గ్యారీ సోబర్స్: 12 వేళ్లు, ఒకే ఓవర్లో 6 సిక్సులు, 365 పరుగుల రికార్డ్ ఇన్నింగ్స్, భారతీయ నటితో నిశ్చితార్థం.. ఈ క్రికెట్ దిగ్గజం జీవితంలో ఎన్నో విశేషాలు

వెస్టిండీస్ మాజీ ఆల్ రౌండర్ సర్ గార్‌ఫీల్డ్ సోబర్స్ (89) జులై 17న కన్నుమూశారు.

సోబర్స్ 1954 నుంచి 1974 మధ్య 93 టెస్ట్ మ్యాచ్‌లు ఆడారు. ఆయన 8,032 పరుగులు చేసి 235 వికెట్లు తీశారు. 1968లో, ఫస్ట్-క్లాస్ క్రికెట్‌లో ఒక ఓవర్‌లో ఆరు సిక్సర్లు కొట్టిన మొదటి ఆటగాడిగా సోబర్స్ నిలిచారు.

క్రికెట్ ప్రపంచపు గొప్ప ఆల్-రౌండర్ అయిన గ్యారీ సోబర్స్ తన రెండు చేతులకూ ఐదు వేళ్లతో పాటు ఒక బొటనవేలు అదనంగా ఉండడం చూసి ఏమాత్రం ఆందోళన చెందలేదు.

సోబర్స్ తన ఆత్మకథలోని మొదటి అధ్యాయంలో ఈ విషయాన్ని విపులంగా వివరించారు.

"నాకు అదనపు వేళ్లు ఉండటం వల్ల నేను అదృష్టవంతుడిని అయ్యానని చాలా మంది అంటారు. అది వాళ్ల అభిప్రాయం కావచ్చు. కానీ, నేను దాని గురించి ఎప్పుడూ పెద్దగా ఆలోచించలేదు. రెండు చేతులకు ఆరు వేళ్లు ఉండటం వల్ల నాకు ఎలాంటి సమస్యలు రాలేదు. నా పనికి కూడా ఆటంకం కలగలేదు.

వెస్టిండీస్‌లో ఇప్పటికీ అసాధారణ శారీరక లక్షణాలున్న చాలా మంది ఉన్నారు. నాలాగే రెండు చేతులకూ అదనపు వేళ్లు ఉన్న ఒక వెస్ట్ ఇండియన్ పౌరుణ్ని నేను స్వయంగా కలిశాను'' అని గ్యారీ సోబర్స్ రాశారు.

గ్యారీ సోబర్స్ ఈ రెండు అదనపు వేళ్లను జీవితాంతం అలాగే ఉంచుకోలేదు. తొమ్మిది లేదా పదేళ్ల వయసున్నప్పుడ, ఒక చేతి అదనపు వేలును పదునైన వస్తువుతో కోసేశారు. మరో చేతి అదనపు వేలును కూడా పదిహేనేళ్ల వయస్సులో పదునైన కత్తితో కోసేశారు.

క్రికెట్‌ను దగ్గరగా చూస్తూ...

సర్ గ్యారీ సోబర్స్ 1936 జులై 28న బ్రిడ్జ్‌టౌన్‌లో పుట్టారు. ఆయన తండ్రి కెనడియన్ మర్చంట్ నేవీలో పనిచేసేవారు. జర్మన్లు చేసిన దాడిలో తండ్రి ప్రయాణిస్తున్న నౌక మునిగిపోయినప్పుడు సోబర్స్‌ వయస్సు కేవలం ఐదేళ్లు.

సోబర్స్‌కు క్రికెట్ మొదట హాబీ, తర్వాత క్రమంగా మక్కువగా మారింది. ఎనిమిదేళ్ల వయసున్నప్పుడు బార్బడోస్‌లోని వాండరర్స్ గ్రౌండ్‌లో స్కోర్‌బోర్డ్‌ పర్యవేక్షించేవారు.

దీంతో ఫ్రాంక్ వారెల్, క్లైడ్ వాల్కాట్, ఎవర్టన్ వీక్స్ వంటి ఆ కాలంలోని గొప్ప క్రికెటర్ల ఆట దగ్గరగా చూసే అవకాశం లభించింది.

వాండరర్స్ మైదానంలోని ఇద్దరు గ్రౌండ్స్‌మెన్ ఫ్రాంక్ గ్రాంట్, బర్గెస్ గ్రాండిసన్‌లు సోబర్స్ కెరీర్‌ను బాగా ప్రభావితం చేశారు. ఆ మైదానాల్లో ఆడేందుకు అనుమతి ఇచ్చినందుకు ఆయన వారికి పిచ్‌లను సిద్ధం చేయడంలో సహాయపడేవారు.

గ్యారీ సోబర్స్ ప్రతిభను బర్గెస్ గుర్తించి ఆ విషయాన్ని వెస్టిండీస్ కెప్టెన్ డెన్నిస్ అట్కిన్సన్‌కు చెప్పగా ఆయన సోబర్స్‌కు తనతో కలిసి ప్రాక్టీస్ చేసే అవకాశం ఇచ్చారు.

ఇంగ్లిష్ కౌంటీ జట్టు నాటింగ్‌హామ్‌షైర్ తనతో ఒప్పందం కుదుర్చుకున్నప్పుడు గ్యారీ సోబర్స్ చాలా సంతోషించారు. ఒక సీజన్‌కు ఐదు వేల పౌండ్లు, ఉండేందుకు వసతి, ఒక కారు, బార్బడోస్‌కు ఒక విమాన టిక్కెట్ ఇస్తున్నారని, అంతకంటే మంచి అవకాశం ఇంకేముంటుందని భావించానని సోబర్స్ చెప్పారు.

1968కి ముందే తాను కౌంటీ క్రికెట్ ఆడి ఉండేవాణ్నని, అయితే కౌంటీ క్రికెట్‌కు అర్హత సాధించాలంటే రెండు సంవత్సరాలు ఇంగ్లండ్‌లోనే ఉండాలని, అలాగే తన దేశానికి ప్రాతినిధ్యం వహించకూడదనే నిబంధనను ఎట్టిపరిస్థితుల్లోనూ తాను అంగీకరించలేదని గ్యారీ సోబర్స్ చెప్పారు.

చివరి సిక్స్‌కు కనిపించకుండా పోయిన బంతి

సర్ గ్యారీ సోబర్స్ కౌంటీ క్రికెట్‌లో ఎన్నో అద్భుతమైన ఇన్నింగ్స్‌లు ఆడినప్పటికీ, తన తొలి సీజన్‌లోనే స్వాన్సీలో గ్లామోర్గాన్‌పై 76 పరుగులు చేసి అజేయంగా నిలవడం ఒక ప్రత్యేక కారణం వల్ల ఎప్పటికీ గుర్తుండిపోతుంది.

ఇదే ఇన్నింగ్స్‌లో సోబర్స్ ఒకే ఓవర్‌లో ఆరు సిక్సర్లు కొట్టారు. ఫస్ట్-క్లాస్ క్రికెట్ చరిత్రలో ఒక బ్యాట్స్‌మెన్ ఒక ఓవర్‌లోని ప్రతి బంతికీ సిక్సర్ కొట్టడం మునుపెన్నడూ జరగలేదు.

సోబర్స్ దూకుడుకు గురైన దురదృష్టవంతుడైన బౌలర్ ఎడమచేతి వాటం మీడియం పేసర్ మాల్కం నాష్. కానీ, ఆ మ్యాచ్‌లో స్పిన్ బౌలింగ్ చేయమని కెప్టెన్ టోనీ లూయిస్ అతణ్ని కోరారు.

సోబర్స్ కొట్టిన మొదటి సిక్సర్ డీప్ మిడ్‌వికెట్ బౌండరీ వైపు వెళ్లింది. రెండో సిక్సర్‌ను డీప్ స్క్వేర్ లెగ్ వైపు కొట్టారు. మూడో బంతిని సోబర్స్ స్ట్రెయిట్ సిక్సర్‌గా మలిచారు. నాలుగో బంతిని డీప్ ఫైన్ లెగ్ వైపు సిక్సర్‌‌గా పంపారు. ఐదో బంతికి లాంగ్ ఆఫ్ బౌండరీ వద్ద రోజర్ డేవిస్ క్యాచ్ అందుకున్నాక, బ్యాలెన్స్ కోల్పోయి బౌండరీ బయట పడిపోయారు. ఆ తర్వాత, చివరి బంతిని డీప్ స్క్వేర్ లెగ్ అవతలకి కొట్టి సోబర్స్ చరిత్ర సృష్టించారు.

ఆఖరి సిక్సర్‌కు బంతి మైదానం బయటకు వెళ్లింది. పదకొండేళ్ల రిచర్డ్ లూయిస్ దగ్గర్లోని ఒక తోటలో ఆ బంతిని కనుగొని క్రికెట్ వ్యాఖ్యాత వోల్ఫ్ వూలర్‌కు అందించారు. వూలర్ దానిని నాటింగ్‌హామ్‌షైర్ కౌంటీ కౌన్సిల్‌కు అందజేయగా అది నాటింగ్‌హామ్‌షైర్ కౌంటీ మ్యూజియంలో ఒక భాగంగా మారింది.

"నేను కొట్టిన ఆరు సిక్సర్ల వీడియో రికార్డింగ్ భద్రంగా ఉండడానికి ఒక ఆసక్తికరమైన కథ ఉంది. వోల్ఫ్ వూలర్ బీబీసీ టీవీ కోసం కామెంటరీ చెప్తున్నారు. నేను మొదటి సిక్సర్ కొట్టినప్పుడు మ్యాచ్‌ను ఇక రికార్డ్ చేయకుండా స్టూడియోకి తిరిగి వెళ్తున్నట్టు చెప్పాలని ప్రోగ్రామ్ ప్రొడ్యూసర్ ఆయనకు చెప్పారు. కానీ, ఆయన మరికొంత సమయం అడిగారు. నేను వరుసగా మూడో సిక్సర్ కొట్టినప్పుడు ఏది ఏమైనప్పటికీ ఈ మ్యాచ్ రికార్డ్ చేయాల్సిందేనని, స్టూడియోకి తిరిగి వెళ్లడం కుదరదని వూలర్ చెప్పారు."

"ఒకవేళ ఆ ఇన్నింగ్స్‌ను రికార్డ్ చేయకపోయి ఉంటే అది ప్రపంచంపై ఇంతటి ప్రభావం చూపేది కాదు. ముఖ్యంగా ఫీల్డర్ రోజర్ డేవిస్ బౌండరీ లైన్‌కు ఆవల పడిపోయినట్లు స్పష్టంగా కనిపించిన ఆ క్యాచ్ విషయంలో" అని సోబర్స్ అన్నారు.

365 పరుగుల రికార్డ్ ఇన్నింగ్స్

సోబర్స్ 1954లో టెస్టుల్లో అరంగేట్రం చేసినప్పటికీ తన తొలి టెస్ట్ సెంచరీ కోసం నాలుగేళ్లు వేచి ఉండాల్సి వచ్చింది. ఈ నిరీక్షణ కేవలం సెంచరీతో కాకుండా తన 17వ టెస్టులో ఏకంగా ట్రిపుల్ సెంచరీతో ముగిసింది.

సర్ గ్యారీ సోబర్స్ తన తొలి సెంచరీ సాధించడానికి చాలా సమయం తీసుకున్నారని విమర్శలు వినిపించేవి. కానీ, సోబర్స్ తన టెస్ట్ కెరీర్‌ను ఒక బౌలర్‌గా ప్రారంభించారనే విషయాన్ని వారు మర్చిపోయారు.

సోబర్స్ తన తొలి సెంచరీ చేసినప్పుడు అక్కడితో ఆగకుండా ఆ ఇన్నింగ్స్‌ను డబుల్ లేదా ట్రిపుల్ సెంచరీగా నమోదు చేస్తారని జట్టు మేనేజర్ బర్క్‌లే గాస్కిన్, క్రికెట్ వ్యాఖ్యాత రాయ్ లారెన్స్ అనేవారు. తర్వాత సరిగ్గా అదే జరిగింది.

1958లో పాకిస్తాన్‌తో జరిగిన కింగ్‌స్టన్ టెస్టులో సోబర్స్ 365 పరుగులతో నాటౌట్‌గా నిలిచి ఒక చిరస్మరణీయమైన ఇన్నింగ్స్‌తో, సర్ లిన్ హట్టన్ 364 పరుగుల ప్రపంచ రికార్డును బద్దలుకొట్టారు.

టెస్ట్ క్రికెట్‌లో సోబర్స్ నెలకొల్పిన అత్యధిక వ్యక్తిగత పరుగులు రికార్డు 36 సంవత్సరాల పాటు ఉండిపోయింది. బ్రియాన్ లారా 375 పరుగులతో దానిని బద్దలుకొట్టారు.

ఆ తర్వాత ఆస్ట్రేలియాకు చెందిన మాథ్యూ హేడెన్ 380 పరుగుల ఇన్నింగ్స్ ఆడితే, బ్రియాన్ లారా 400 పరుగులు చేసి మళ్లీ ఈ ప్రపంచ రికార్డును సొంతం చేసుకున్నారు. ఈ రికార్డు ఇప్పటికీ చెక్కుచెదరకుండా ఉంది.

"ఆ ఇన్నింగ్స్ సమయంలో రాత్రుళ్లు సరిగ్గా నిద్రపట్టేది కాదు. నేను ట్రిపుల్ సెంచరీ సాధించినప్పుడు ప్రపంచ రికార్డును బద్దలు కొట్టడానికి మరో 65 పరుగులు చేయాలని క్లైడ్ వాల్కాట్ నాతో చెప్పిన విషయం నాకు గుర్తుంది. నా కెరీర్‌లో మళ్లీ 300 పరుగులు చేసే అవకాశం రాకపోవచ్చని, ఎలాగైనా ప్రపంచ రికార్డు కోసం ప్రయత్నించాలని కూడా వాల్కాట్ చెప్పారు."

సోబర్స్ ఇన్నింగ్స్ గురించి పరస్పర విరుద్ధమైన కథనాలు ఉన్నాయి. సోబర్స్ రెండుసార్లు అవుటైనా అంపైర్ ఆయన్ను అవుట్‌గా ప్రకటించలేదని కూడా ఓ కథనం. 'గ్యారీ సోబర్స్ 334 పరుగుల వద్ద ఉన్నప్పుడు ఫజల్ మహమూద్ బౌలింగ్‌లో వికెట్ కీపర్ ఇంతియాజ్ అహ్మద్‌కు క్యాచ్ ఇచ్చి అవుటయ్యాడు. కానీ, అంపైర్ అవుట్‌గా ప్రకటించలేదు' అని అబ్దుల్ హఫీజ్ కర్దార్ రాసిన 'గ్రీన్ షాడోస్' అనే పుస్తకంలో ఉంది.

హనీఫ్ మొహమ్మద్ రాసిన ఆటోబయోగ్రఫీలో మరో విధంగా ఉంటుంది. సోబర్స్‌కు తన ఇన్నింగ్స్‌లో ఎలాంటి అవకాశాలు లభించలేదని స్పష్టంగా పేర్కొన్నారు. ఆ ఇన్నింగ్స్‌లో తాను అవుటయ్యే ప్రమాదం ఒక్కసారి మాత్రమే వచ్చిందని, ఖాన్ మొహమ్మద్ వేసిన బంతిని మిడ్‌వికెట్ వైపు ఆడి ఒక పరుగు కోసం వెళ్లినప్పుడు వకార్ హసన్ విసిరిన త్రో మరో ఎండ్‌కు వెళ్లడంతో తాను అదృష్టవంతుణ్ని అయ్యానని సోబర్స్ స్వయంగా చెప్పారు.

‘రెండు చేతులతోనూ బౌలింగ్ చేయొచ్చు’

ఈ ఇన్నింగ్స్‌లో గ్యారీ సోబర్స్ స్కోరు 363కి చేరినప్పుడు కెప్టెన్ అబ్దుల్ హఫీజ్ కర్దార్ బంతిని హనీఫ్ మొహమ్మద్‌కు అందించారు. సోబర్స్ మొదటి బంతికి సింగిల్ తీయగా, తర్వాతి బంతికి వాల్కాట్ సింగిల్ తీశారు.

అప్పుడు హనీఫ్ మొహమ్మద్ తాను ఎడమ చేతితో బౌలింగ్ చేయవచ్చా అని అంపైర్‌ను అడిగారు. అంపైర్ సోబర్స్‌ను అడగ్గా "నాకేం అభ్యంతరం ఉంటుంది? కావాలనుకుంటే హనీఫ్ మొహమ్మద్ రెండు చేతులతోనూ బౌలింగ్ చేయవచ్చు"అని సోబర్స్ నవ్వుతూ బదులిచ్చారు.

ఆ తర్వాత సోబర్స్ కవర్ పొజిషన్ వైపు ఆడి సింగిల్ తీసి సర్ లెన్ హట్టన్ 364 పరుగుల ప్రపంచ రికార్డును బద్దలుకొట్టారు.

సోబర్స్‌ను అభినందించడానికి వేలాది మంది ప్రేక్షకులు మైదానంలోకి ప్రవేశించడంతో ఆట సుమారు 20 నిమిషాల పాటు నిలిచిపోయింది. ప్రేక్షకుల వల్ల పిచ్‌లోని కొంత భాగం కూడా దెబ్బతింది. దానిని బాగుచేసే వరకు ఆడటానికి పాకిస్తాన్ జట్టు నిరాకరించింది.

సోబర్స్‌ను టార్గెట్ చేసిన పాకిస్తానీ అంపైర్లు

365 పరుగుల చిరస్మరణీయ ఇన్నింగ్స్ తర్వాత తాను పాకిస్తాన్‌కు వచ్చినప్పుడు పేలవమైన అంపైరింగ్‌ను ఎదుర్కోవలసి వచ్చిందని సర్ గ్యారీ సోబర్స్ తన ఆత్మకథలో ఆరోపించారు.

''కరాచీ టెస్టు తొలి ఇన్నింగ్స్‌లో ఫజల్ మహమూద్ కొట్టిన బంతి లెగ్ స్టంప్ బయట ప్యాడ్‌కు తగిలింది. కానీ, అంపైర్ నన్ను ఎల్బీడబ్ల్యూగా ప్రకటించారు.

నేను ఆశ్చర్యపోయాను, కానీ ఏమీ అనలేదు. ఆ తర్వాత రెండో ఇన్నింగ్స్‌లో ఫజల్ మహమూద్ వేసిన బంతి బ్యాట్ అంచుకు తగిలి లెగ్ స్లిప్‌లో ఉన్న ఇజాజ్ భట్ వైపు వెళ్లింది. అయితే, ఆ బంతి ఆయన చేతుల్లో పడకుండా ముందు నేలపై పడింది. ఫజల్ మహమూద్ అప్పీల్ చేయగా అంపైర్ వేలు ఎత్తారు. ఆ సమయంలో నేను చాలా ఆశ్చర్యపోయాను. నేను ఇజాజ్ వైపు చూశాను. ఆయన నన్ను 'ఏమైంది?' అని అడిగారు. నేను క్యాచ్ ఇవ్వలేదని మా ఇద్దరికీ తెలుసు. ఆ నిర్ణయం ఎల్బీడబ్ల్యూ మాత్రమే అయి ఉండాలి.

నేను ఇలా అవుట్ అయిన తర్వాత నాన్-స్ట్రైక్ ఎండ్‌లో నిలబడి ఉన్న కోల స్మిత్, ఫజల్ మహమూద్‌తో కోపంగా ఏదో అన్నట్టు నాకు గుర్తుంది. నేను వెస్టిండీస్‌కు తిరిగి వెళ్లాలనుకున్నందున డ్రెస్సింగ్ రూమ్‌లోకి వచ్చి నా బ్యాగ్‌ను సర్దుకోవడం ప్రారంభించాను.

ఇలా జరగబోతోందని వారికి ముందే తెలుసని పాకిస్తాన్ జట్టులోని కొంతమంది ఆటగాళ్లు నాకు చెప్పారు. నా కెరీర్‌లో ఇదే అత్యంత దారుణమైన అంపైరింగ్" అని గ్యారీ సోబర్స్ చెప్పారు.

ఈ సిరీస్‌లోని ఢాకా టెస్టు తొలి ఇన్నింగ్స్‌లో కూడా ఫజల్ మహమూద్ బౌలింగ్‌లో సోబర్స్ ఎల్బీడబ్ల్యూగా అవుటయ్యాడు.

ప్రాణస్నేహితుని మరణంతో కుంగిపోయి

సర్ గ్యారీ సోబర్స్, సహ క్రికెటర్ కోలీ స్మిత్‌ది ఒకే ఆత్మ, రెండు శరీరాలు లాంటి బంధం. వారి స్నేహం ఆదర్శప్రాయమైనది.

అందుకే రోడ్డు ప్రమాదంలో కోలీ స్మిత్ మరణించడం గ్యారీ సోబర్స్‌ను తీవ్రంగా కుంగదీసింది. ఎందుకంటే, ఆ ప్రమాదం జరిగిన సమయంలో సోబర్స్ కారు నడుపుతున్నారు.

1959 సెప్టెంబర్ 6న లాంకషైర్ లీగ్ మ్యాచ్ ఆడిన తర్వాత గ్యారీ సోబర్స్, కోలీ స్మిత్, మరో క్రికెటర్ టామ్ డ్యూడ్నీ కలిసి లండన్‌కు బయలుదేరినప్పుడు ఈ సంఘటన జరిగింది. అక్కడ వారు ఒక చారిటీ మ్యాచ్ ఆడాల్సి ఉంది. మొదట కోలీ స్మిత్ డ్రైవ్ చేయగా, ఆ తర్వాత సోబర్స్ స్టీరింగ్ అందుకున్నారు.

ఉదయంవేళ నాలుగు గంటల 45 నిమిషాలకు ఎదురుగా వస్తున్న పశువుల ట్రక్కు హెడ్‌లైట్ల వెలుగు అకస్మాత్తుగా సోబర్స్ కళ్లపై పడడంతో కారును నియంత్రించలేకపోయారు. కొద్దిసేపటి తర్వాత సోబర్స్‌కు స్పృహ వచ్చింది. తన ఇద్దరు సహచరులు కారు బయట పడి ఉండటం చూశారు. కోలీ స్మిత్‌ను "ఎలా ఉన్నావు లిటిల్ మ్యాన్" అని సోబర్స్ అడిగారు. దానికి అతను "నేను బాగానే ఉన్నాను. ముందు బిగ్ మ్యాన్ డ్యూడ్నీని చూడండి" అని కోలీ చెప్పారు.

ముగ్గురినీ అంబులెన్స్‌లో ఆసుపత్రికి తరలించారు. కోలీ స్మిత్ వెన్నెముక తీవ్రంగా దెబ్బతిన్నట్టు తెలిసి తాను దిగ్భ్రాంతికి గురయ్యానని సోబర్స్ చెప్పారు. మూడు రోజుల తర్వాత కోలీ స్మిత్ మరణించారు.

ఆ ప్రమాదంతో సోబర్స్ ఎంతగానో కుంగిపోయారు. దాని నుంచి కోలుకోవడానికి ఆయనకు చాలా కాలం పట్టింది. ఈ సమయంలో సోబర్స్ విపరీతంగా మద్యం తాగడం మొదలుపెట్టి తన ప్రాణ స్నేహితుడి మరణానికి తనను తాను నిందించుకునేవారు.

భారతీయ నటితో నిశ్చితార్థం

1966లో వెస్టిండీస్ జట్టు భారత పర్యటన సందర్భంగా గ్యారీ సోబర్స్‌కు నటి అంజూ మహేంద్రుతో పరిచయం ఏర్పడింది. తర్వాత ఆ పరిచయం ప్రేమగా మారింది. వారు నిశ్చితార్థం కూడా చేసుకున్నారు.

నిశ్చితార్థ వేడుకకు ఐదు వందల మందికి పైగా హాజరవడంతో అది మీడియాలో పెద్ద వార్తగా నిలిచింది.

"ఆ సమయంలో నా కెరీర్ అత్యుత్తమ స్థాయిలో ఉంది. భారత్‌లో క్రికెటర్ మన్సూర్ అలీ ఖాన్ పటౌడీ, నటి షర్మిలా ఠాగూర్‌ల వివాహం అనే ఒక ఉదాహరణ అందరిముందుంది.

పెళ్లి కోసం నేను అంజూను లండన్‌ తీసుకెళ్లాలనుకున్నాను. కానీ, కొన్ని సమస్యలు తలెత్తాయి. మా మధ్య ఉన్న దూరమే అతిపెద్ద అడ్డంకిగా మారింది.

ఆమె నాతో పాటు ఇంగ్లండ్ రాలేకపోయింది. దాంతో ఈ నిశ్చితార్థం నిలవదని నాకు అర్థమైంది. కొన్ని సంవత్సరాల తర్వాత ఆస్ట్రేలియాకు చెందిన ప్రొఫెసర్ కిర్బీ అనే అమ్మాయితో నిశ్చితార్థం చేసుకునేముందు నేను అంజూ మహేంద్రుకు ఫోన్ చేసి ఆమె అనుమతి తీసుకోవలసి వచ్చింది.

ఆమె అందుకు అంగీకరించినప్పటికీ, నేను తన కుటుంబంలో భాగం కాలేకపోతున్నందుకు ఆమె చాలా బాధపడినట్లు తర్వాత నాకు తెలిసింది'' అని గ్యారీ సోబర్స్ చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)