ډاکټرانو د یوه سړي له مثانې ۳.۱ کیلوګرامه تیږه ایستلې

د سریلنکا ډاکټرانو د یوه سړي له مثانې ۳.۱ کیلوګرامه '۶.۸ پاوه' تیږه ایستلې ده؛ دوی باور لري چې ښايي دا د خپل ډول تر ټولو لویه ثبت شوې تیږه وي.

دغه عملیات تېره اونۍ د سریلنکا ختیځ ترینکومالي ښار په یوه روغتون کې ترسره شول.

دغه ۵۵ کلن ناروغ وروسته له هغه روغتون کې بستر شوی و چې دماغي سکته (سټروک) پرې راغلې وه. خو د درملنې پر مهال، کله چې ډاکټرانو ولیدل هغه د ادرار کولو له ستونزې سره مخ دی، وموندل شول چې په مثانه کې یې تیږې موجودې دي.

د عملیاتو پر مهال ډاکټرانو د مثانې تیږه وایسته. د دې تیږې وزن د یوې بشپړې مودې نوي زېږېدلي ماشوم هومره و او اندازه یې شاوخوا د اوښمرغ د هګۍ په کچه وه.

ډاکټر پرهالاهان بالاکرېشنن، چې د عملیاتو مشري یې کړې، بي‌بي‌سي سنهالا ته وویل: ''د موجوده ریکارډونو له مخې، دا تر اوسه د مثانې تر ټولو لویه ثبت شوې تیږه ده چې د جراحۍ له لارې ایستل شوې ده.''

هغه زیاته کړه چې ناروغ په ''ډېر ښه روغتیايي وضعیت'' کې دی.

ډاکټرانو ویلي چې ناروغ لا هم په روغتون کې بستر دی او د خپلو نورو روغتیايي ستونزو لپاره درملنه ترلاسه کوي.

ډاکټر بالاکرېشنن زیاته کړه چې ښايي دغه تیږه د ناروغ په مثانه کې له پنځو تر لسو کلونو پورې موجوده وه.

د مثانې تیږې هغه وخت جوړېږي چې په ادرار کې موجود منرالونه بلوري او په کلکو ټوټو بدل شي.

دا تیږې معمولاً هغه مهال جوړېږي چې مثانه په بشپړه توګه تشه نه شي؛ په دې حالت کې غلیظ ادرار پاتې کېږي چې وروسته په بلورونو بدلېدای شي.

د مثانې کوچنۍ تیږې، چې د شګو د دانو په اندازه وي، ښايي په خپله له بدنه ووځي. خو هغه تیږې چې له ۱ سانتي‌متره لویې وي، ډېری وخت د ادرار جریان بندوي او طبي مداخلې ته اړتیا لري. هغه مثانوي تیږه چې له ۴ سانتي‌متره لویه وي، لویه تیږه بلل کېږي.

د ګینس نړیوالو ریکارډونو له مخې، تر ټولو لویه ثبت شوې د مثانې تیږه په ۲۰۰۳ کال کې په برازیل کې د یوه ناروغ له بدنه ایستل شوې وه. د دې تیږې وزن ۱.۹ کیلوګرامه (۴.۲ پاوه) او اوږدوالی یې ۱۷.۹ سانتي‌متره (۷ انچه) و.

هغه مثانوي تیږه چې تېره اونۍ په سریلنکا کې وایستل شوه، شاوخوا ۱۷ سانتي‌متره اوږده وه.