'Leta y'u Rwanda ifite umutwaro wo kwerekana ko Karasira atishwe' - HRW
Ikigo Human Rights Watch (HRW) cyasabye abategetsi b'u Rwanda ko hakorwa iperereza "ryigenga kandi ririmo umucyo" ku rupfu rwa Aimable Karasira watangajwe ejo ko yapfuye mu gihe yari yitezwe gusohoka muri gereza ya Kigali.
HRW ivuga ko leta y'u Rwanda "ifite amateka mu guhunga inshingano zayo" zo kureka hagakorwa iperereza ryigenga kandi ririmo umucyo ku mfu z'abantu bafunze n'abandi bazwi cyane mu kutavugarumwe na yo.
Leta y'u Rwanda nta cyo iravuga ku itangazo rya Human Rights Watch.
Urwego rw'u Rwanda rushinzwe amagereza ku wa kane rwatangaje ko Karasira yapfuye nyuma yo "gufatwa anywa imiti irengeje igipimo" ku yo yari asanzwe afata, ku munsi yari agiye gusohokaho muri gereza.
Itangazo ry'uru rwego ryavuze kandi ko hategerejwe raporo y'abaganga ivuga impamvu yateye urupfu rwe.
Ibivugwa n'urwego rw'amagereza byumvikanisha ko Karasira yaba yariyahuye. Kwiyahura ni ibintu yigeze kuvuga ko ashobora gukora mu biganiro yatanze mu myaka yashize mbere y'uko afungwa.
Gusa haracyari ibibazo byinshi ku rupfu rw'uyu mugabo w'imyaka 48 mbere yo gufungwa wumvikanye anenga ubutegetsi bwa FPR-Inkotanyi mu biganiro kuri YouTube. Yafunzwe mu 2021.
Umwaka ushize yahamijwe icyaha kimwe cyo gukwirakwiza amacakubiri. Yari agiye kurekurwa arangije igihano cy'imyaka itanu yakatiwe umwaka ushize.
HRW ivuga ko Karasira yiyongereye "ku rutonde rw'imfu zidasobanutse z'abanenga ubutegetsi", ikavuga ko kuba leta "yarananiwe gutanga ubutabera kuri izo mfu bitanga ubutumwa buteye ubwoba".
Inyandiko ya HRW isubiramo Clémentine de Montjoye umushakashatsi mukuru muri icyo kigo avuga ati: "Hari impamvu nyinshi zo kwibaza ibyabaye ku rupfu rwa Aimable Karasira muri gereza…"
Yongeraho ati: "Leta ifite umutwaro wo kwerekana ko Karasira atishwe, kandi abafatanyabikorwa b'u Rwanda bakwiye kubirebera hafi".
HRW ivuga ko urupfu rwa Karasira rwibutsa urwa Kizito Mihigo wapfuye mu 2020 aho yari afungiye kuri station ya polisi mu mujyi wa Kigali nyuma y'iminsi micye atawe muri yombi agerageza guhunga igihugu.
HRW ivuga ko mbere y'urupfu rwe Kizito yari yarayibwiye ko arimo gutotezwa kandi afite ubwoba ko hari abantu bakorera leta bashobora kumwica.
