'मोदी डरपोक', अभिजीत दिपकेंची टीका; दिल्लीतील कनॉट प्लेसमध्ये आंदोलकांना घेतलं ताब्यात

कॉक्रोच जनता पार्टीचे संस्थापक अभिजित दिपके, सह-संयोजक सौरव दास आणि आशुतोष रांका यांची पोलीस कोठडीतून सुटका करण्यात आली आहे.

कॉक्रोच जनता पार्टीनंही आपल्या अधिकृत इन्स्टाग्राम अकाऊंटवरून ही माहिती दिली आहे.

एएनआयनं दिलेल्या माहितीनुसार, सीजेपीचे (CJP) राष्ट्रीय प्रवक्ते आशुतोष रांका म्हणालेत की, "आम्ही दुपारी 2 वाजता पत्रकार परिषद घेऊ."

लाईव्ह लॉच्या वृत्तानुसार , सीजेपीच्या तीन सर्वोच्च नेत्यांना कार्यकारी दंडाधिकाऱ्यांसमोर हजर करण्यात आले, जिथं त्यांना सोडण्याचे आदेश देण्यात आले.

दुसऱ्या बाजूला, ध्रुव राठीनं एक व्हीडिओ प्रसिद्ध केला असून त्यामध्ये त्याने 'मला अटक किंवा ताब्यात घेण्यात आलं नव्हतं, तर माझं अपहरण करण्यात आलं होतं,' असा आरोप केला आहे.

सर्वोच्च न्यायालयानं विशेष सुनावणीत काय म्हटलं?

रविवारी झालेल्या विशेष सुनावणीत सर्वोच्च न्यायालयानं सांगितलं की, कायद्यानुसार लोकांना शहरात मुक्तपणे फिरण्याची परवानगी दिली जाईल आणि कायद्यानं विहित केलेल्या प्रक्रियेशिवाय कुणालाही ताब्यात घेतलं जाणार नाही.

न्यायालयानं असं नमूद केलं की, बीएनएसएसच्या कलम 163 लागू असलेल्या क्षेत्राबाहेर लोकांना एकत्र येण्याचा अधिकार असेल. तसेच, न्याय मिळवण्यासाठी सर्वोच्च न्यायालयात किंवा इतर कोणत्याही न्यायालयात वैयक्तिकरित्या जाण्यापासून कुणालाही रोखलं जाणार नाही, असंही न्यायालयानं म्हटलं.

सुनावणीदरम्यान, सर्वोच्च न्यायालयानं अधिकाऱ्यांना मंगळवारपर्यंत अनुपालन अहवाल आणि ताब्यात घेतलेल्या लोकांचा तपशील सादर करण्यास सांगितलं आहे.

सर्वोच्च न्यायालयाने सुनावणीदरम्यान हे महत्त्वाचे मुद्दे मांडले:

सुटकेनंतर अभिजीत दीपके यांनी दिली पहिली प्रतिक्रिया

सीजेपीचे संस्थापक अभिजित दिपके यांनी पोलीस कोठडीतून सुटका झाल्यानंतर आपली पहिली प्रतिक्रिया दिली आहे.

अभिजीत दिपके यांनी रविवारी पंतप्रधान मोदींवर निशाणा साधत त्यांना 'डरपोक' म्हटलं आहे.

अभिजीत यांनी एक्सवर पोस्ट केलंय की, "पंतप्रधान म्हणून मोदी भारतासाठी लज्जास्पद ठरले आहेत. या देशाने यापेक्षा मोठा भित्रा आणि दादागिरी करणारा माणूस कधीच पाहिला नाही."

आशुतोष रांका यांनी एक्सवर लिहिलंय की, "ज्ञानेश कुमार देशद्रोही आहे. त्याला राजीनामा द्यावाच लागेल. अशा देशद्रोह्यांना हटवण्यासाठी मी माझं संपूर्ण आयुष्य तुरुंगात घालवायलाही तयार आहे."

दिल्लीतील कनॉट प्लेसच्या इनर सर्कलमध्ये मुख्य निवडणूक आयुक्त ज्ञानेश कुमार यांच्या विरोधात आंदोलन करणाऱ्या काही आंदोलकांना पोलिसांनी ताब्यात घेतलं आहे.

रविवारी कनॉट प्लेस इथून ताब्यात घेण्यात आलेल्या आंदोलकांमध्ये स्टुडंट्स फेडरेशन ऑफ इंडिया, ऑल इंडिया स्टुडंट्स फेडरेशन आणि ऑल इंडिया युथ फेडरेशनशी संबंधित विद्यार्थ्यांचाही समावेश आहे.

सीजेपीनं रविवारी आंदोलनाची हाक दिली होती. सीजेपीचे सदस्य अजिंक्य शिंदे यांनी आंदोलनासाठी जंतर मंतरवर जाणार असल्याचं म्हटलं होतं.

दरम्यान, आयसाच्या अध्यक्षा नेहा बोरा यांनीही रविवारी आंदोलनाची घोषणा केली आहे. मात्र, त्यांनी अद्याप आंदोलनाचं ठिकाण स्पष्ट केलेलं नाही.

आंदोलकांना ताब्यात घेतल्याची छायाचित्रेही समोर आली आहेत.

ध्रुव राठीची पोलीसांच्या ताब्यातून सुटका

प्रसिद्ध यूट्यूबर आणि सोशल मीडिया इन्फ्लुएन्सर ध्रुव राठी याला ताब्यात घेतल्यानंतर काही तासांनी पोलिसांनी सोडून दिलं आहे.

ध्रुव राठीला 10 ऑक्टोबर 2026 रोजी सकाळी गुरुग्राममधील केंद्रीय विहार, सेक्टर 56 मधून ताब्यात घेण्यात आलं होतं.

ध्रुव राठीनं प्रसिद्ध केलेल्या व्हीडिओमध्ये म्हटलंय की, "मला काल सकाळी सात वाजता वीसभर सिव्हील ड्रेसमधील लोकांनी ताब्यात घेतलं. मी याला अपहरण असंच म्हणेन. जवळपास 20 तास मला या पोलीस स्टेशनमधून त्या पोलीस स्टेशनमध्ये फिरवत राहिले. माझा मोबाईल काढून घेण्यात आला तसेच मला वकिलांशीही बोलू दिलं नाही. या झटापटीत मला अनेक ठिकाणी जखमाही झाल्या आहेत."

ही हुकूमशाही असून मोदींनी इतिहास पहावा आणि समजून घ्यावं की प्रत्येक हुकूमशहाचा अंत कसा होतो, असं म्हणत टीकाही केली आहे.

ध्रुव राठीने आपण भारतीय नागरिक असल्याचेही स्पष्ट केले आणि आपला पासपोर्ट दाखवला.

दरम्यान, अभिजीत दिपके, आशुतोष रांका आणि सौरव दास यांची सुटका करण्यात आली असून दुपारी दोन वाजता ते पत्रकार परिषद घेणार आहेत.

दिल्ली पोलिसांनी आपल्या अधिकृत फेसबुक अकाऊंटवरून त्यांच्या सुटकेविषयी माहिती देताना म्हटलंय की, "अभिजीत दिपके, आशुतोष रांका आणि सौरव दास यांना 10 ऑक्टोबर रोजी BNSS च्या कलम 126/170 अन्वये प्रतिबंधात्मक अटकेखाली घेण्यात आलं. सर्व आवश्यक कायदेशीर प्रक्रियांचे पालन करून त्यांना 11 ऑक्टोबर रोजी दिल्ली कँटोनमेंट येथील SEM न्यायालयासमोर हजर करण्यात आलं."

"शांतता व सुवर्तन राखण्याच्या अटीवर, एका वर्षाच्या कालावधीसाठी 50 हजार रुपयांचा जामीन बंधपत्र (Surety Bond) सादर केल्यानंतर SEM न्यायालयाने त्यांची सुटका केली," असंही दिल्ली पोलिसांनी म्हटलंय.

दरम्यान, आज रविवारी दिल्लीतील जंतर मंतर परिसरात मोठा पोलीस बंदोबस्त तैनात करण्यात आला आहे.

शनिवारी सकाळी पोलिसांनी सीजेपीच्या वरिष्ठ नेत्यांसह अनेक आंदोलकांना ताब्यात घेतलं होतं.

मात्र, सीजेपीशी संबंधित अजिंक्य शिंदे यांनी म्हटलं आहे की, ते आज म्हणजेच रविवारी सकाळी 10 वाजता पुन्हा जंतर मंतरवर आंदोलन करतील.

ऑल इंडिया स्टुडंट्स असोसिएशनच्या (AISA) राष्ट्रीय अध्यक्षा नेहा बोरा यांनी रविवारीही आंदोलनाची हाक दिली आहे.

रविवारी आंदोलन कुठे होणार आहे, हे नेहा बोरा हिनं सांगितलेलं नाहीये.

अभूतपूर्व सुरक्षाव्यवस्था, मेट्रो-रेल्वे बंदी आणि कॉक्रोच जनता पार्टीच्या सर्व प्रमुख पदाधिकाऱ्यांना विमानातूनच ताब्यात घेतल्यानंतर काल, 10 ऑक्टोबर रोजी पोलीस आणि आंदोलकांमधील धरपकडीचा खेळ दिवसभर सुरू राहिला.

आज, रविवारीही हे आंदोलन सुरूच राहिल, अशी घोषणा सीजेपीचे नेते अजिंक्य शिंदे यांनी केली आहे.

अभिजीत दिपके, सौरव दास आणि आशुतोष रांका यांना विमानातूनच ताब्यात घेतल्यानंतर सीजेपीकडून अजिंक्य शिंदे यांच्याकडे या आंदोलनाची धुरा सोपवण्यात आली आहे.

सीजेपीव्यतिरिक्त AISA या विद्यार्थी संघटनेची प्रमुख नेहा बोरा, स्वराज इंडियाचे प्रमुख योगेंद्र यादव तसेच प्रशांत भूषण आणि दीपंकर भट्टाचार्य यांच्यासहित अनेकांना काल पोलिसांनी ताब्यात घेऊन रात्री उशीरा सोडलं.

फक्त दिल्लीतच नव्हे तर पुणे, मुंबईसहित अनेक प्रमुख शहरांमध्ये हाच सिलसिला पहायला मिळाला.

विरोधी पक्षनेते राहुल गांधी यांनीही या आंदोलनाला पाठिंबा दर्शवला असून सरकारवर जोरदार टीका केली आहे. तर दुसरीकडे, हा अराजकता पसरवण्याचा प्रयत्न असल्याचा आरोप भाजपनं केला आहे.

काल दिवसभराच्या धुमश्चक्रीनंतर आज आंदोलनाच्या दुसऱ्या दिवशी काय काय घडतंय, याकडे आपलं लक्ष राहिल.

'अटक केलेल्या नेत्यांना पोलीस ठाण्यात एक्झिक्यूटीव्ह मॅजिस्ट्रेटसमोर हजर केलं जाईल' - CJP

कॉक्रोच जनता पार्टीनं दावा केला आहे की, पोलिसांनी अटक केलेल्या नेत्यांना रविवारी सकाळी 9 वाजता दिल्ली कॅन्ट पोलीस ठाण्यात एक्झिक्यूटीव्ह मॅजिस्ट्रेटसमोर हजर केलं जाईल.

सीजेपीच्या कायदेशीर प्रमुख रत्ना सिंह यांनी सोशल मीडिया प्लॅटफॉर्म एक्सवर लिहिलंय की, "अभिजीत, आशुतोष आणि सौरव यांना आज सकाळी 9 वाजता दिल्ली कॅन्ट पोलीस स्टेशनमधील एक्झिक्यूटीव्ह मॅजिस्ट्रेटसमोर हजर केलं जाईल."

त्या म्हणाल्या की, "दिल्ली पोलिसांच्या एका अधिकाऱ्यानं मला सकाळी याबद्दल माहिती दिली. सीजेपीची कायदेशीर प्रमुख या नात्याने, मी आमचे प्रतिनिधित्व करणाऱ्या इतर वकिलांसोबत पोलीस ठाण्यात उपस्थित राहीन."

ममता बॅनर्जी यांच्या नेतृत्वाखालील तृणमूल काँग्रेसच्या खासदार महुआ मोईत्रा यांनीही त्या तिघांच्या अटकेचा मुद्दा उपस्थित करून सरकारवर निशाणा साधला आहे.

"मोदी शाह इतके घाबरले आहेत की ते आज मुलांचे अपहरण करत आहेत. तुम्हाला त्याचे परिणाम भोगावे लागतील," असं त्यांनी शनिवारी 'एक्स'वर लिहिलं आहे.

संयुक्त राष्ट्रांच्या मानवाधिकार विभागाने व्यक्त केली चिंता

कॉक्रोच जनता पार्टीच्या सर्व प्रमुख पदाधिकाऱ्यांची सुटका अद्याप झालेली नसून याची दखल संयुक्त राष्ट्रांच्या मानवाधिकार विभागानंही घेतली आहे.

या आंदोलनादरम्यान पोलिसांनी केलेल्या कठोर कारवाईबद्दल संयुक्त राष्ट्रांच्या मानवाधिकार विभागाने चिंता व्यक्त केली आहे.

दरम्यान, भारतानं संयुक्त राष्ट्रांच्या मानवाधिकार विभागाच्या या चिंता निराधार आहेत, असं म्हणत प्रतिक्रिया दिली आहे.

"भारत ही जगातील सर्वात मोठी लोकशाही आहे. इथं शांततापूर्ण एकत्र येण्याचा अधिकार संविधानानं दिलेला आहे. तसंच मजबूत संस्था, स्वतंत्र न्यायपालिका आणि मुक्त प्रसारमाध्यमांद्वारे ती संरक्षित आहे," असं जिनिव्हातील भारतीय मिशननं अधिकृत निवेदनात म्हटलं आहे.

"त्यामुळं, मानवाधिकार आयोगाची चिंता निराधार असून भारताच्या अंतर्गत बाबींमध्ये हा अनावश्यक हस्तक्षेप आहे. या संदर्भात, मानवाधिकार आयोगानं निःपक्षपातीपणे आणि भेदभाव न बाळगता काम करण्याच्या अधिकारानुसार इतर ठिकाणी होणाऱ्या आंदोलनांकडंही तितकंच लक्ष दिलं पाहिजे," असंही निवेदनात म्हटलं आहे.

देशभरात जणू अघोषित आणीबाणी-वांगचूक

दुसऱ्या बाजूला, सामाजिक कार्यकर्ते सोनम वांगचूक यांनी शनिवारी इन्स्टाग्रामवर एक व्हीडिओ शेअर केला. त्यात त्यांनी सरकारने ताब्यात घेतलेल्या लोकांची तातडीने सुटका करण्याची मागणी केली.

या व्हीडिओमध्ये ते म्हणाले, "काही वेळापूर्वी परत आल्यानंतर मला समजलं की, आज दिल्लीत अनेकांना अटक करण्यात आली आहे. यामध्ये विद्यार्थी नेते, युवा नेते, वकील, पत्रकार आणि अगदी खासदारांचाही समावेश आहे."

"कालपर्यंत त्यांना वाटत होते की जगातील सर्वात मोठ्या लोकशाहीत शांततेत आंदोलन करण्याची परवानगी दिली जाईल. मात्र, आता देशभरात जणू अघोषित आणीबाणी लागू झाली आहे, असं चित्र आहे."

याशिवाय, काल रात्री उशीरा सीजेपीचे नेते अजिंक्य शिंदे यांनी दिल्ली कमिश्नर यांच्या नावे पत्र लिहून सीजेपीच्या पदाधिकाऱ्यांच्या ठावठिकाण्याबाबत प्रश्न उपस्थित करत त्यांच्या सुटकेची मागणी केली आहे.

या पत्रात त्यांनी म्हटलंय की, "या तिघांच्याही सद्यस्थितीबद्दल तातडीनं माहिती मिळवण्यासाठी हे पत्र लिहीत आहे. थेट विमानातच ताब्यात घेतल्यानंतर आता 12 तास उलटून गेले आहेत, तरीही त्यांच्या ठिकाणाबद्दल कोणतीही माहिती मिळालेली नाही."

आम्ही या कारवाईचा तीव्र निषेध करतो आणि खालील गोष्टींची मागणी करतो:

'तोपर्यंत आम्ही घरी परतणार नाही' - अजिंक्य शिंदे

कॉक्रोच जनता पार्टीचे (सीजेपी) नेते अजिंक्य शिंदे यांनी 'एक्स'वर एक व्हीडिओ पोस्ट करून आज रविवारी (11 ऑक्टोबर) होणाऱ्या आंदोलनाबाबत माहिती दिली.

या व्हीडिओत ते म्हणाले की, "आज आम्ही जंतर-मंतरवर ज्ञानेश कुमार यांनी मतदानाचा अधिकार हिरावून घेतलेल्या 12 कोटी मतदारांच्या हक्कांची मागणी करण्यासाठी गेलो होतो. तरीही मोदींच्या हुकूमशाही सरकारने अभिजीत दिपके, सौरव दास आणि आशुतोष रांका यांच्यासह सर्व विद्यार्थी नेते आणि आंदोलकांना ताब्यात घेतले."

ते पुढे म्हणाले, "त्यांना असे वाटले असेल की, आज ताब्यात घेतल्यानंतर सर्वजण घाबरून घरी निघून गेले. मात्र, मोदी-शाह यांना वाटणारी ही भीती दाखवते की, आम्ही अर्धी लढाई जिंकली आहे आणि ही एका नव्या लढाईची सुरुवात आहे."

"मागच्या वेळी ज्याप्रमाणे त्यांनी सरकारचा अहंकार चिरडून टाकला होता, त्याचप्रमाणे यावेळीही सरकारचा अहंकार चिरडून टाकतील."

"जोपर्यंत ज्ञानेश कुमार यांचा राजीनामा घेत नाही, तोपर्यंत आम्ही घरी परतणार नाही," असे ते म्हणाले.

रविवारी सकाळी 10 वाजता पुन्हा जंतर-मंतरच्या दिशेने कूच करणार असल्याचे त्यांनी सांगितले. तसेच, मोठ्या संख्येने जंतर-मंतर येथे पोहोचण्याचे आवाहन त्यांनी नागरिकांना केले.

ममता बॅनर्जी-अरविंद केजरीवालही होते ताब्यात

काल विरोधी पक्षांमधील प्रमुख नेते ममता बॅनर्जी आणि अरविंद केजरीवाल यांनीही जंतर-मंतरकडे कूच करण्याचा अयशस्वी प्रयत्न केला.

याशिवाय, केरळचे माजी मुख्यमंत्री पी. विजयन आणि त्रिपुराचे माजी मुख्यमंत्री माणिक सरकार यांनाही ताब्यात घेण्यात आलं.

एकूण चार माजी मुख्यमंत्र्यांना ताब्यात घेऊन सोडल्यानंतर ममता बॅनर्जी म्हणाल्या, "सध्या आम्ही काहीही बोलणार नाही, कारण उद्या इंडिया आघाडीने एकजुटीने विरोध करण्याचे आवाहन केले आहे. आम्ही सर्वजण एकत्र आहोत. मी नियमांचे उल्लंघन करू शकत नाही. या बाबतीत मी खूप शिस्तप्रिय आहे."

त्या पुढे म्हणाल्या, "राष्ट्रपतींनी म्हटले आहे की, आमच्याकडे कोणताही पुरावा नाही. चौकशी करायची असेल, तर पुरावे आवश्यक आहेत. आम्ही त्यांना सांगितले की, 'ठीक आहे, आम्ही पुरावे देऊ.'"

शनिवारी पोलिसांनी ममता बॅनर्जी यांच्यासह त्यांच्या पक्षातील पाच नेत्यांना साऊथ अव्हेन्यू येथील बसस्थानकावरून ताब्यात घेतलं होतं.

ममता बॅनर्जी यांनी सांगितले की, त्यांना जंतर-मंतर येथे जायचे होते; मात्र पोलिसांनी त्यांना जाऊ दिले नाही. त्यानंतर त्या आपल्या निवासस्थानाबाहेर धरणे आंदोलनाला बसल्या. त्यानंतर पोलिसांनी त्यांना ताब्यात घेतले.

(बीबीसीसाठी कलेक्टिव्ह न्यूजरूमचे प्रकाशन.)