ሞሮኮ የስፔን ግዛት ወደሆነችው ሲዩታ ሊሻገሩ የነበሩ በርካታ ስደተኞችን ያዘች

የሞሮኮ ባለሥልጣናት በሰሜን አፍሪካ ወደምትገኘው የስፔን ራስ ገዝ ግዛት ሲዩታ ሊሻገሩ የነበሩ በርካታ ስደተኞችን መያዛቸው ተገለጸ።

ወደ ሲዩታ እየተጓዙ የነበሩ ከ100 በላይ ሰዎች፣ በፍኒዴቅ ከተማ መያዛቸውን የስፔን መገናኛ ብዙኃን እንዲሁም የሞሮኮ የደኅንነት ምንጮችን የጠቀሰው ሮይተርስ ዘግበዋል።

ከሞሮኮ የተነሱ 78,000 ገደማ ስደተኞች ወደ ሲዩታ መግባታቸው ውዝግብ ያስነሳው ከሳምንታት በፊት ነበር። ከስደተኞቹ መካከል 100 ያህሉ መሞታቸው ይታወሳል።

በወቅቱ ሲዩታ ከገቡት ስደተኞች ውስጥ አብዛኞቹ ወደ ሞሮኮ መመለሳቸው ተገልጿል።

በአካባቢው ያለው ጥበቃ ቢጠናከርም በርካታ ቁጥር ያላቸው ስደተኞች ባሕር አቋርጠው ወደ ስፔን ለመግባት ሙከራ አድርገዋል።

የሞሮኮ የደኅንነት ምንጮች እንዳሉት 111 ሰዎች ከስፔን ድንበር 3 ኪሎሜትር በሚርቀው በፍኒዴቅ ከተማ ተይዘዋል። አብዛኞቹ ስደተኞች ከሰሃራ በታች ካሉ የአፍሪካ አገራት የተነሱ ናቸው ተብሏል።

የአድማ በታኝ ፖሊስ ልብስ ያደረጉ ፖሊሶችን ጨምሮ የሞሮኮ የፀጥታ ባልደረቦች ስደተኞቹን ለመበተን አስለቃሽ ጭስ መተኮሳቸው ተገልጿል።

የሞሮኮ ፖሊስ፤ ስደተኞች ተሰባስበው ቅዳሜ ዕለት ባሕር እንዲያቋርጡ ጥሪ ሲያደርጉ የነበሩ "መነሻቸው ያልታወቀ" የማኅበራዊ ሚዲያ ጽሑፎች ላይ "ክትትል እያደረገ" እንደሆነ አስታውቆም ነበር።

የማኅበራዊ ሚዲያ ጽሑፉ አዘጋጆች እና አስተባባሪዎች ላይ ክስ እንደሚመሠረት ተገልጿል።

የስፔን ጋዜጣ የሆነው ኤል ፓይስ እንዳለው በባሕር ዳርቻው በኩል ያለው ጥበቃ ከዚህ ቀደም ከነበረው "10 እጥፍ ጠንካራ" ነው።

ሞሮኮ ትናንት ቅዳሜ ወታደሮች፣ ፈጣን ጀልባዎች እና ድሮኖችን አሰማርታለች። ስፔንም አካባቢውን ለመጠበቅ ከ1,500 በላይ የፀጥታ ባልደረቦች አስፍራለች።

ስደተኞች ወደ ሲዩታ መሻገራቸውን ተከትሎ የብረት አጥርም ተዘርግቷል።

የአውሮፓ ኅብረት የድንበሮችን ደኅንነት ለማስከበር የትብብር እርምጃ እንዲወሰድ አሳስቧል።

በስደተኞቹ ምክንያት ስፔን እና ጣልያን የተካረረ ውዝግብ ውስጥ ናቸው።

ስፔን ከጣልያን በሚነሱ ሁሉም የአየር እና የባሕር ጉዞዎች ላይ የድንበር ቁጥጥር እንዲደረግ ወስናለች። ጣሊያን በበኩሏ ከስፔን ጋር የነበራትን ነጻ ዝውውር የሚፈቅደውን ሸንገን አቋርጣለች።