ټرمپ په تېره یوه سلیزه کې لومړنی ژوندی ولسمشر دی، چې پر امریکایۍ سکه یې تصویر کښل شوی
د عکس سرچینه، Reuters
- Author, اوسموند چیا
- دنده, د سوداګریزو چارو خبریال
- د خپرېدو وخت
- د لوستلو وخت: ۳ دقیقې
د امریکا ولسمشر ډونلډ ټرمپ انځور اوس پر یوې امریکايۍ سکې هم ځای موندلی او دا د هغه یو تازه اقدام بلل کېږي چې پر امریکايي بنسټونو خپله شخصي نښه پرېږدي.
د چهارشنبې په ورځ، د امریکا د سکو ادارې (US Mint) د یو ډالري سکې نوې بڼه وړاندې کړه چې د ټرمپ انځور پرې نقش شوی او ترڅنګ یې د (ازادي) او (پر خدای باور لرو) عبارتونه کښل شوي دي. دا سکه د امریکا د ۲۵۰مې کلیزې د نمانځنې په مناسبت جوړه شوې ده.
د سکو ادارې ویلي چې دغه سکې د یو ځای کولو او یادګاري توکو په توګه بازار ته وړاندې کېږي او د ورځني راکړې ورکړې لپاره به په عادي ډول نه کارول کېږي.
د امریکا قانون پر رسمي اسعارو د ژوندیو ولسمشرانو د انځورونو چاپ منع کوي، خو د ۲۵۰مې کلیزې اړوند قانون کې د طرحې یوې ځانګړې مادې د دې سکې د جوړېدو لاره هواره کړې ده.
دغه سکې د ۲۵ سکو د یوې ټولګې په بڼه په ۶۱ ډالرو او د ۱۰۰ سکو د یوې بستې په بڼه په ۱۵۴.۵۰ ډالرو پلورل کېدې. د پلور له پیل څو ساعته وروسته، د سکو ادارې وېبپاڼې وښودله چې دا مهال سکې ''له زېرمه وتلې'' دي، خو ادارې ویلي چې نورې سکې هم تولیدېږي.
دغه سکې په واشنګټن ډي سي کې د امریکا د سکو ادارې په پلورنځي کې د پلور ماشینونو له لارې هم پلورل کېدې.
بي بي سي د نورو جزیاتو لپاره د امریکا د سکو ادارې، مالیې وزارت او سپینې ماڼۍ سره اړیکه نیولې ده.
د امریکا د سکو ادارې ویلي چې دا سکه ''د دې تاریخي ملي پړاو د نمانځلو لپاره'' جوړه شوې او د ''یوه نسل په کچه ځانګړی یادګاري ډیزاین'' لري چې تمه ده د معاصرو راټولونو یوه ځانګړې برخه شي.
که څه هم سکې طلایي رنګ لري، خو په رښتیا سره پکې سره زر نه دي کارول شوي. د سکو ادارې د معلوماتو له مخې، سکه ۸۸.۵ سلنه له مسو جوړه شوې او پاتې برخه یې زنک، نکل او د منګنیز لرونکې ژېړ فلزي پوښ لري.
که څه هم دغه سکې په عادي دوران کې نه دي شاملې، بیا هم د قانون له مخې د پورونو او مالیاتو د تادیې لپاره د قانوني پیسو حیثیت لري. خو فدرالي قانون کاروبارونو ته اجازه ورکوي چې خپله پرېکړه وکړي، ایا دا سکې ومني که نه.
د عکس سرچینه، Reuters
په مې میاشت کې د امریکا د خزانې وزیر سکاټ بېسېنټ ویلي وو چې وزارت یې د ۲۵۰ ډالرو نوې بانکنوټ د خپرولو پلان لري چې د ولسمشر ډونلډ ټرمپ انځور به پرې چاپ وي.
بېسېنټ هغه مهال ټینګار کړی و چې تر دې وړاندې هم یو ژوندی امریکایي ولسمشر د هېواد پر اسعارو راڅرګند شوی و.
د امریکا د خپلواکۍ ۱۵۰مې کلیزې د نمانځنې لپاره په ۱۹۲۶ کال کې خپره شوې نیم ډالري سکې د هغه وخت د ولسمشر کالوین کولیج انځور درلود.
د ټرمپ ادارې دغه راز د ۲۰۲۰ کال د ''Circulating Collectible Coin Redesign Act'' قانون ته اشاره کړې، چې د ټرمپ د لومړۍ دورې پر مهال تصویب شوی و.
که څه هم دغه قانون د سکو پر شا لوري (tails side) د ژوندیو اشخاصو د انځورونو له کارولو منع کوي، خو د سکې مخ لوري (heads side) په اړه څرګند بندیز نه لري. د ټرمپ انځور هم په دغو نویو یو ډالري سکو کې پر مخ لوري ځای پر ځای شوی دی.
د روان کال په مارچ میاشت کې د امریکا خزانې وزارت هم اعلان کړی و چې ډېر ژر به د امریکا پر کاغذي بانکنوټونو د ټرمپ لاسلیک چاپ شي، چې دا به د واکمن ولسمشر لپاره یو بل بې ساری اقدام وي.
