Israeli Prime Minister's Office

   Ra’iisul Wasaaraha Israa’iil Benjamin Netanyahu ayaa garoonka diyaaradaha Ben Gurion kula kulmay rakaabkii diyaaradda dib loogu soo celiyay, kaddib markii ay ka degeen diyaaraddii.

   Muuqaal lagu baahiyay akoonkiisa rasmiga ah ee baraha bulshada ayaa muujinaya isaga oo rakaabka isku duubaya oo salaamaya. Mid ka mid ah ragga rakaabka ah ayaa xiran funaanad dhiig ka muuqdo.

   Qoraalka muuqaalka la socday ayaa sheegay in uu la kulmay “Yaniv, oo qolka duulista xoog ku galay diyaaraddii ka soo duushay Dubai kuna socotay Israa’iil.”

2. 30 Sebtembar 2026Sawirro: Dabaaldegyo ka socda garoonka diyaaradaha Ben Gurion

   

   Xigashada Sawirka, APTN

   Markii rakaabku ay ka degeen diyaaraddii dib loogu soo celinayay ee ka timid Sacuudi Carabiya, waxaa garoonka ku soo dhaweeyay dadweyne badan oo daawanayay, kuwaas oo muusig tumaya, heesaya, qoob-ka-ciyaaraya, isla markaana lulaya calamada Israa’iil.

   Duulimaadkii hore ee ka yimid Dubai kuna socday Tel Aviv ayaa loo weeciyay garoonka Tabuk ee Sacuudi Carabiya, kaddib markii la soo sheegay in qof mindi lagu dhaawacay gudaha diyaaradda.

   

   Xigashada Sawirka, APTN

   

   Xigashada Sawirka, APTN

   

   Xigashada Sawirka, APTN

3. 30 Sebtembar 2026Sawirro laga helayo rakaabka oo dhexmaraya garoonka Ben Gurion ee Tel Aviv

   

   Hadda waxaan aragnaa sawirrada muujinaya rakaabkii oo ku socda gudaha garoonka diyaaradaha ee Tel Aviv, kaddib markii ay ka degeen diyaaraddii goor hore ka soo ambabaxday Sacuudi Carabiya.

   Halkan kala soco wararka deg dega ah ee la xiriira dhacdada waxaana idiin soo gudbin doonnaa hadallada rakaabka isla marka aan helno.

4. 30 Sebtembar 2026Diyaaradii siday rakaabka diyaaradii ay saarnaayeen dhacdadu ka dhacday oo ka degtay Tel Aviv

   

   Xigashada Sawirka, reu

   Diyaaraddii siday rakaabkii diyaaraddii hore ee ka soo duushay Dubai kuna sii jeeday Tel Aviv, balse loo weeciyay Sacuudi Carabiya, ayaa lagu arkay barxadda Garoonka diyaaradaha ee Ben Gurion ee Israa’iil.

   Mas’uuliyiin Israa’iili ah iyo ciidamada ammaanka ayaa sidoo kale lagu arkay iyagoo ku sugaya qaybta dadka imanaya, si ay u soo dhaweeyaan rakaabka marka ay diyaaradda ka soo degaan.

5. 30 Sebtembar 2026Rakaabkii saarnaa diyaaraddii loo weeciyey Sacuudiga oo dib ugu duulay Israa’iil

   

   Xigashada Sawirka, Reuters

   Rakaabkii saarnaa diyaaradda Flydubai ee ku lug lahayd dhacdadii maanta ayaa hadda ka baxay Sacuudi Carabiya, sida ay sheegtay shirkadda maamusha garoonka ee Cluster2.

   Sida ay shirkadda Sacuudigu sheegtay, rakaabku waxay ka ambabaxeen Garoonka Tabuk.

   Sida aan hore u soo sheegnay, shirkadda Flydubai ayaa laba diyaaradood oo beddel ah u dirtay Tabuk, si ay “u qaadaan oo u beddelaan rakaabka iyo shaqaalaha diyaaradda.”

   Diyaaraddii asalka ahayd waxay ka soo duushay Dubai kuna sii jeedday Tel Aviv, ka hor inta aan loo weecin Sacuudi Carabiya xilli uu dhacdadani ka socotay diyaaradda.

6. 30 Sebtembar 2026Raysal Wasaaraha Israa’iil oo war weyn ka soo saaray dhacdadii diyaaradda

   Ra’iisul Wasaaraha Israa’iil Benjamin Netanyahu ayaa bayaan ka soo saaray dhacdadii diyaaradda Flydubai.

   Wuxuu sheegay in “duuliyihii mindiyeynta geystay la xiray, waxaana hadda su’aalo weydiinaya mas’uuliyiinta Sacuudi Carabiya.”

   Dhanka kale wasiirka difaaca Israa’iil, Israel Katz, ayaa sheegay in xogaha hordhaca ahi muujinayaan in mid ka mid ah duuliyeyaashu uu damacsanaa inuu diyaaradda burburiyo, isagoo doonayay in dhammaan dadkii saarnaa ay ku dhintaan.

   Wuxuu dhacdada ku tilmaamay “isku day weerar argagixiso”, wuxuuna ammaanay rakaabkii Israa’iiliyiinta ahaa ee duuliyaha awood uga adkaaday oo xakameeyay.

7. 30 Sebtembar 2026Danjiraha Israa’iil u fadhiya Qaramada Midoobay oo ka hadlay dhacdadii diyaaradda

   

   Xigashada Sawirka, Reuters

   Danjiraha Israa’iil u fadhiya Qaramada Midoobay ayaa sheegay in duuliye “geesi ah” oo ka tirsanaa diyaaraddii Flydubai ee loo weeciyay Sacuudi Carabiya xilli ay ku sii jeeday Tel Aviv uu “sida libaax ula dagaallamay” si uu rakaabka u ilaaliyo.

   Danny Danon ayaa bartiisa X ku qoray: “Rakaabkii Israa’iiliyiinta ahaa ee maanta ka soo duulay Dubai waxay muujiyeen go’aan iyo karti aan caadi ahayn, iyagoo gacan ka geystay ka hortagga musiibo weyn.”

   Wuxuu intaas ku daray: “Waxaan u mahadcelinayaa duuliyihii Imaaraatiga ahaa ee geesiga ahaa, kaas oo sida libaax ula dagaallamay oo badbaadiyay nolosha rakaabka.”

   “Waxaan u rajaynayaa inuu si degdeg ah uga soo kabsado dhaawacyada, dhammaan rakaabkana waxaan u rajaynayaa safar nabdoon oo ay dalkooda ugu laabtaan.”

8. 30 Sebtembar 2026Wasiirka amniga Israa’iil oo ka hadlay dhacdadii diyaarada

   Wasiirka Amniga Qaranka ee xisbiga midigta fog, Itamar Ben-Gvir, ayaa baraha bulshada ku daabacay qoraal uu ka hadlay y dhacdada, inkastoo uusan u muuqan inuu ku hadlayay magaca dowladda.

   Ben-Gvir ayaa sheegay in “argagixiso uu qorsheeyay inuu diyaarad burburiyo oo uu dilo” dadka saarnaa.

   Wuxuu u mahadceliyay “rakaabkii geesiyaasha ahaa”, wuxuuna sheegay in “caqiidada amniga” Israa’iil loo baahan yahay in la gaarsiiyo heer ka sarreeya, isagoo intaas ku daray in dalku uusan joojin ilaa uu ka gaaro “guul buuxda” dhinacyo badan.

   Wax badan kama soo bixin dowladda Israa’iil marka laga reebo bayaan hore oo lagu sheegay in xaaladda la xakameeyay, isla markaana dadaallo lagu doonayo in rakaabka dib loogu soo celiyo Israa’iil ay socdaan.

   Yair Golan, oo hoggaamiya xisbiga bidixda ah ee Democrats-ka Israa’iil, ayaa ammaanay rakaabkii diyaaradda saarnaa oo uu ku tilmaamay “geesiyaal”, balse wuxuu dowladda ku dhaliilay inay dhacdada u adeegsanayso “inay ku kasbato dhibco siyaasadeed oo raqiis ah.”

9. 30 Sebtembar 2026Dalka uu ka soo jeedo oo la ogaaday mid ka mida duuliyayayaashii caawiyey in diyaarada la dajiyo

   

   Xigashada Sawirka, EVN

   Sida aan hore u soo sheegnay, rakaabku waxay warbaahinta Israa’iil u sheegeen in laba duuliye oo fadhiyay qaybta dambe ee diyaaradda ay ka caawiyeen in diyaaradda la dejiyo kaddib markii uu dagaal ama gacan-ka-hadal ka dhacay gudaha diyaaradda.

   Rakaab kale oo lagu magacaabo Almog Itali ayaa warbaahinta u sheegay in labadan duuliye ay ahaayeen duuliyeyaal beddel ah, kuwaas oo loo qorsheeyay inay duuliyaan duulimaad kale oo xigay.

   Itali wuxuu sheegay in mid ka mid ah duuliyeyaashaas uu ahaa British, halka duuliyaha labaad uu ahaa Yurubiyiin, balse uusan sheegin jinsiyaddiisa.

   Itali wuxuu sheegay in faahfaahinta saxda ah ee wixii ka dhacay qolka duulista aysan weli caddayn, balse uu sheegay in duuliyeyaashii ay xakameeyeen diyaaradda oo ay si nabadgelyo ah ugu dejiyeen Sacuudi Carabiya.

   “Waxaa jira dhowr nooc oo kala duwan oo dhacdada ah,” ayuu yiri kaddib markii uu la hadlay dad ku sugnaa qaybta hore ee diyaaradda. “Waxa cad ayaa ah in laba duuliye ay ku jireen qaybta hore mid ayaa kan kale mindi ku dhaawacay.”

   Weli ma aanan maqal war rasmi ah oo ka soo baxay mas’uuliyiinta oo ku saabsan faahfaahinta wixii ka dhacay duulimaadka. Horaantii, shirkadda maamusha garoonka Tabuk, halka ay diyaaradda ku degtay, waxay sheegtay in kabtanka iyo kaaliyaha duuliyaha ay dhaawacmeen.

10. 30 Sebtembar 202625 dal oo qofka baasaboor Soomaaliga wata uu Visaha ku qaadanayo garoonkooda

    Wixii ka dambeeyay markii uu bishan January horaanteedii soo baxay liiska kala sarreynta baasaboorrada caalamka, waxay u muuqataa in ay sii badanayaan tirada dalalka soo dhaweynaya baasaboorka Soomaaliya, sida ay shaaciyeen hay’ado kala duwan oo u guul gala qiimeynta aqoonsiyada dal-ku-gal-ka.

    Hay’adaha Reach Immigration iyo Passport Index ayaa soo saaray liis ay isku waafaqsan yihiin oo ah ku sheegeen dalalka u fasaxaya qofka heysta baasaboorka Soomaaliya in uu kasoo dago garoonkooda.

    Waddamadaas oo gaaraya ilaa 25 ayaa qofka aqoonsiga Soomaaliya wata ka doonaya in uu visaha ama dal-ku-gal-ka ku qaato garoonka, marka uu diyaaradda kasoo dago ka dib.

    Dalalkan ayaa ka duwan kuwa ay Soomaalidu ku aadi karaan visa la’aanta ama aan wax oggolaansho ah looga baahneyn marka ay gudaha u galayaan.

    Liiska waddamada uu qofka aqoonsiga Soomaaliya ku safraya ka dagi karo garoonkooda diyaaradaha si uu uga dalbado visa waxaa uu u dhigan yahay sidan:

    Halkan ka sii akhri

11. 30 Sebtembar 2026Sacuudiga oo war ka soo saaray xaaladda kabtanka iyo kaaliyihii diyaarada

    

    Xigashada Sawirka, Getty Images

    Shirkadda maamusha garoonka diyaaradaha Tabuk ee Sacuudi Carabiya halka loo weeciyay diyaaradda ayaa hadda soo saartay bayaan.

    Waxay sheegeen in kabtanka iyo kaaliyaha duuliyaha ee diyaaradda Flydubai ay dhaawacmeen, waxaana loo qaaday isbitaalka. Bayaanku ma sheegin waxa sababay dhaawacyada.

    Bayaanka ayaa intaas ku daray in xarunta laga hago isku socodka diyaaradaha ee garoonka ay 08:44 subaxnimo, waqtiga maxalliga ah, ka heshay diyaaradda Flydubai farriin degdeg ah, iyadoo diyaaraddu codsatay inay si degdeg ah u degto.

    Diyaaraddu waxay si nabadgelyo ah ugu degtay garoonka qiyaastii hal saac kaddib, sida lagu sheegay bayaanka.

12. 30 Sebtembar 2026Maraakiib lagu beegsaday marinka Hormuz “gantaallo ama waxyaabo qarxa oo aan la aqoonsan”

    Hay’adda Hawlgallada Ganacsiga Badda ee UK ee UKMTO, ayaa sheegtayin talaadii saddex markab oo marayay Marinka Hormuz lagu bartilmaameedsaday “gantaallo ama waxyaabo qarxa oo aan la aqoonsan.”

    Hay’addu waxay sheegtay in bartilmaameedyadu ahaayeen markab shidaal qaada, markab qaada gaaska dabiiciga ah ee dareeraha ah (LNG), iyo markab kale, balse ma aysan bixin faahfaahin dheeraad ah.

    Marinka Hormuz ayaa xilligan ah goob ay ka taagan tahay xiisad u dhexeysa Iran iyo Maraykanka.

    Ka hor dagaalka, ku dhawaad shan meelood meel saliidda iyo gaaska dabiiciga ah ah ee dunida ayaa mari jiray marinkan muhiimka ah ee maraakiibta.

    Dagaalka kaddib, Iran ayaa xirtay Marinka Hormuz, halka Maraykankuna uu go’doomin dhinaca badda ah ku soo rogay dekedaha Iran.

13. 30 Sebtembar 2026War deg deg ah, Degdeg: war cusub oo ka soo kordhay diyaaraddii Israa'iil ku wajahneed

    

    Xigashada Sawirka, Flightradar24/Reuters

    Waxaa la soo wariyay in xaaladda degdegga ah ee diyaaradda ay ka dhalatay muran ama gacan-ka-hadal dhex maray duuliyaha iyo kaaliyaha duuliyaha.

    Rakaab Israeli ah oo diyaaradda saarnaa ayaa saxafiyiinta u sheegay in shaqaalaha diyaaradda ay gargaar dalbadeen, kaddibna qaar ka mid ah rakaabka ay caawiyeen qabashada mid ka mid ah duuliyeyaasha oo ay xireen.

    Ra’iisul Wasaaraha Israel Benjamin Netanyahu ayaa bayaan uu soo saaray ku sheegay in xaaladda hadda la xakameeyay, isla markaana dadaallo lagu wado sidii rakaabka Israel looga soo celin lahaa Sacuudiga.

14. 30 Sebtembar 2026Shirkadaha Cumrada dadka geeya ee muuqaallada ka duuba oo laga cabanyo

    

    Atariishada caanka ah ee Kannywood, Rahama Sadau, ayaa ka cabatay habka ay qaar ka mid ah shirkadaha safarradu u duubaan muuqaalada dadka u safray dhulka barakeysan si ay Cumro ugu soo gutaan, iyagoo qayb ka dhigaya dadaalladooda suuq-geynta.

    Rahama Sadau ayaa qoraal ay ku baahisay Instagram-keeda ku sheegtay inay doonaysay inay soo cumraystaan iyada iyo koox kale, balse habka ay shirkadaha qaar u dhaqmaan uu niyad-jab ku yahay.

    Waxay sheegtay in Cumradu ay tahay cibaado, ayna habboonayn in loo beddelo fursad lagu sameeyo sawirro iyo muuqaallo lagu baahiyo baraha bulshada.

    Qoraalkeeda waxaa ka falceliyay dad badan, waxaana ka mid ahaa caalimka caanka ah Mufti Menk, oo u soo jeediyay shirkad ay Cumrada u raaci karto, isaga oo sheegay inay u oggolaato dadka gudanaya Cumrada inay cibaadadooda si gaar ah u gutaan.

    Mufti Menk ayaa sidoo kale sheegay in xilligan dad badan ay ku dhiiradaan Cumrada kaddib markii ay arkaan dad kale oo gudanaya, balse uu ku booriyay inaan sawir qaadashadu noqon waxa ugu weyn ee diiradda la saaro.

15. 30 Sebtembar 2026War deg deg ah, Ruushka oo weerarro culus ku qaaday Kyiv iyo khasaare ka dhashay

    Ruushka ayaa habeenkii xalay weerar culus oo loo adeegsaday gantaallo iyo diyaarado aan duuliye lahayn ku qaaday caasimadda Ukraine ee Kyiv.

    Sarkaal sare ayaa sheegay in dhowr guri lagu burburiyay mid ka mid ah degmooyinka magaalada, halka meydka ilmo laga helay burburka hoostiisa.

    Wuxuu sheegay in qaar ka mid ah qoyska ilmaha dhaawacmay laga soo badbaadiyay burburka.

    Weerarka ayaa sidoo kale waxyeello gaarsiiyay bakhaarro iyo kaabayaal kale oo muhiim ah, taasoo sababtay koronto la’aan iyo hakad ku yimid adeegga biyaha.

    Ruushka ayaa toddobaadyadii u dambeeyay kordhiyay weerarrada uu maalin iyo habeenba ka geysto Kyiv.

16. 30 Sebtembar 2026War deg deg ah, Rabshado ka dhashay burburinta Massaajid oo ka socda Hindiya

    

    Xigashada Sawirka, Sameer Khan

    Burburinta qayb ka mid ah Masjidka Shahi ee magaalada Ujjain, ee dalka Hindiya, ayaa wali taagan. Wakiillo ka tirsan guddiga masjidka ayaa hawsha burburinta sameynaya.

    Dhanka kale, booliska ayaa dacwado ka dhan ah 30 qof ka gudbiyay rabshado iyo dhagax-tuur dhacay Isniintii xilli qayb ka mid ah masjidka la burburinayay. 20 qof ayaa la xiray.

    Booliska ayaa sagaal ka mid ah dadka la xiray geeyay isbitaalka Charak si baaritaan caafimaad loogu sameeyo, ka hor inta aan maxkamad la horgeyn.

    Dhacdadu waxay bilaabatay Isniintii, xilli qayb ka mid ah Masjidka Shahi ee Chhatri Chowk la burburinayay. Qaar ka mid ah dadka deegaanka ayaa ka hor yimid arrintaan, waxaana xaaladdu isku beddeshay rabshad iyo dhagax-tuur.

    Booliska ayaa sheegay in sidoo kale baraha bulshada lagu faafiyay farriimo lagu kicinayay dadka.

17. 30 Sebtembar 2026War deg deg ah, Faahfaahinno kala duwan oo ka soo baxaya diyaaradda Israa'iil ku wajahneed oo Sacuudiga u weecatay

    Sida ay Reuters sheegtay, mas’uuliyiinta Israel ayaa baaraya xaaladda ku saabsan duulimaad diyaaradeed oo ku socday Israel balse intii uu safarka ku jiray beddelay jihada.BBC Arabic ayaa sheegtay in diyaaradda ay u leexatay dhanka Sacuudiga kaddib markii ay gashay hawada Urdun, halkii ay Israel u weecan laheed.

    Warbaahinta Israel ayaa sheegtay in diyaaradda, oo ay saarnaayeen in ka badan 150 qof, ay intii ay hawada ku jirtay dirtay calaamad xaalad degdeg ah. Ciidanka Cirka Israel ayaa markaas si taxaddar ah hawada u geliyay laba diyaaradood oo dagaal.

    Hase yeeshee, ilo amni oo Israel ah ayaa sheegay inaan la xaqiijin in diyaaradda la afduubtay, isla markaana aan weli la ogeyn sababta dhabta ah ee dhacdada.

    Diyaaradda ayaa ugu dambayn ku degtay garoonka Tabuk ee Sacuudiga. Afhayeen u hadlay xafiiska Ra’iisul Wasaaraha Israel ayaa Reuters u sheegay in leexinta diyaaradda iyo degitaankeeda Tabuk aysan ka dhalan afduub.

    Shabakadda Flightradar24 ayaa horay u sheegtay in diyaaradda muddo kooban dirtay koorka 7500, kaas oo loo adeegsado in lagu muujiyo afduub ama faragelin sharci-darro ah.

    Dhanka kale, Times of Israel ayaa sheegay in muran la sheegay inuu dhex maray duuliyeyaasha uu sababay xaaladda degdegga ah iyo leexinta diyaaradda, balse faahfaahinta murankaas weli lama shaacin.

18. 30 Sebtembar 2026War deg deg ah, War degdegah: Diyaarad ku wajahneed Tel Avi, Israa'iil oo si dedeg ah loogu weeciyay dhanka Sacuudiga

    

    Xigashada Sawirka, AFP via Getty Images

    Duulimaad ay leedahay shirkadda FlyDubai oo ka soo duulay Dubai kuna socday Tel Aviv ayaa loo weeciyay Sacuudiga kaddib markii xaalad degdeg ah looga dhawaaqay diyaaradda.

    Duulimaadka FZ1073 ayaa markii hore diray calaamadda degdegga ah ee 7700, waxaana wax yar kaddib la diray 7500, taas oo inta badan loo adeegsado in lagu muujiyo faragelin sharci-darro ah ama afduub diyaaradeed.

    Diyaaradda ayaa markii dambe dib ugu laabatay calaamadda 7700, waxaana ay ku degtay garoonka Tabuk ee Sacuudiga.

    Afhayeen u hadlay xafiiska Ra’iisul Wasaaraha Israel ayaa Reuters u sheegay in leexinta diyaaradda iyo degitaankeeda Tabuk aysan ahayn afduub.

    Warbaahinta Times of Israel ayaa sheegtay in muran la sheegay inuu dhex maray duuliyeyaasha diyaaradda uu sababay xaaladda degdegga ah iyo leexinta duulimaadka, balse faahfaahin dheeraad ah lama bixin.

19. 30 Sebtembar 2026Doorashooyinka Hirshabeelle iyo Galmudug oo deegaannadaas ka socda

    

    Xigashada Sawirka, SONNA

    Wararka ka imaanaya maamullada Hirshabeelle iyo Galmudug ayaa sheegaya in dadku ay codkooda ka dhiibanayaan doorashooyinka golaha deegaanka iyo wakiillada maamulladaasi oo saaka loo dareeray.

    Sawirro baraha bulshada lagu faafiyay ayaa muujinaya dadka oo meelaha qaar leyn ugu jira dhiibashada codkooda. Doorashadaan oo ah qof iyo cod ayaa Galmudug ah ku celis, halka Hirshabeelle ay tahay markii ugu horreysay.

    Guddiga doorashooyinka ayaa xalay sheegay in la xayiri doono inta badan isu socodka aan muhiimka ahayn, marka laga reebo dadka ka shaqeeynaya doorashada.

    Warbaahinta gudaha ayaa ku warramaysa in doorashooyinka ay si hufan uga bilowdeen magaalooyinka waaweyn ee Galmudug iyo Hirshabeelle.

20. 30 Sebtembar 2026War deg deg ah, Mareykanka oo siinaya abaal-marin dhan 15 milyan oo dollar ciddii keenta xog ku saabsan Cabdullaahi, Axmed iyo Cali

    

    Xigashada Sawirka, Reuters

    Mareykanka ayaa siinaya abaalmarin dhan 15 milyan oo dollar ciddii keenta xog ku saabsan saddex sarkaal oo sare oo ka tirsan ciidamada cirka iyo hawada sare ee Ilaalada Kacaanka Iran.

    Magacyada waxaa ka mid ah Sareeye Guuto Cabdullah Mehrabi, oo madax ka ah waaxda cilmi-baarista iyo isku-filnaanshaha ee ciidamada cirka iyo hawada sare ee Ilaalada Kacaanka.

    Qofka labaad waa Axmad Jafarabadi, oo lagu sheegay inuu yahay sarkaal sare oo mas’uul ka ah hawlgallada ciidamadaas. Si kastaba, bayaanka Mareykanka ma caddaynayo in magacaasi uu ula jeedo Sareeye Guuto Ali Jafarabadi, oo ah taliyaha hawada sare ee ciidamada Ilaalada Kacaanka, ama qof kale.

    Magaca saddexaad waa Cali Asghar Norouzi, oo ah ku-xigeenka taliyaha u qaabilsan diyaar-garowga iyo taageerada ciidamada Ilaalada Kacaanka.

    Mareykanka ayaa sidoo kale Talaadadii cunaqabateyn saaray 10 qof iyo hay’ado uu sheegay inay xiriir la leeyihiin Wasaaradda Difaaca Iran.

    Tallaabooyinkan ayaa yimid xilli Mareykanku uu sii kordhinayo cunaqabateynta Iran, oo ay ku jiraan tallaabooyin lagu xaddidayo duulimaadyada caalamiga ah ee shirkadaha diyaaradaha Iran.