تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
فوټبال نړیوال جام: فرانسې او مراکش منځلوبو ته لار ومونده
فرانسې د ۲۰۲۶ کال فوټبال نړیوال جام د ۱۶ لوبډلو پړاو کې د پاراګوای په ماتولو سره منځلوبو یا کوارټر فاینل ته لار ومونده.
د دوی ترمنځ لوبه شنبه (د جولای ۴مه) د امریکا د فیلاډلفیا فوټبال لوبغالي کې کېده او فرانسې ۱- صفر وګټله.
فرانسې لپاره د بریا دا یوازنی ګول چې د پېنلتۍ شوټ و، ۷۰ یمه دقیقه کې کېلیان اېمباپې وکړ.
دا په روان نړیوال جام کې د هغه اووم ګول شو.
تر اېمباپي ورهاخوا یوازې د ارجنټاین لېونل مېسي تر دې دمه په روان نړیوال جام کې ۷ ګولونه کړي دي.
دوی دواړه سږکال د زرین بوټ (ګولډن بوټ) جایزې ته مخکښ نوماندان دي.
دا جایزه معمولآ هغو لوبغاړو ته ورکول کېږي، چې په یوه جام کې تر ټولو ډېر ګولونه ووهي.
فرانسې په ۱۹۹۸ او ۲۰۱۸ کال کې دوه ځله د فوټبال نړیوال جام ګټلی او د ۲۰۲۲ کال په نړیوال جام کې هم چې په قطر کې کېده او دغه هېواد پکې د خپلې اتلولۍ دفاع کوله، له ارجنټاین سره پایلوبې ته رسېدلې وه.
دا له ۲۰۱۰ کال را وروسته لومړی ځل و چې پاراګوای نړیوال جام کې لوبېده.
شنبه تر دې ورمخکې مراکش لومړنی هېواد شو چې د ۲۰۲۶ کال د فوټبال نړیوال جام د ۱۶ لوبډلو پړاو کې د خپلې سیالۍ په ګټلو سره منځلوبو یا کوارټرفاینل ته یې لار ومونده.
د مراکش فوټبال ملي لوبډلې د امریکا متحدو ایالتونو په هاسټن لوبغالي کې کاناډا ته ۳-صفر ماته ورکړه او په دې توګه یې بل پړاو ته تګ لپاره د نړیوال جام د دغه شریک کوربه هیلې ورلنډې کړې.
مراکش لپاره دوه لومړي ګولونه عزالدین اوناحي ووهل او درېیم ګول د سیالۍ وروستیو شېبو کې سفیان رحیمي وکړ.
مراکش چې له ۱۹۸۶ تر ۱۹۹۸ کال پورې یې د فوټبال په درېیو نړیوالو جامونو کې برخه اخیستې وه، له شل کلن انتظار وروسته په ۲۰۲۲ کال قطر کې کېدونکي نړیوال جام ته لار ومونده او تر نیمه پایلوبې مخکې ولاړ.
دغه هېواد روان نړیوال جام کې تر دې دمه ماته نه ده خوړلې.
مراکش په منځلوبه کې د جولای ۹مه فرانسې سره مخامخېږي.
د ۱۶ لوبډلو پړاو بله سیالي یکشنبه د افغانستان په وخت د شپې ۱۱:۳۰ بجې د برازیل او ناروې ترمنځ کېږي.
