Key tins wey happun bifor Fubara present 2026 budget proposal to Rivers Assembly

Rivers State Govnor Siminalayi Fubara don present ₦1.854 trillion 2026 budget proposal to di Rivers State House of Assembly.

Dis presentation na big political turning point, as e signal possible reconciliation of di Govnor and lawmakers afta almost three years of political disagreements between dem.

Govnor Fubara say di budget wey e title 'Budget of Resilience for Growth and Development ' aim to sustain economic growth, strengthen infrastructure, improve human capital development and enhance social investments across di state.

E project total revenue of ₦1.854 trillion for di 2026 fiscal year, wey represent a 24.49 per cent increase ova di adjusted 2025 budget as di expected growth go come from higher receipts from di Federation Account Allocation Committee (FAAC), derivation funds, and internally generated revenue.

“We go make sure say evri kobo dey spent wisely to create jobs for our pipo. Di collective interest of our pipo na im dey most important to us as govment.”

For di proposed budget, e say ₦413.1 billion na for recurrent expenditure, while ₦1.405 trillion na for capital projects.

Capital allocation

Di capital allocation include:

Govnor Fubara also announce plans to increase overhead allocations to Ministries, Departments and Agencies (MDAs) by at least 50 per cent and clear outstanding gratuities and death benefits wey govment owe retired civil servants.

Di govnor add say im administration don maintain fiscal stability through prudent management of public funds as di govment remain committed to accountability, transparency and responsible spending.

Di govnor urge di lawmakers to approve di budget, as e say na a pipo-centred blueprint wey go bring development, attract investment, create jobs and improve di living standards of residents across di state.

As e receive di budget proposal, Speaker of di House Martin Amaewhule assure di govnor say dem go give due consideration to di document.

“Our state go grow and all hands go dey on deck for di growth of Rivers State. We dey willing to do evritin wey dey needed as Assembly so our pipo go smile again.”

Di budget proposal pass di first reading afta di speaker look through di document and adjourn plenary to 20 July, 2026.

Key tins wey happun bifor di budget proposal presentation

Fubara withdraw from APC govnorship primaries

One of di biggest political developments bifor di budget proposal presentation na Govnor Siminalayi Fubara decision to withdraw from di All Progressives Congress (APC) govnorship primaries ahead of di 2027 election.

For statement wey e sign by imsef, Govnor Fubara say e go support anybodi wey emerge as di candidate of di party.

E say leadership dey about sacrifice and "e get wen time go come wey personal ambition must submit to di greater good of di pipo".

Govnor Fubara say Rivers state big pass any individual and for dis critical moment, "di peace, stability and unity of our dear state must take precedence over evri personal interest".

Di govnor tank all im supporters say e understand dia disappointment, anger and pain as dem don sacrifice many times along di way but say make dem know say im silence ova dis period bin dey "deliberate and strategic, guided always by higher interest of our state and our pipo".

Govnor Fubara dissolve cabinet

Govnor Siminalayi Fubara on Thursday 12 February 2026 dissolve di Rivers State Executive Council - e dismiss all di commissioners and special advisers.

Officials say dis move na way to bring all di different factions of di govment togeda afta di settlement between di govnor and di FCT Minister Nyesom Wike.

Di decision wey take immediate effect, dey inside statement wey di tok-tok pesin Onwuka Nzeshi sign.

Dis dissolution affect di eight-member executive council wey bin remain in office afta di state of emergency wey President Tinubu bin declare for di state and di special advisers wey di govnor bin appoint to work wit am.

Impeachment threats and heightened political tension

At di peak of di kasala, lawmakers bin initiate impeachment proceedings against Govnor Fubara, as dem accuse am of constitutional breaches.

Although di impeachment process no succeed, e increase fears of breakdown in governance and fuel speculation about di future of di administration.

Security around key govment institutions also increase as tensions rise across di state.

Political kasala divide Rivers State

Di crisis start for late 2023 afta breakdown in di relationship between Govnor Fubara and im political mentor and predecessor, Nyesom Wike.

Wetin bin first appear as disagreement within di ruling party quickly escalate into full-blown political battle, as di govnor and di former govnor backing opposing camps.

Di fallout bin affect almost evri aspect of governance, as political appointments, policy decisions and legislative activities no see front sake of di power struggle.