रोबर्ट हल र माइकल वुडफर्डलाई यो वर्ष अर्थशास्त्रतर्फ नोबेल पुरस्कार

अर्थशास्त्रतर्फ यस वर्षको नोबेल पुरस्कार रोबर्ट हल र माइकल वुडफर्डलाई प्रदान गरिने भएको छ।

नोबेल पुरस्कार समितिले उनीहरूले गरेको "समष्टिगत आर्थिक स्थायित्वका लागि सूक्ष्म आर्थिक धरातल" सम्बन्धी अर्थशास्त्रीय अनुसन्धान र समष्टिगत अर्थतन्त्रका मोडेलहरू निर्माण गरेकाले पुरस्कृत गर्ने निर्णय गरिएको जनाएको छ।

नोबेल समितिका अनुसार उनीहरूले निर्माण गरेको समष्टिगत अर्थशास्त्रीय नयाँ मोडेलहरूले स्थायित्वका नीतिहरू कार्यान्वयन गर्ने क्षमतामा सुधार ल्याएको छ।

"यी मोडेलहरूका आधारमा वित्तीय र मौद्रिक नीतिका उपायहरूमार्फत् आर्थिक उतारचढावलाई घटाउन सकिन्छ," समितिले भनेको छ।

नोबेल समितिले विभिन्न छ विधामा पुरस्कार दिँदै आएको छ।

गत साता सोमवारदेखि विभिन्न विधाका विजेताको नाम घोषणा गर्ने क्रम सुरु भएको थियो। यससँगै सबै विधाका विजेताहरूको नाम टुङ्गो लागेको छ।

सन् १९६९ देखि अहिलेसम्म गरेर नोबेल समितिले ५८ पटक अर्थशास्त्रतर्फ विभिन्न व्यक्ति र संस्थालाई तिनको योगदानको सम्मानार्थ पुरस्कृत गर्ने घोषणा गरेको छ।

अहिलेसम्म पुरस्कृत हुनेमध्ये सन् २०१९ का विजेता एस्टेर डुफ्लो सबैभन्दा कम उमेरका व्यक्ति हुन्। उनी त्यतिबेला ४६ वर्षका थिए।

सन् २००७ मा पुरस्कार घोषणा हुँदा लिओनिड हर्विच ९० वर्षका थिए। उनी यो विधामा पुरस्कृत हुने वृद्धतम व्यक्ति हुन्।

यो वर्षका अरू विजेता को हुन्

यसअघि अर्थशास्त्रतर्फ नोबेल पुरस्कार कसकसलाई दिइएको थियो

कसले गर्छ निर्णय

भौतिकशास्त्र, रसायनशास्त्र, चिकित्साशास्त्र, साहित्य र अर्थशास्त्रतर्फको पुरस्कार स्वीडनको स्टक्होममा प्रदान गरिन्छ।

नोबेल शान्ति पुरस्कारको विजेताको चयन नर्वेमा गरिन्छ। त्यसको जिम्मा नर्वेको संसद्ले नियुक्त गर्ने पाँचसदस्यीय समितिले गर्छ र पुरस्कार ओस्लोमा प्रदान गरिन्छ।

प्रत्येक विधामा पुरस्कृत हुने व्यक्ति वा संस्थाले मौलिक कला भएको एउटा नोबेल डिप्लोमा, एउटा नोबेल पदक र नगद पुरस्कारमा १ करोड १० लाख स्वीडिश क्रोनर पाउँछन्।

यदि एकभन्दा बढी विजेता भएमा उक्त रकम उनीहरूबीच भाग लगाइन्छ। उक्त रकम पाउनका लागि उनीहरूले एउटा मन्तव्य दिनुपर्छ।

नोबेल पुरस्कार डिसेम्बर १० मा एउटा विशेष समारोह आयोजना गरेर वितरण गरिन्छ। उक्त दिनमा अल्फ्रेड नोबेलको स्मृतिदिवस पर्छ।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।