لائیو, سپریم کورٹ کا عمران خان کو ہسپتال منتقل کرنے کا حکم، حکومت کی فیصلے پر ’من و عن‘ عمل کرنے کی یقین دہانی

لائیو کوریج

1. 7 منٹ قبلآبنائے ہرمز کے بارے میں ٹرمپ کی ’غلط فہمی‘ جلد دور ہو جائے گی: ایرانی نائب وزیر خارجہ

   

   ،تصویر کا ذریعہGetty Images

   ایران کے نائب وزیرِ خارجہ کاظم غریب آبادی نے امریکی صدر کی جانب سے آبنائے ہرمز کی ایک تصویر شائع کیے جانے پر ردِعمل دیا ہے، جس پر امریکی صدر نے ’نیو یو ایس ٹریٹری‘ (نئی امریکی سرزمین) لکھا تھا۔

   غریب آبادی نے سوشل میڈیا پلیٹ فارم ایکس پر ایک پوسٹ میں لکھا کہ آبنائے ہرمز کے بارے میں ٹرمپ کی ’غلط فہمیً جلد دور ہو جائے گی۔

   انہوں نے مزید لکھا: ’جلد ہی آبنائے ہرمز کے بارے میں ٹرمپ کی غلط فہمی یا تو خود بخود دور ہو جائے گی یا پھر ہم اس گمراہ کن سوچ رکھنے والے شخص کی غلط فہمی دور کر دیں گے۔‘

   ڈونلڈ ٹرمپ نے یہ تصویر اپنے سوشل میڈیا پلیٹ فارم ٹروتھ سوشل پر شیئر کی تھی، جس میں آبنائے ہرمز، ایران کے بعض حصے، خلیج فارس اور خلیج عمان کا نقشہ دکھایا گیا تھا۔

2. 37 منٹ قبلثالث ممالک آبنائے ہرمز سے متعلق معاہدے کے بعد ایران اور امریکہ کو دوبارہ مذاکرات پر آمادہ کرنے کی کوشش کریں گے: قطر

   

   ،تصویر کا ذریعہGetty Images

   قطر کی وزارتِ خارجہ کے ترجمان ماجد الانصاری نے ایک پریس کانفرنس کے دوران کہا ہے کہ ایران اور امریکہ کے درمیان ثالثی کرنے والے ممالک آبنائے ہرمز سے متعلق ایران اور عمان کے درمیان معاہدے کے اعلان کا اعلان کر رہے ہیں۔

   ماجد الانصاری کے مطابق اس معاہدے کے بعد ہی واشنگٹن اور تہران کو جنگ کے خاتمے کے لیے مذاکرات دوبارہ شروع کرنے پر آمادہ کرنے کی کوشش کی جائے گی۔

   قطر کی وزارتِ خارجہ کے مطابق ایرانی پائلٹوں سے متعلق معاملے پر ایرانی وفد کو قطر آنے کی دعوت اب بھی برقرار ہے، تاہم تہران نے تاحال اس حوالے سے کوئی جواب نہیں دیا۔

   گذشتہ ہفتے ایران نے قطر پر الزام عائد کیا تھا کہ جنگ کے ابتدائی دنوں میں طیاروں کے گرنے کے بعد اس نے ایرانی فضائیہ کے تین پائلٹوں کو حراست میں رکھا ہوا ہے۔

   تاہم قطر نے ان الزامات کی دوٹوک تردید کی ہے۔

   ایک چوتھا پائلٹ حادثے میں ہلاک ہو گیا تھا۔ قطری حکام نے اس کی لاش برآمد کر کے ایران کے حوالے کر دی تھی۔

3. ایک گھنٹہ قبلعمران خان کی صحت سے متعلق سپریم کورٹ کے فیصلے پر ’من و عن‘ عمل ہوگا: وفاقی وزیر

   

   ،تصویر کا ذریعہMinistry of Parliamentary Affairs

   وزیر برائے پارلیمانی امور طارق فضل چوہدری نے سپریم کورٹ کے سابق وزیر اعظم عمران خان کو شفا ہسپتال منتقل کرنے کے فیصلے پر ردعمل دیتے ہوئے کہا ہے کہ ’اس فیصلے پر من و عن عمل‘ کیا جائے گا۔

   انھوں نے منگل کو سینیٹ میں پی ٹی آئی کے سینیٹرز کو مخاطب کرتے ہوئے کہا کہ عدالتیں ہی وہ واحد ذریعہ ہیں جن سے ان کی جماعت کے لیے ’کوئی راستہ بن سکتا ہے۔‘

   خیال رہے سپریم کورٹ کے تین رکنی بینچ نے عمران خان کو اسلام آباد میں واقع نجی ہسپتال شفا انٹرنیشل ہسپتال منتقل کرنے کا حکم دیا ہے۔

   عدالت کا کہنا ہے کہ کسی بھی ملزم کو صحت کے بارے میں بنیادی حق ہے۔

   عدالت نے عمران خان کی صحت کے بارے میں ایک میڈیکل بورڈ تشکیل دینے کا حکم بھی دیا ہے اور اس کے ساتھ ساتھ عدالت کا یہ بھی کہنا ہے کہ عمران خان کو ہسپتال منتقل کرنے کے بعد ان کے ذاتی معالج ڈاکٹر فیصل اور ان کی بہن عظمی خان بھی عمران خان کے ساتھ ہی ہوں گی۔

   سپریم کورٹ کا کہنا ہے کہ اس میڈیکل بورڈ میں عمران خان کے ذاتی معالج ڈاکٹر فیصل اور ڈاکٹر عظمی خان بھی شامل ہوں گے۔

4. 2 گھنٹے قبلمفاہمتی یادداشت میں درج شرائط پر عمل تک آبنائے ہرمز نہیں کھولی جائے گی: ایران

   

   ،تصویر کا ذریعہGetty Images

   ایران کی پارلیمنٹ کے سپیکر محمد باقر قالیباف نے ایک بار پھر کہا ہے کہ آبنائے ہرمز اس وقت تک نہیں کھولی جائے گی جب تک امریکہ مفاہمتی یادداشت میں طے شدہ شرائط پر عمل نہیں کرتا۔

   امریکہ کے ساتھ مذاکرات میں ایران کی مذاکراتی ٹیم کے سربراہی کرنے والے قالیباف نے تسلیم کیا کہ ’جنگ بندی اور ناکہ بندی کے خاتمے کے لیے مفاہمتی یادداشت سے حاصل ہونے والے موقع نے ایران کی معاشی مزاحمت بڑھانے اور اس کی دفاعی صلاحیتوں کی بحالی میں اہم کردار ادا کیا۔‘

   ’آبنائے ہرمز اس وقت تک نہیں کھولی جائے گی جب تک بحری ناکہ بندی ختم نہیں کی جاتی، منجمد اثاثے جاری نہیں کیے جاتے، تیل پر پابندیاں نہیں اٹھائی جاتیں، تمام محاذوں پر دھمکیوں اور فوجی کارروائیوں کا خاتمہ نہیں ہوتا اور مفاہمتی یادداشت کی دیگر شرائط پوری نہیں کی جاتیں۔‘

   گذشتہ روز ایرانی پاسدارانِ انقلاب نے بھی اسی نوعیت کا مؤقف اختیار کیا تھا۔

   پاسدارانِ انقلاب کے نائب سربراہ یداللہ جوانی کا کہنا تھا کہ ’جنگ کا خاتمہ اسلام آباد معاہدے کی بنیاد پر ہونا چاہیے اور آبنائے ہرمز اسی وقت کھولی جائے گی جب امریکی اس معاہدے کے تحت اپنی ذمہ داریاں پوری کریں گے۔‘

   گذشتہ روز اس مفاہمتی یادداشت میں درج 60 روزہ مدت بھی ختم ہو گئی، جو ایران اور امریکہ کے درمیان حتمی معاہدے تک پہنچنے کے لیے مقرر کی گئی تھی۔

   تاہم ایران اور امریکہ کے درمیان ایک نئے مرحلے کی کشیدگی اور جھڑپوں کے بعد دونوں فریق پہلے ہی اشارہ دے چکے تھے کہ وہ اس عمل کو عملاً ختم شدہ سمجھتے ہیں۔

   دوسری جانب ڈونلڈ ٹرمپ نے کہا ہے کہ وہ ایران کے ساتھ عبوری معاہدے میں توسیع کے خواہاں نہیں ہیں اور ان کے خیال میں تہران ایسے معاہدے کو قبول کرنے پر آمادہ نہیں ہوگا جسے وہ ضروری سمجھتے ہیں۔

5. 2 گھنٹے قبلحوثیوں کا سعودی عرب میں تیل کی تنصیبات کو نشانہ بنانے کا دعویٰ

   

   ،تصویر کا ذریعہGetty Images

   یمن میں حوثی گروہ انصار اللہ نے ایک بار پھر سعودی عرب کے علاقے جازان میں آرامکو کی تیل کی تنصیبات پر ڈرون حملے کرنے کا دعویٰ کیا ہے۔

   حوثیوں کے زیرِ انتظام خبر رساں ادارے سبا نیوز ایجنسی کے مطابق یہ حملہ فضائی حدود کی خلاف ورزی کے جواب میں کیا گیا ہے۔

   خبر ایجنسی نے ایک فوجی ذریعے کا حوالہ دیتے ہوئے رپورٹ کیا کہ حوثیوں نے یمن کے صوبوں صعدہ اور حجہ کی فضائی حدود کی مبینہ خلاف ورزی کے ردِعمل میں جازان میں واقع آرامکو کی تنصیبات کو متعدد ڈرونز کے ذریعے نشانہ بنایا۔

   ایران کے اتحادی حوثی گروہ نے سعودی عرب کی بحری ناکہ بندی کے جواب میں جوابی بحری ناکہ بندی کا اعلان کر رکھا ہے اور وہ بحیرۂ احمر میں سعودی تیل بردار جہازوں کے علاوہ یمنی حکومتی افواج کو بھی نشانہ بنا چکے ہیں۔

   حوثیوں نے اس سے قبل بھی متعدد بار سعودی عرب کے تیل کے بنیادی ڈھانچے اور ہوائی اڈوں پر حملے کیے ہیں۔

6. 3 گھنٹے قبلامید ہے متعلقہ ادارے سپریم کورٹ کے فیصلے پر عمل درآمد میں رکاوٹ نہیں ڈالیں گے: جنید اکبر

   

   ،تصویر کا ذریعہx.com/PTIofficial

   تحریک انصاف کے رہنما اور رکن پارلیمان جنید اکبر نے سپریم کورٹ کے فیصلے کو سراہتے ہوئے امید ظاہر کی ہے کہ ’حکومت اور متعلقہ ادارے اس پر عمل درآمد میں کسی قسم کی رکاوٹ پیدا نہیں کریں گے۔‘

   دیگر پارٹی رہنماؤں کے ہمراہ گفتگو کرتے ہوئے انھوں نے کہا کہ پاکستان تحریکِ انصاف یقینی بنائے گی کہ الشفا ہسپتال کے سامنے امن و امان کی صورتحال خراب نہ ہو۔

   انھوں نے کارکنان سے اپیل کی کہ وہ ذمہ داری اور نظم و ضبط کا مظاہرہ کرتے ہوئے پُر امن رویہ اختیار کریں۔

   ان کا کہنا تھا: ’یہ ہم سب کی ذمہ داری بنتی ہے کہ ہم اسلام آباد کی طرف یا الشفا ہسپتال کی طرف نہ آئیں، بلکہ گھروں پر رہ کر عمران خان کی صحت کے لیے دعا کریں۔‘

7. 3 گھنٹے قبلعمران خان کو ہسپتال منتقل کرنے کا حکم: سلمان اکرم راجہ نے عدالت سے وعدہ کیا ہے کہ ہسپتال کے ارد گرد پی ٹی آئی کے کارکن جمع نہیں ہوں گے، وزیرِ اعلیٰ خیبر پختونخوا

   سپریم کورٹ کی جانب سے سابق وزیرِ اعظم عمران خان کو ہسپتال منتقل کرنے اور میڈیکل بورڈ تشکیل دینے کے حکم کے بعد میڈیا سے بات کرتے ہوئے خیبر پختونخوا کے وزیرِ اعلیٰ اور پاکستان تحریکِ انصاف کے رہنما سہیل آفریدی کا کہنا ہے کہ ہمیں انصاف مل گیا۔

   ان کا کہنا تھا کہ عدالتوں کا کام انصاف دینا ہے، اگر عدالتیں انصاف نہیں دینگی تو عوام کہاں جائے گی؟

   وزیرِ اعلیٰ خیبر پختونخوا کا کہنا تھا کہ امید ہے سپریم کورٹ کے فیصلے پر جلد عملدرآمد ہوگا۔

   سہیل آفریدی کے مطابق پی ٹی آئی کے سیکرٹری جنرل سلمان اکرم راجہ نے وعدہ کیا ہے کہ ہسپتال کے ارد گرد پاکستان تحریک انصاف کا کوئی کارکن جمع نہیں ہوگا۔

   یاد رہے کہ سپریم کورٹ کے تین رکنی بینچ نے اپنے حکم میں پی ٹی آئی کو ہدایت کی تھی کہ عمران خان کی صحت پر سیاست نہ کی جائے۔

   عدالت کے باہر صحافیوں سے بات کرتے ہوئے سلمان اکرم راجہ کا کہنا تھا کہ آج عدالت عظمی سے روشنی کی ایک کرن پھوٹی ہے۔

   ان کا کہنا تھا کہ عدالت نے ریاست کے تمام اداروں کو حکم دیا ہے کہ عمران خان کی صحت مقدم ہے اور حکم دیا ہے کہ دو دنوں میں عمران خان کو اڈیالہ جیل سے شفا انٹرنیشنل ہسپتال منتقل کیا جائے۔

   ان کا کہنا تھا کہ ہم شکر ادا کرتے ہیں کہ یہ حکم ہوا جو ہم ایک سال سے مانگ رہے تھے۔

   ان کا مزید کہنا تھا کہ سپریم کورٹ نے شفا انٹرنیشنل ہسپتال میں ایک ماہر ڈاکٹرز کا بورڈ تشکیل دینے کا حکم بھی دیا ہے جس میں تمام شعبوں کے سپیشلسٹ شامل ہوں گے تاکہ یہ معلوم کیا جا سکے کہ عمران خان کو جو بلڈ پریشر کی بیماری بتائی جا رہی ہے وہ کیوں لاحق ہوئی؟عمران خان کی آنکھ میں کلاٹ کیوں آیا؟

   

   ،تصویر کا ذریعہPTI

8. 4 گھنٹے قبلسپریم کورٹ کا عمران خان کو ہسپتال منتقل کرنے کا حکم

   

   ،تصویر کا ذریعہAFP via Getty Images

   پاکستان کی سپریم کورٹ کے تین رکنی بینچ نے سابق وزیر اعظم اور پاکستان تحریک انصاف (پی ٹی آئی) کے بانی عمران خان کو اسلام آباد میں واقع نجی ہسپتال شفا انٹرنیشل ہسپتال منتقل کرنے کا حکم دیا ہے۔ عدالت کا کہنا ہے کہ کسی بھی ملزم کو صحت کے بارے میں بنیادی حق ہے۔

   عدالت نے عمران خان کی صحت کے بارے میں ایک میڈیکل بورڈ تشکیل دینے کا حکم بھی دیا ہے اور اس کے ساتھ ساتھ عدالت کا یہ بھی کہنا ہے کہ عمران خان کو ہسپتال منتقل کرنے کے بعد ان کے ذاتی معالج ڈاکٹر فیصل اور ان کی بہن عظمی خان بھی عمران خان کے ساتھ ہی ہوں گی۔

   سپریم کورٹ کا کہنا ہے کہ اس میڈیکل بورڈ میں عمران خان کے ذاتی معالج ڈاکٹر فیصل اور ڈاکٹر عظمی خان بھی شامل ہوں گے۔

   عدالت نے آئندہ سماعت پر عمران خان کی میڈیکل رپورٹ پیش کرنے کا بھی حکم دیا ہے۔

   سپریم کورٹ کے تین رکنی بینچ نے یہ حکم پاکستان تحریک انصاف کے جنرل سیکرٹری سلمان اکرم راجہ اور عمران خان کی بہن عظمی خان کی درخواستوں پر دیا ہے جنھوں نے سابق وزیر اعظم کی صحت اور ان کے ساتھ ملاقاتوں پر پابندی سے متعلق درخواستیں دائر کر رکھی تھیں۔

   جسٹس شاہد وحید کی سربراہی میں سپریم کورٹ کے تین رکنی بینچ نے اپنا حکم نامہ سناتے ہوئے کہا کہ سابق وزیر اعظم کی صحت کے بارے میں پی ٹی آئی کوئی سیاست نہیں کرے گی اور سابق وزیر اعظم اگلی سماعت تک ہسپتال میں ہی رہیں گے۔

   عدالت نے ان درخواستوں کی اگلی سماعت سولہ ستمبر مقرر کی ہے۔

   سپریم کورٹ نے اپنے حکم میں یہ بھی کہا ہے کہ عمران خان کے علاج پر اٹھنے والے تمام اخراجات ان کی فیملی ادا کرے گی۔

   عدالت نے اپنے حکم میں کہا ہے کہ عمران خان کو جب ہسپتال منتقل کیا جائے تو وہاں پر امن وامان کی صورت حال میں کوئی خلل پیدا نہیں ہونا چاہیے۔

   اس سے قبل اڈیالہ جیل کے سپرنٹنڈنٹ کی جانب سے سپریم کورٹ میں جمع کروائی گئی میڈیکل رپورٹ کے مطابق سابق وزیرِ اعظم عمران خان میں بے چینی اور گھبراہٹ کی ’شدید‘ علامات پائی گئی ہیں۔

   عمران خان کی میڈیکل رپورٹ میں کیا کہا گیا تھا؟

   عمران خان کی میڈیکل رپورٹ میں اینگزائٹی (بے چینی) کا لیول تھری پلس بیان کیا گیا ہے، جو انتہائی شدید سمجھا جاتا ہے۔

   رپورٹ میں یہ بھی کہا گیا ہے کہ سابق وزیر اعظم عمران خان کا آخری مرتبہ طبی معائنہ 10 اگست 2026 کو میڈیکل بورڈ نے کیا تھا اور اس میڈیکل بورڈ میں آنکھوں، امراضِ قلب اور میڈیسن کے ماہر ڈاکٹرز شامل تھے۔

   سپریم کورٹ میں جمع کروائی گئی رپورٹ کے مطابق سابق وزیر اعظم کی عمر تقریباً 73 سال ہے اور طبی معائنے کے دوران عمران خان کا بلڈ پریشر 140/80 جبکہ نبض 54 فی منٹ ریکارڈ ہوئی۔ اس رپورٹ میں سابق وزیر اعظم کی ای سی جی نارمل، سینہ صاف اور دل کے والوز و چیمبرز نارمل قرار دیے گئے۔

   رپورٹ میں یہ بھی کہا گیا ہے کہ عمران خان نے سر میں بوجھل پن اور دل کی دھڑکن تیز محسوس ہونے کی شکایت کی، تاہم میڈیکل رپورٹ کے مطابق سینے میں درد، بھاری پن یا سانس پھولنے کی شکایت نہیں۔

   رپورٹ میں اس بات کا بھی ذکر کیا گیا ہے کہ میڈیکل بورڈ نے بلڈ پریشر اور بے چینی پر قابو پانے کے لیے ادویات تجویز کی تھیں۔

9. 7 گھنٹے قبلآبنائے ہرمز سے نکلتے ہوئے جہاز پر حملے کی اطلاع، عملے کا ایک رکن ہلاک: برطانوی میری ٹائم ٹریڈ آپریشنز

   

   ،تصویر کا ذریعہUKMTO

   برطانوی میری ٹائم ٹریڈ آپریشنز (یو کے ایم ٹی او) کا کہنا ہے کہ اسے اطلاع ملی ہے کہ آبنائے ہرمز سے نکلتے ہوئے ایک جہاز کو نامعلوم نوعیت کے ایک پروجیکٹائل سے نشانہ بنایا گیا ہے۔

   یو کے ایم ٹی او کے مطابق اس واقعے میں عملے کا ایک رکن ہلاک جبکہ جہاز کے انجن روم کو نقصان پہنچا ہے۔

   رپورٹ میں کہا گیا ہے کہ عمانی کوسٹ گارڈ اس وقت جہاز کے باقی عملے کو بچانے کی کوششوں میں مصروف ہے۔

   برطانوی میری ٹائم ٹریڈ آپریشنز کے مطابق اس واقعے کے نتیجے میں ماحولیاتی نقصان کی کوئی اطلاع نہیں ملی، جبکہ حکام تحقیقات کر رہے ہیں۔

   یہ واقعہ ایسے وقت پیش آیا ہے جب آبنائے ہرمز میں جہاز رانی شدید متاثر ہے اور وہاں سے گزرنے والے جہازوں کی تعداد کم ہو کر چند ایک رہ گئی ہے۔ امریکہ اور اسرائیل کی جانب سے ایران کے خلاف جنگ شروع ہونے سے پہلے یہ تعداد روزانہ 130 سے زیادہ تھی۔

10. 9 گھنٹے قبلایران اور امریکہ کے درمیان کشیدگی کم کرنے کے لیے ترکی کردار ادا کرنے کو تیار ہے: اردوغان کی ٹرمپ کو پیشکش

    

    ،تصویر کا ذریعہNurPhoto via Getty Images

    ترکی کے صدر رجب طیب اردوغان نے امریکی صدر ڈونلڈ ٹرمپ کے ساتھ ٹیلیفونک گفتگو کے دوران ایران اور امریکہ کے درمیان کشیدگی کم کرنے کے لیے مذاکرات جاری رکھنے پر زور دیا ہے اور کہا ہے کہ ترکی اس حوالے سے اپنا کردار ادا کرنے کے لیے تیار ہے۔

    بی بی سی فارسی کے مطابق ترک ایوانِ صدر کی جانب سے جاری بیان میں کہا گیا ہے کہ اس ٹیلیفونک گفتگو کے دوران رجب طیب اردوغان نے امن کی کوششوں میں انقرہ کی حمایت اور تعاون کی آمادگی کا اظہار کیا۔

    امریکی صدر کے ایلچی جیرڈ کشنر نے کہا ہے کہ ایران اور امریکہ کے درمیان مذاکرات سنجیدہ اور وسیع پیمانے پر جاری ہیں۔ تاہم فریقین ابھی تک کسی باہمی مفاہمت تک نہیں پہنچ سکے۔

    فاکس نیوز کو دیے گئے انٹرویو میں کشنر کا کہنا تھا کہ امریکہ اور ایرانی حکومت کے مختلف اداروں کے درمیان مذاکرات شاید پہلے سے زیادہ مضبوط ہیں، لیکن دونوں جانب ابھی تک کسی اتفاقِ رائے یا مفاہمت تک رسائی حاصل نہیں ہو سکی۔

11. 18 اگست 2026ایران اور امریکہ کے درمیان مذاکرات سنجیدہ اور وسیع ہیں، لیکن ابھی کوئی مفاہمت نہیں ہوئی: جیرڈ کشنر

    

    ،تصویر کا ذریعہGetty Images

    امریکی صدر کے ایلچی جیرڈ کشنر نے کہا ہے کہ ایران اور امریکہ کے درمیان مذاکرات سنجیدہ اور وسیع پیمانے پر جاری ہیں۔ تاہم فریقین ابھی تک کسی باہمی مفاہمت تک نہیں پہنچ سکے۔

    فاکس نیوز کو دیے گئے انٹرویو میں کشنر کا کہنا تھا کہ امریکہ اور ایرانی حکومت کے مختلف اداروں کے درمیان مذاکرات شاید پہلے سے زیادہ مضبوط ہیں، لیکن دونوں جانب ابھی تک کسی اتفاقِ رائے یا مفاہمت تک رسائی حاصل نہیں ہو سکی۔

    جیرڈ کشنر جو غزہ کے لیے ایک امن منصوبے کو آگے بڑھانے کے سلسلے میں مشرقِ وسطیٰ کے دورے پر ہیں، نے اسرائیلی وزیرِ اعظم نیتن یاہو کے ساتھ طویل مذاکرات کیے ہیں، تاہم بظاہر ان بات چیت میں خاطر خواہ پیش رفت نہیں ہو سکی۔

    اسرائیل پہنچنے سے قبل اُنھوں نے مصر میں حماس کے ایک وفد سے بھی ملاقات کی تھی۔

12. 18 اگست 2026ترک وزیرِ خارجہ کی آبنائے ہرمز کھولنے سے متعلق ایرانی وزیرِ خارجہ سے مشاورت

    

    ،تصویر کا ذریعہGetty Images

    ترک وزیر خارجہ خاقان فیدان نے پیر کے روز اپنے ایرانی ہم منصب عباس عراقچی کے ساتھ ٹیلی فون پر گفتگو کے دوران آبنائے ہرمز کو کھولنے اور ایران اور امریکہ کے درمیان جنگ بندی کے تسلسل کو یقینی بنانے کی کوششوں پر تبادلہ خیال کیا ہے۔

    تاہم ترک سفارتی ذرائع نے اس ٹیلی فونک گفتگو کی مزید تفصیلات فراہم کرنے سے گریز کیا ہے۔

    اس سے قبل ایران کے ایک اعلیٰ عہدیدار نے خبر رساں ادارے ’رائٹرز‘ کو بتایا تھا کہ تہران نے امریکہ کے ساتھ جنگ ​​کے مستقل خاتمے کے معاہدے تک پہنچنے کی کوششوں میں تعطل کے باعث اپنی پالیسی کو دفاعی سے تبدیل کر کے ’مکمل جارحانہ‘ کرنے کا فیصلہ کیا ہے۔

    عہدیدار کے مطابق امن مذاکرات اور سٹریٹجک آبنائے ہرمز کے راستے آئل ٹینکروں کی آمدورفت بحال کرنے کی کوششیں عملی طور پر تعطل کا شکار ہو گئی ہیں۔

13. 17 اگست 2026پاکستان نے انڈین وزیرِ داخلہ کا ’آئی ایس آئی کا حمایت یافتہ نیٹ ورک‘ تباہ کرنے کا دعویٰ مسترد کر دیا

    

    ،تصویر کا ذریعہGetty Images

    پاکستان نے انڈیا کے وزیرِ داخلہ کے اُن دعوؤں کو مسترد کیا ہے جس میں اُنھوں نے کہا تھا کہ یومِ آزادی سے قبل پاکستان کی خفیہ ایجنسی آئی ایس آئی کے حمایت یافتہ دہشت گروپ شہزاد بھٹی نیٹ ورک کو تباہ کر دیا گیا ہے۔

    پیر کو پاکستانی وزارتِ خارجہ کی جانب سے جاری کیے گئے بیان میں کہا گیا ہے کہ پاکستان انڈیا کے وزیرِ داخلہ کی جانب سے لگائے گئے ان الزامات کو سختی سے مسترد کرتا ہے جن میں پاکستان کو انڈیا میں ہونے والی کچھ گرفتاریوں سے جوڑنے کی کوشش کی گئی ہے۔

    وزارتِ خارجہ کے بیان میں کہا گیا ہے کہ اس قسم کا پروپیگنڈا پاکستان کے خلاف انڈیا کی اس مذموم مہم کا ایک اور ثبوت ہے جس کا مقصد اپنی داخلی سکیورٹی کے چیلنجوں سے توجہ ہٹانا اور محض تنگ نظر ملکی سیاسی مفادات کے حصول کے لیے پاکستان کو موردِ الزام ٹھہرانا ہے۔

    بیان میں کہا گیا ہے کہ اپنے ملک کے اندر انڈیا ایک جابر ریاست ہے جو اپنی اقلیتوں پر وحشیانہ مظالم ڈھاتی ہے اور اختلافِ رائے کی آواز کو دبا دیتی ہے۔ بیرونی محاذ پر، انڈیا دہشت گردی کو فروغ دے رہا ہے اور دہشت گردوں کی معاونت کر رہا ہے۔

    پاکستانی وزارت خارجہ کے بیان میں مزید کہا گیا ہے کہ انڈیا کی بے بنیاد اور گمراہ کن باتیں بین الاقوامی توجہ کو انڈیا کی ریاستی سرپرستی میں ہونے والی دہشت گردی، ٹارگٹ کلنگ اور غیر ملکی علاقوں میں تخریبی کارروائیوں سے نہیں ہٹا سکتیں۔

    بیان میں کہا گیا ہے کہ پاکستان نے بارہا دہشت گردی اور پاکستان میں عدم استحکام پیدا کرنے والی سرگرمیوں میں انڈیا کے ملوث ہونے کے ثبوت فراہم کیے ہیں۔

    وزارتِ خارجہ کے بیان میں کہا گیا ہے کہ پاکستان عالمی برادری پر زور دیتا ہے کہ وہ انڈیا کے بے بنیاد الزامات کو مسترد کرے اور خطے میں ریاستی سرپرستی میں کی جانے والی دہشت گردی پر انڈیا کا احتساب کرے۔

    انڈیا وزیرِ داخلہ امت شاہ نے پیر کو ایک بیان میں کہا تھا کہ انڈین سکیورٹی فورسز نے 14 ریاستوں میں مختلف مقامات پر مربوط کارروائیوں کا آغاز کرکے دہشت گردی کے خلاف انڈیا کی زیرو ٹالرنس پالیسی کی ایک شاندار مثال کو برقرار رکھتے ہوئے نیٹ ورک کو توڑ دیا۔

    اُنھوں نے الزام لگایا کہ نیٹ ورک کے قبضے سے پاکستان آرڈیننس فیکٹری کے نشانات والے دستی بم، پستول، کارتوس اور جاسوسی کے لیے استعمال ہونے والے سی سی ٹی وی کیمرے بھی برآمد ہوئے ہیں۔

14. 17 اگست 2026امریکی افواج نے ایران کی بحری ناکہ بندی کے باعث 64 تجارتی جہازوں کا رخ موڑ دیا: امریکی سینٹرل کمانڈ کا دعویٰ

    امریکی سینٹرل کمانڈ (سینٹکام) کا کہنا ہے کہ اس کی افواج نے اب تک ایران کی بحری ناکہ بندی کے دوران 64 تجارتی جہازوں کا رُخ موڑ دیا ہے۔

    سینٹ کام کے مطابق 17 اگست کو امریکی افواج نے تین تجارتی جہازوں کو سفر سے روک جبکہ دو دیگر جہازوں کا معائنہ کیا تاکہ ضابطوں اور پابندیوں کی تعمیل کو یقینی بنایا جا سکے۔

    حال ہی میں یہ بھی رپورٹ کیا گیا تھا کہ امریکی طیارہ بردار بحری جہاز یو ایس ایس جارج واشنگٹن جلد ہی مشرقِ وسطیٰ میں یو ایس ایس ابراہم لنکن کی جگہ لے گا۔

    یو ایس ایس ابراہم لنکن 250 دن سے زائد عرصے سے مشن پر تعینات ہے اور اس کی طویل مدت کی تعیناتی کے ساتھ بندرگاہوں پر محدود قیام نے بعض قانون سازوں میں عملے کی رہائشی اور فلاحی صورتحال کے بارے میں تشویش پیدا کر دی ہے۔

15. 17 اگست 2026عدالتی کمیشن نے زیارت حملے میں 31 پولیس اہلکاروں کی ہلاکت کی انکوائری شروع کردی, محمد کاظم، بی بی سی اردو، کوئٹہ

    بلوچستان کے ضلع زیارت میں شدت پسندوں کے حملے میں31 پولیس اہلکاروں کی ہلاکت کے واقعے کی تحقیقات کے لیے قائم عدالتی انکوائری کمیشن نے کام شروع کردیا ہے۔

    عدالتی انکوائری کمیشن کے لیے بلوچستان ہائیکورٹ کے جج جسٹس محمد عامر رانا کو مقرر کیا گیا ہے۔

    کمیشن نے ان تمام افراد کو جو بطور گواہ پیش ہونا چاہتے ہیں یا کوئی دستاویز پیش کرنا چاہتے ہیں کہا ہے کہ وہ اس مقصد کے لیے 28 اگست تک ہائیکورٹ میں واقع کمیشن کے دفتر میں اپنے ناموں کا اندراج کرائیں۔

    خیال رہے کہ رواں سال جولائی کے اوائل میں ضلع زیارت میں مانگی کے علاقے مانگی ڈیم کے پمپنگ اسٹیشن کے سائٹ پر حملہ کیا گیا تھا جس میں 9 پولیس اہلکار موقع پر مارے گئے تھے جبکہ باقی اہلکاروں کو اغوا کے بعد قتل کیا گیا تھا۔

    اس واقعے کے خلاف مارے جانے والے اہلکاروں کے لواحقین اور سیاسی جماعتوں کے کارکنوں نے دس روز تک کوئٹہ میں دھرنا دیا تھا۔ دھرنے کے شرکاء کا ایک اہم مطالبہ یہ تھا کہ واقعے کا عدالتی کمیشن کے زریعے تحقیقات کرائی جائے۔

    عدالتی انکوائری کمیشن کے ٹرمز آف ریفرینس کیا ہیں؟

    عدالتی انکوائری کمیشن کے مندرجہ ذیل ٹرمز آف ریفرینس کے تحت تحقیقات کرے گی۔

    • مانگی ڈیم پمپنگ اسٹیشن پر پولیس اہلکاروں کی تعیناتی کا باعث بننے والے حقائق و حالات کی انکوائری کر کے تعین کرنا کہ مذکورہ تنصیب کی سکیورٹی کی ذمہ داری، ان پولیس اہلکاروں کو کس طریقہ کار کے تحت اور کن بنیادوں پر سونپی گئی؟
    • یہ تعین کرنا کہ آیا سابق لیویز فورس کے اہلکار،محدود اسلحہ و ہتھیاروں کے استعمال کے ساتھ کائونٹر انسرجنسی یا دہشت گردانہ حملوں سے نمٹنے کے لیے مناسب طور پر تربیت یافتہ تھے یا نہیں، اور ان کو ایسے حساس اور پُرخطر آپریشن کے لیے محدود وسائل کے ساتھ کیوں تعینات کیا گیا تھا؟
    • اس امر کی تحقیق کرنا کہ آیا مانگی ڈیم پمپنگ سٹیشن پر تعینات پولیس اہلکاروں کو خاطر خواہ اسلحہ، گولہ بارود اور اضافی کمک اور نفری فرا ہم کی گئی تھی یا نہیں؟ اور اگر نہیں کی گئی تھی تو اس کوتاہی کے ذمہ داروں کا تعین کرنا۔
    • یہ معلوم کرنا کہ آیا تعینات اہلکاروں کو اسلحہ، گولہ بارود اور اضافی نفری سمیت مطلوبہ رسدی معاونت مناسب مقدار میں اور بروقت فراہم کی گئی تھیں یا نہیں؟ اور اگر ایسا نہیں ہوا تو اس کی کمی اور کوتاہی کے جواز کی معقولیت اور اس کے ذمہ داروں کا تعین کرنا۔
    • ذمہ دار ضلعی انتظامیہ اور دیگر سیکورٹی اداروں /محکموں کے خلاف قانونی کاروائی کی سفارش کرنا، اور اس امر کو یقینی بنانا کہ اگر کوئی شخص قصوروار پایا جائے تو حکومت متعلقہ ذمہ داران کے خلاف تحقیقاتی کمیشن کی سفارشات پر عمل درآمد کرے۔
    • تحقیقاتی کمیشن کو ضابطہ فوجداری اور دیگر متعلقہ قوانین کے تحت تحقیق کرنے کے مکمل اختیارات حاصل ہوں گے، جیسا کہ عینی شاہدین کے بیانات قلم بند کرنا، جائے وقوعہ کا معائنہ، جیو فینسنگ، ملائی گئی ٹیلیفون ، موبائل کالز کی تفصیلی ریکارڈ حاصل کرنا وغیرہ۔
    • تحقیقاتی کمیشن کی کاروائی، کمیشن کی صوابدید کے مطابق انجام دی جائے گی، اور کمیشن ایسے عام افراد کو، جو واقعہ / حملے کے حقائق سے واقف ہوں، اپنے سامنے پیش ہو کر گواہی / بیان قلم بند کرانے کے لیے طلب یا مدعو کرسکے گا۔
    • مستقبل میں ایسے واقعات کے دوبارہ رونما ہونے کی روک تھام ،اہم اور حساس تنصیبات کے تحفظ، ہنگامی رد عمل کے طریقہ کار، سیکورٹی آلات اور دیگر متعلقہ اقدامات کو مزید موثر اور مضبوط بنانے کے لیے، اگر ضروری ہو، مناسب سفارشات پیش کرنا۔
    • مارے جانے والوں کے لواحقین کو یہ مکمل موقع فراہم کیا جائے گا کہ وہ متعلقہ حقائق کے بارے میں تحقیقاتی کمیشن کے روبرو پیش ہو کر اپنا موقف بیان کریں اور گواہی / بیان قلم بند کرائیں۔
    • واقعہ پیش آنے سے قبل سکیورٹی پلان اور سکیورٹی اہلکاروں کی تعیناتی کے ریکارڈ کو طلب کر کے اس کا جائزہ لینا، اور یہ تعیین کرنا کہ آیا دیگر قانون نافذ کرنے والے ادارے قریبی علاقوں میں تعینات ہونے کے باوجود مارے جانے والے پولیس اہلکاروں کو مناسب حفاظتی حصار یا معاونت فراہم کرنے سے قاصر رہے؟

16. 17 اگست 2026ایران کے معاملے پر رکاوٹ بننے کی صورت میں عمان پر بمباری کریں گے: ڈونلڈ ٹرمپ کی دھمکی

    

    ،تصویر کا ذریعہGetty Images

    فاکس نیوز کے مطابق امریکی صدر ڈونلڈ ٹرمپ نے دھمکی دی ہے کہ اگر عمان امریکہ کی انتظامیہ کی ایران کے ساتھ بات چیت میں ’رکاوٹ‘ بنا تو امریکہ اس پر بمباری کرے گا۔

    نیٹ ورک کے ایک رپورٹر کے مطابق صدر ٹرمپ نے پیر کے روز ایک فون کال کے دوران یہ بات کہی۔ اسی گفتگو میں انھوں نے یہ دعویٰ بھی کیا کہ امریکہ کا ایرانی پاسدارانِ انقلاب (آئی آر جی سی) کے ساتھ ایک براہِ راست خفیہ رابطہ موجود ہے۔

    بعد ازاں آئی آر جی سی نے اس دعوے کی تردید کرتے ہوئے کہا کہ وہ امریکہ کے ساتھ کسی قسم کی بات چیت میں شامل نہیں ہے۔ تاہم ایرانی حکام نے پیر کو کہا کہ آبنائے ہرمز میں جہاز رانی کے معاملے پر عمان کے ساتھ معاہدہ حتمی شکل کے قریب ہے۔

    دوسری جانب امریکہ اور ایران کے درمیان 60 روزہ مفاہمتی یادداشت (ایم او یو) بھی پیر کو ختم ہو رہی ہے۔ یہ یادداشت دونوں ممالک کی جانب سے حتمی معاہدے تک پہنچنے کے لیے مزید مذاکرات جاری رکھنے کے عزم پر مبنی تھی۔

    عمان، جو اس تنازع میں خود کو غیر جانبدار ملک قرار دیتا ہے، جنگ شروع ہونے کے بعد ایران کے متعدد حملوں کا سامنا کر چکا ہے۔ تاہم اب وہ آبنائے ہرمز کو دوبارہ کھولنے کے لیے ایران کے ساتھ مذاکرات میں کردار ادا کر رہا ہے۔

    فروری میں امریکہ اور اسرائیل کے ایران پر حملوں کے بعد تہران نے بڑی حد تک اس اہم آبی گزرگاہ کو بند کر رکھا ہے، جس سے دنیا کی تقریباً پانچواں حصہ تیل اور مائع قدرتی گیس گزرتی ہے۔ اس راستے کو دوبارہ کھولنا مذاکرات کا ایک اہم موضوع رہا ہے۔

    واشنگٹن بھی اس گزرگاہ کو دوبارہ کھولنے کے لیے اپنی کوششیں جاری رکھے ہوئے ہے۔ فاکس نیوز کے رپورٹر ٹرے ینگسٹ کے مطابق ٹرمپ نے کہا: ’اگر عمان راستے میں آیا تو ہم اس پر شدید بمباری کریں گے۔‘

    اسی انٹرویو میں ٹرمپ نے یہ بھی دعویٰ کیا تھا کہ امریکہ اور آئی آر جی سی کے درمیان خفیہ مذاکرات جاری ہیں، تاہم پاسدارانِ انقلاب کے ترجمان نے اس کی تردید کردی۔ آئی آر جی سی ایران میں ایک بڑی فوجی، سیاسی اور معاشی قوت سمجھی جاتی ہے۔

    ترجمان نے نیم سرکاری خبر رساں ادارے تسنیم سے گفتگو میں کہا ’آئی آر جی سی کے حکام اور امریکیوں کے درمیان کوئی مذاکرات نہیں ہو رہے۔ ٹرمپ کا یہ دعویٰ محض خیالی باتیں ہیں جو جنگ میں ناکامی اور بے بسی کے نتیجے میں پیدا ہونے والے وہم اور ڈراؤنے خوابوں کا نتیجہ ہیں۔‘

    ٹرمپ کی یہ دھمکی اُس وقت سامنے آئی جب ایران نے پیر کے روز اعلان کیا کہ آبنائے ہرمز سے جہازوں کی آمدورفت کے حوالے سے دونوں فریقوں کے درمیان ایک سمجھوتہ طے پا گیا ہے۔

    ایران کی وزارتِ خارجہ کے ترجمان اسماعیل بقائی نے تہران میں صحافیوں سے گفتگو کرتے ہوئے کہا ’آمدورفت کے راستے کے نقشے کے بارے میں ایک مفاہمت طے پا گئی ہے۔‘

17. 17 اگست 2026بریکنگ, ہمارا امریکہ سے کوئی رابطہ نہیں ہوا: پاسدارانِ انقلاب کی تردید

    پاسدارانِ انقلاب فورس نے ایران اور امریکہ کے درمیان کسی بھی قسم کے رابطے کی خبروں کو مسترد کر دیا ہے۔

    سپاہ کے ترجمان حسین محبی نے ڈونلڈ ٹرمپ کے اس بیان پر ردِعمل دیتے ہوئے، جس میں انھوں نے امریکہ اور پاسداران انقلاب فورس کے درمیان خفیہ رابطوں کی میڈیا رپورٹس کی تصدیق کی تھی۔

    انھوں نے کہا کہ ’ٹرمپ کا یہ دعویٰ جھوٹ ہے اور محض ایسی خیالی باتیں ہیں جو جنگ میں ناکامی اور بے بسی کے باعث پیدا ہونے والے وہم اور ڈراؤنے خوابوں کا نتیجہ ہیں۔‘

    بریگیڈیئر محبی نے خبر رساں ادارے تسنیم سے گفتگو میں کہا ’ٹرمپ ان بیانات کے ذریعے دنیا میں تیل اور توانائی کی قیمتوں کو عارضی طور پر قابو میں رکھنے کی کوشش کر رہے ہیں، لیکن ان کے پاس ایک ہی حقیقی راستہ ہے، اور وہ اپنی شکست تسلیم کرنا اور ایران کی مقرر کردہ شرائط کو ماننا ہے۔‘

18. 17 اگست 2026ڈونلڈ ٹرمپ نے ’امریکہ اور پاسداران انقلاب کے خفیہ رابطے‘ کی تصدیق کر دی

    

    ،تصویر کا ذریعہGetty Images

    امریکی میڈیا میں امریکہ اور پاسداران انقلاب کے درمیان خفیہ رابطوں کی خبروں کے بعد ڈونلڈ ٹرمپ نے ایسے رابطے ہونے کی تصدیق کر دی ہے۔

    امریکی صدر نے فاکس نیوز کو انٹرویو دیتے ہوئے سپاہِ پاسداران کے بارے میں کہا: ’وہ اچھے پوکر کھلاڑی ہیں، لیکن کمزور پڑ رہے ہیں۔‘

    اس سے پہلے امریکی خبر رساں ویب سائٹ اکسیوس نے باخبر ذرائع کے حوالے سے رپورٹ کیا تھا کہ ایران کے ساتھ مفاہمتی یادداشت پر دستخط ہونے سے تقریباً ایک ماہ پہلے، عراق کے کردستان ریجن کے صدر نچیروان بارزانی کی ثالثی میں امریکہ نے سپاہِ پاسداران سے رابطہ کیا تھا۔

    رپورٹ کے مطابق امریکہ یہ جاننا چاہتا تھا کہ آیا پاسدارانِ انقلاب فورس اور اس کی قیادت، محمد باقر قالیباف اور عباس عراقچی کی سربراہی میں مذاکرات کرنے والے ایرانی وفد کی حمایت کر رہی ہے یا نہیں۔ امریکہ یہ بھی معلوم کرنا چاہتا تھا کہ مذاکرات کے حوالے سے سپاہِ پاسداران کی کوئی الگ رائے یا مطالبات تو نہیں ہیں۔

    اکسیوس کے مطابق نچیروان بارزانی کی کوششوں سے آخرکار سپاہ کا ایک عہدیدار ایک خفیہ مواصلاتی نظام والے فون کے ساتھ اربیل میں بارزانی کے دفتر پہنچا۔ بعد ازاں کردستان ریجن کے صدر نے اسی فون کے ذریعے سپاہ کے کمانڈر احمد وحیدی سے بات کی۔

    رپورٹ کے مطابق احمد وحیدی نے اس گفتگو میں کہا کہ وہ ایرانی مذاکرات کاروں کی ’مکمل‘ حمایت کرتے ہیں۔

    اکسیوس نے تین ذرائع، جن میں ایک وائٹ ہاؤس کا عہدیدار بھی شامل تھا، کے حوالے سے دعویٰ کیا کہ احمد وحیدی سے بات چیت کے بعد نچیروان بارزانی نے ان کے خیالات امریکی حکام تک پہنچائے۔ تاہم اکسیوس نے اپنے ذرائع کے نام ظاہر نہیں کیے۔

    رپورٹ کے مطابق واشنگٹن یہ بھی چاہتا تھا کہ بارزانی اربیل میں امریکی اعلیٰ حکام اور ایرانی مذاکرات کاروں کے درمیان خفیہ ملاقات کا انتظام کریں، لیکن ایرانی فریق کے سکیورٹی خدشات کے باعث یہ ملاقات کبھی نہ ہو سکی۔

    دوسری جانب ایران کی وزارتِ خارجہ کے ترجمان اسماعیل بقائی نے ان خبروں کو مسترد کرتے ہوئے کہا: ’ایران اور امریکہ کے درمیان اربیل میں خفیہ ملاقات کی خبر مکمل طور پر من گھڑت ہے۔‘

19. 17 اگست 2026ڈی آر کانگو میں ایبولا وائرس ملکی تاریخ کی مہلک ترین وبا بن گیا

    

    ،تصویر کا ذریعہGetty Images

    عوامی صحت کے حکام کے مطابق جمہوریہ کانگو (ڈی آر کانگو) میں ایبولا کی وبا اب ملک کی تاریخ کی سب سے زیادہ جان لیوا وبا بن چکی ہے۔

    15 مئی کو وبا کے اعلان کے بعد سے اب تک 2,325 افراد وائرس کے باعث ہلاک ہو چکے ہیں، جو 2018 سے 2020 کے درمیان ہونے والی وبا میں ہونے والی اموات کی تعداد سے زیادہ ہے۔

    اقوام متحدہ کے انسانی امور کے سربراہ ٹام فلیچر نے گزشتہ ہفتے کہا تھا کہ یہ وبا پہلے ہی ریکارڈ پر موجود تیزی سے پھیلنے والی وبا بن چکی ہے، اور خبردار کیا تھا کہ ’یہ وبا ہر 30 منٹ میں ایک شخص کی جان لے رہی ہے۔‘

    اس وقت بنڈی بگیو قسم کے ایبولا وائرس کے خلاف کوئی منظور شدہ ویکسین دستیاب نہیں، جس نے موجودہ وبا کو جنم دیا ہے، تاہم کئی ویکسینز تیاری کے مراحل میں ہیں، جن میں ایک ایسی ویکسین بھی شامل ہے جو آسٹرازینیکا کی کووڈ-19 ویکسین کی تیاری میں استعمال ہونے والی ٹیکنالوجی پر مبنی ہے۔

    ڈی آر کانگو کے ادارۂ صحت عامہ نے اتوار کو بتایا کہ اب تک 4,945 تصدیق شدہ کیسز ریکارڈ کیے جا چکے ہیں، جن میں گذشتہ 24 گھنٹوں کے دوران سامنے آنے والے 101 کیسز بھی شامل ہیں۔

    ملک سے باہر نسبتاً کم کیسز سامنے آئے ہیں۔ 12 اگست تک پڑوسی ملک یوگنڈا میں 20 کیسز کی تصدیق ہوئی تھی، جبکہ جرمنی میں دو افراد کا علاج کیا گیا اور فرانس میں ایک کیس رپورٹ کیا گیا۔

    تاہم عالمی ادارۂ صحت کے مطابق ڈی آر کانگو میں وائرس کے پھیلاؤ کی رفتار، جہاں یہ 26 میں سے 6 صوبوں تک پھیل چکا ہے، ’غیر معمولی‘ رہی ہے۔

    رؤٹرز کے مطابق مغربی افریقہ میں 2014 سے 2016 کے دوران دنیا کی مہلک ترین ایبولا وبا کو ایک ہزار اموات تک پہنچنے میں تقریباً پانچ ماہ لگے تھے۔ موجودہ وبا صرف تین ماہ میں دو ہزار ہلاکتوں تک پہنچ گئی، اگرچہ محققین کا کہنا ہے کہ امکان ہے کہ یہ وائرس فروری سے ہی بغیر شناخت ہوئے پھیل رہا تھا۔

    

    ،تصویر کا ذریعہGetty Images

    عالمی ادارۂ صحت (ڈبلیو ایچ او) نے کہا ہے کہ اسے امید ہے کہ وہ تین ماہ کے اندر بیماری کے پھیلاؤ کو روکنے میں کامیاب ہو جائے گا، تاہم اس نے خبردار کیا کہ اس کا مطلب صرف وائرس کی منتقلی کو قابو میں لانا ہے، نہ کہ وبا کا مکمل خاتمہ۔

    ایبولا ایک نایاب لیکن مہلک وائرل بیماری ہے، جبکہ بنڈی بگیو قسم اس سے بھی زیادہ نایاب ہے اور اس سے قبل اس کے صرف دو معلوم وبائی پھیلاؤ ریکارڈ کیے گئے ہیں۔

    ایبولا کی علامات، جو فلو یا ملیریا سے ملتی جلتی ہیں، میں بخار، سر درد اور شدید تھکن شامل ہیں، اور یہ علامات انفیکشن کے دو سے اکیس دن کے اندر اچانک ظاہر ہو سکتی ہیں۔

    بیماری کے بڑھنے کے ساتھ قے اور اسہال کی شکایت پیدا ہو سکتی ہے، جو بالآخر اعضا کے ناکارہ ہونے کا سبب بن سکتی ہے۔ خون یا قے جیسے متاثرہ جسمانی سیالات کے ساتھ رابطے سے وائرس پھیلتا ہے۔

    برطانیہ کے ادویات کے نگران ادارے ایم ایچ آر اے نے بنڈی بگیو ایبولا کے خلاف ویکسین کے پہلے انسانی آزمائشی مرحلے کی اجازت دے دی ہے۔

    یہ ویکسین آکسفورڈ یونیورسٹی کی ایک ٹیم تیار کر رہی ہے اور یہ اسی ٹیکنالوجی پر مبنی ہے جو آکسفورڈ-آسٹرازینیکا کووڈ ویکسین کی تیاری میں استعمال کی گئی تھی۔ بنڈی بگیو ایبولا کے خلاف مزید تین مختلف ویکسینیں بھی مختلف اداروں کی جانب سے تیار کی جا رہی ہیں۔

20. 17 اگست 2026برطانوی وزیراعظم امریکی صدر ٹرمپ کی ’جعلی چیف آف سٹاف‘ سے بات کرتے رہے

    

    ،تصویر کا ذریعہGetty Images

    برطانوی وزیرِ اعظم اینڈی برنہم نے ایک ایسے شخص کے ساتھ پیغامات کا تبادلہ کیا جو خود کو امریکی صدر ڈونلڈ ٹرمپ کی چیف آف سٹاف ظاہر کر رہا تھا۔

    وزیر اعظم کے دفتر ڈاؤننگ سٹریٹ نے اس سکیورٹی خلاف ورزی پر تبصرہ کرنے سے انکار کر دیا ہے، جس کی خبر سب سے پہلے پولیٹیکو نے دی تھی۔

    پولیٹیکو کے مطابق حکام نے بتایا کہ برنہم نے اس شخص سے رابطہ رکھا جو خود کو سوزی وائلز ظاہر کر رہا تھا، ’اس سے پہلے کہ انھیں شک ہوتا کہ یہ رابطہ حقیقی نہیں ہے‘، اور دعویٰ کیا گیا کہ صرف ’چند پیغامات‘ کا تبادلہ ہوا تھا۔

    حکومت کے ایک ترجمان نے کہا کہ ’ہم قومی سلامتی سے متعلق معاملات پر تبصرہ نہیں کرتے۔‘

    خیال ہے کہ برنہم اور وائلز کا روپ دھارنے والے شخص کے درمیان رابطہ پیغامات کی صورت میں تھا اور دونوں کے درمیان کوئی گفتگو نہیں ہوئی تھی۔

    ذرائع کے مطابق ’کسی اہم پیغام‘ کا تبادلہ نہیں ہوا تھا اور جیسے ہی ان پیغامات کے مشکوک ہونے کا شبہ ہوا، انھیں ’فوری طور پر متعلقہ حکام کو رپورٹ کر دیا گیا‘۔

    بی بی سی اس سے قبل یہ خبر دے چکا ہے کہ گزشتہ سال مئی میں وائلز کے فون کے ہیک ہونے کے حوالے سے ایف بی آئی تحقیقات کر رہی تھی۔

    

    ،تصویر کا ذریعہGetty Images

    اس وقت وائلز نے کہا تھا کہ ان کا فون ہیک ہو گیا تھا، جس کے بعد ایک یا ایک سے زیادہ جعل سازوں نے ان کی رابطہ فہرست استعمال کرتے ہوئے دیگر اعلیٰ امریکی حکام کو پیغامات بھیجے تھے۔

    یہ جعل سازی ان کے ذاتی فون کو نشانہ بنا کر کی گئی تھی، سرکاری فون کو نہیں، تاہم پیغامات وصول کرنے والوں میں امریکی سینیٹرز، گورنرز اور بڑے کاروباری اداروں کے اعلیٰ عہدیدار شامل تھے۔

    ٹرمپ کی قریبی اتحادی وائلز ان افراد میں بھی شامل تھیں جنہیں 2024 میں ایران کی پاسدارانِ انقلاب سے منسلک ایک سائبر جاسوسی یونٹ نے نشانہ بنایا تھا۔ پاسدارانِ انقلاب ایران کی مسلح افواج کی ایک طاقتور شاخ ہے۔

    وائٹ ہاؤس سے تبصرے کے لیے رابطہ کیا گیا ہے۔

    2024 میں فارن آفس (ایف سی ڈی او) نے تصدیق کی تھی کہ اُس وقت کے وزیرِ خارجہ ڈیوڈ کیمرون ایک فریب پر مبنی فون کال کا شکار ہوئے تھے، جس میں ایک شخص نے خود کو یوکرین کے سابق صدر پیٹرو پوروشینکو ظاہر کیا تھا۔

    لارڈ کیمرون نے اس جعل ساز کے ساتھ کچھ ٹیکسٹ پیغامات کا بھی تبادلہ کیا تھا، جو خود کو پوروشینکو ظاہر کر رہا تھا۔ پوروشینکو 2014 سے 2019 تک یوکرین کے صدر رہے تھے۔

    اپنے دورِ وزارتِ عظمیٰ میں لارڈ کیمرون کے یوکرینی رہنما کے ساتھ متعدد معاملات پر روابط رہے تھے، جن میں بین الاقوامی سربراہی اجلاسوں میں ملاقاتیں بھی شامل تھیں۔

    ایف سی ڈی او نے کہا تھا کہ اس تبادلے کی تفصیلات عوامی طور پر جاری کی گئیں کیونکہ خدشہ تھا کہ انہیں ’توڑ مروڑ کر استعمال‘ کیا جا سکتا ہے۔

    اس کے علاوہ 2022 میں مزید دو حکومتی وزرا کو بھی ایک جعل ساز نے نشانہ بنایا تھا، جو خود کو 2020 سے 2025 تک یوکرین کے وزیرِ اعظم رہنے والے ڈینِس شمیہال ظاہر کر رہا تھا۔