Moja kwa moja, Mazungumzo Israel na Lebanon kufanyika leo, Israel yasema baada ya Beirut kutilia shaka mipango hiyo

Moja kwa moja

Na Mariam Mjahid & Beldeen Waliaula

1. Dakika 21 zilizopitaMwanaharakati Kemi Seba akamatwa Afrika Kusini kwa kuchochea mapinduzi nchini Benin

   

   Chanzo cha picha, Anadolu via Getty Images

   Maafisa wa polisi Afrika Kusini wanasema kuwa wamemkamata “mtoro” ambaye ni mwanaharakati wa Benin aliyekuwa akitafutwa.

   Kemi Seba, anasemekana alikuwa akijaribu kukimbilia ulaya kupitia Zimbabwe.

   Seba ambaye jina lake kamili ni Stellio Gilles Robert Capo Chichi, anatafutwa na mamlaka nchini Benin “kwa kuchochea uasi” baada ya kuunga mkono mapinduzi ya serikali yaliyotibuka mwaka uliopita.

   Mwanaharakati huyo alikamatwa siku ya Jumatatu na mwanawe kijana mwenye umri wa miaka 18 mjini Pretoria. Mtu aliyekuwa amelipwa kuwasaidia kuenda nchini Zimbabwe, pia anazuiliwa na polisi.

   Seba mwenye umri wa miaka 45, anajulikana kwa kupinga ushawishi wa Ufaransa barani Afrika.

   Kemi Seba alizaliwa nchini Ufaransa na wazazi wake ni wazaliwa wa Benin na anawafuasi zaidi ya millioni 1.5 kwenye mitandao ya kijamii.

   Amehukumiwa mara kadhaa nchini Ufaransa kwa kuchochea chuki, ukabilia na chuki dhidi ya wayahudi.

   Mwaka wa 2024, alinyanganywa uraia wake wa Ufaransa, na akajibu hatua hiyo kwa kuchoma pasipoti yake hadharani na kusema kuwa “amekombolewa kutoka kwa kubeba mzigo wa kuwa raia wa Ufaransa.”

   Pia unaweza kusoma:

   Mapinduzi yaliyofeli nchini Benin: Je, kiongozi wa putsch ni nani?

   Kwa nini mapinduzi ya Benin yalifeli wakati mengine yalifanikiwa Afrika Magharibi?

2. Dakika 53 zilizopitaWimbi la mashambulizi ya Urusi yasababisha maafa Ukraine

   

   Chanzo cha picha, Reuters

   Urusi imetekeleza mfulululizo wa mashambulizi ya makombora na ndege zisizo na rubani nchini Ukraine usiku wa kuamkia leo, na kuwauwa watu 16 na kuwajeruhi wengine zaidi ya 100.

   Watu 8 waliuawa katika mji wa Odesa, mkuu wa jeshi katika mji huo Sergiy Lysak aliandika kwenye mtandao wa Telegram huku mashambulizi yakiendelea kuripotiwa.

   Upande wa pili wa mpaka wa Ukraine, eneo la Krasnodar Krai nchini Urusi, watoto wawili waliuawa na ndege zisizo na rubani za Ukraine.

   Mashambulio haya yanakuja baada ya kipindi kifupi cha kusitisha mapigano wakati wa sherehe za pasaka za Orthodox wikendi iliyopita.

   Mashambulio ya Urusi pia yalilenga mji wa Kyiv, Kharkiv, Dnipro,Mykolaiv na Kherson.

   Rais wa Ukraine Volodymir Zelensky amesema vikosi vya ulinzi vya taifa lake vimedungua ndege zisizo na rubani 636 kutoka Urusi katika muda wa siku moja.

   Kwenye mtandao wa X rais huyo aliandika kuwa “huu ni usiku mwingine unaodhibitisha kuwa Urusi haistahili kulegezewa sera za kimataifa au kuondolewa vikwazo”

   Pia unaweza kusoma:

   Jinsi tishio la Urusi linavyoisukuma Ujerumani kuunda jeshi lenye nguvu zaidi Ulaya

   Je, vita vya Iran vitaweza kuiokoa bajeti ya Urusi?

3. Saa 1 iliyopita"Mimi ni mtu niliyedhihakiwa zaidi mitandaoni" - Meghan Markle

   

   Chanzo cha picha, Getty Images

   Mke wa mwanafalme Harry, Meghan Markle, amesema kwa kipindi cha miaka 10 alikuwa “mtu aliyedhihakiwa zaidi duniani” kwenye mitandao ya kijamii.

   Akizungumza mjini Melbourne nchini Australia, kuhusu madhara ya mitandao ya kijamii akiwa ameambatana na mumewe mwanamfalme Harry, Meghan alisema amenyanyaswa mitandaoni kwa kipindi cha muongo mmoja, na kwamba “kampuni za teknlojia zinazomiliki mitandao hiyo, hazijakuwa na motisha ya kuzuia mitandao yao kutotumiwa vibaya.”

   Katika mkutano huo, Meghan aliwaambia waliohudhuria kuwa “nikiwafikiria nyinyi nyote na kila ambacho mnapitia, nawaza jinsi sekta hii yenye thamani ya mabillioni ya dola imejengwa kwa ukatili na kupata mibofyo na hilo huenda halitabadilika”

   “Hivyo basi lazima muwe na ujasiri zaidi” alisema Meghan.

   Mwanamfalme Harry pia aliipongeza Australia kwa kuzuia watoto kuwa na mitandao ya kijamii.

   Pia unaweza kusoma:

   Mfahamu Meghan Markle kutoka mcheza filamu mpaka kuingia familia ya kifalme

   Prince Harry: 'Nataka kurudiana na baba yangu na kaka yangu'

4. Saa 2 zilizopitaRaia wa China ahukumiwa mwaka mmoja jela kwa kusafirisha mchwa kutoka Kenya

   

   Chanzo cha picha, Kenya Wildlife Service

   Raia mmoja wa China, Zhang Kequn, amepewa kifungo cha mwaka mmoja jela, kwa jaribio la kutaka kuwasafirisha maelfu ya malkia wa mchwa kutoka Kenya.

   Mahakama moja mjini Nairobi pia ilimpa faini ya shillingi millioni moja ($ 7,737).

   Jaji wa mahakama hiyo Irene Gichobi alisema raia huyo wa China kwa jina Zhang hakuwa mkweli, na alikosa “huruma”

   Zhang alikamatwa mwezi uliopita katika uwanja wa ndege akiwa amepanga safari kurudi China akiwa amebeba zaidi ya mchwa 2000 kwenye begi lake.

   Mamlaka za Kenya zimeonya watu dhidi ya kuwakamata mchwa hao, ambao uhitaji wake umeongezeka bara Ulaya na Asia na huuzwa takriban $ 220 kila mmoja.

   Soma pia:

   Mchwa mmoja kwa dola 220: Eneo jipya la biashara haramu ya wanyamapori

   Wadudu,wanyama nao huwapa wenzi wao zawadi, unajua kwanini?

5. Saa 2 zilizopitaMwanasiasa wa Afrika Kusini Julius Malema, ahukumiwa miaka mitano jela

   

   Chanzo cha picha, Getty Images

   Kiongozi wa chama cha Economic Freedom Fighters (EFF) Julius Malema, mwenye umri wa miaka 45, amepewa kifungo cha miaka mitano jela hii leo katika mahakama moja nchini Afrika Kusini.

   Hakimu Twanet Oliver wa mahakama ya East London nchini humo, aliamuru kuwa kiongozi huyo ana hatia dhidi ya mashtaka matano yanayomkabili.

   Kiongozi huyo alipatikana na hatia mwaka uliopita baada ya kushtakiwa kwa kumiliki risasi, matumizi mabaya ya bunduki katika eneo la umma na kuhatarisha maisha ya watu.

   Timu yake ya wanasheria imeanza mchakato wa kukata rufaa ili kumuepusha kiongozi huyo kuenda jela.

   Soma pia:

   Julius Malema: Kwa nini mwanasiasa wa Afrika Kusini ameikasirisha serikali ya Kenya?

   Julius Malema: Mwanasiasa anayeiongoza EFF katika uchaguzi wa 2024 wa Afrika Kusini

6. Saa 3 zilizopitaChakwera akutana na ujumbe wa CCM

   

   Chanzo cha picha, Wizara ya Mambo ya Nje TZ

   Rais wa Jamhuri ya Muungano wa Tanzania, Dkt. Samia Suluhu Hassan, amekutana na kufanya mazungumzo na Mjumbe Maalum wa Katibu Mkuu wa Jumuiya ya Madola ambaye pia ni Rais wa zamani wa Malawi, Dkt. Lazarus McCarthy Chakwera, Ikulu jijini Dar es Salaam.

   Katika muendelezo wa ziara hiyo, Katibu Mkuu wa Chama Cha Mapinduzi (CCM), Ndg. Asha-Rose Migiro, pia amefanya mazungumzo na Chakwera katika Ofisi za CCM Lumumba, jijini humo.

   Mazungumzo hayo yamelenga kuimarisha ushirikiano kati ya Tanzania na Jumuiya ya Madola, huku Mhe. Chakwera akiwa nchini kwa niaba ya Katibu Mkuu wa jumuiya hiyo, Mhe. Shirley Ayorkor Botchwey.

   Haya yanajiri baada ya Jumuiya ya Madola kuanza rasmi mchakato wa kusaidia juhudi za maridhiano nchini Tanzania, na imemtuma Rais wa zamani wa Malawi, Dkt Lazarus Chakwera, kama Mjumbe Maalum wa Katibu Mkuu.

   Tutaendelea kukutaarifu yanayoendelea na mazungumzo yalizingatia vipengele vipi.

7. Saa 4 zilizopitaLebanon yatilia shaka madai ya mazungumzo ya Trump

   

   Chanzo cha picha, Getty Images

   Afisa katika ofisi ya rais wa Lebanon ameiambia BBC kuwa nchi hiyo haina taarifa yoyote kuhusu mawasiliano yajayo na Israel, kufuatia ujumbe wa Rais wa Marekani Donald Trump uliodokeza uwezekano wa mazungumzo kati ya viongozi wa mataifa hayo mawili.

   Trump alisema usiku uliopita kuwa mazungumzo kati ya viongozi wa Israel na Lebanon yanatarajiwa kufanyika “leo”.

   Siku ya Jumanne, maafisa wa Israel na Lebanon walifanya mazungumzo mjini Washington, D.C., ikiwa ni mara ya kwanza kwa pande hizo kufanya mazungumzo ya moja kwa moja tangu mwaka 1993.

   Lebanon ilielezea mazungumzo hayo kuwa “yenye tija”, huku Israel ikisema kuwa pande zote ziko “upande mmoja wa mlinganyo”, ingawa mashambulizi ya Israel dhidi ya kundi la Hezbollah yanaendelea.

8. Saa 6 zilizopitaMarekani yakamata meli yenye bendera ya Iran

   

   Chanzo cha picha, CENTCOM

   Kamandi Kuu ya Jeshi la Marekani (CENTCOM) imesema kuwa imekamata meli ya mizigo yenye bendera ya Iran iliyokuwa ikijaribu kukwepa marufuku iliyowekwa kwa meli zote zinazoingia au kutoka katika bandari za Iran.

   CENTCOM ilisema meli hiyo ilikamatwa Jumanne baada ya kuondoka katika mji wa bandari wa Bandar Abbas na kupita katika Mlango-Bahari wa Hormuz.

   Pia iliongeza kuwa meli ya Jeshi la Wanamaji la Marekani, USS Spruance, ilifanikiwa kuigeuza mwelekeo meli hiyo, ambayo sasa inarejea Iran.

   CENTCOM ilisema pia kuwa imezirudisha nyuma meli 10 kuelekea Iran, na kwamba hakuna meli iliyokiuka zuio hilo tangu lilipoanza kutekelezwa Jumatatu.

9. Saa 6 zilizopitaUingereza yasema mzozo wa kijeshi wa Marekani dhidi ya Iran ulikuwa kosa

   

   Chanzo cha picha, Rachel Reeves,Image sourceCNBC / Aaron Clamage

   Waziri wa Fedha wa Uingereza Rachel Reeves amesema kuwa kumalizika kwa mazungumzo ya kidiplomasia na Iran na kuanza kwa mzozo wa kijeshi ni kosa lililofanywa na Marekani.

   Akizungumza na kipindi cha CNBC cha Invest in America, Rachel Reeves alisema kwamba “sera bora ya kiuchumi kwa sasa, si tu kwa Uingereza bali kwa dunia nzima, ni kupunguza mvutano.”

   Serikali ya Uingereza imesema kuwa haitashiriki katika kizuizi cha kijeshi cha Marekani katika Mlango-Bahari wa Hormuz ili kuongeza shinikizo kwa Iran.

   Alipoulizwa kama tofauti zinazoongezeka kati ya Marekani na Uingereza kuhusu mzozo huo zimeathiri uhusiano maalum kati ya nchi hizo mbili, Rachel Reeves alikataa hilo, akisema halijawa na athari.

   Hata hivyo, alisema pia kwamba “kuna nafasi ya kutofautiana kati ya marafiki.”

10. Saa 7 zilizopitaIdara ya Hazina ya Marekani yatangaza vikwazo vipya dhidi ya Iran

    

    Chanzo cha picha, Reuters

    Idara ya Hazina ya Marekani imetangaza msururu wa vikwazo vipya dhidi ya watu binafsi, mashirika na meli zinazohusishwa na Iran.

    Kwa mujibu wa taarifa iliyochapishwa kwenye tovuti ya idara hiyo, vikwazo vimewekwa dhidi ya watu watatu, meli tisa na taasisi 17, ambapo neno “taasisi” linaweza kujumuisha kampuni au mashirika mbalimbali.

    Katika taarifa yake, Idara ya Hazina ya Marekani imesema imeweka vikwazo dhidi ya mtandao wa usafirishaji mafuta unaoendeshwa na Mohammad Hossein Shamkhani, mtoto wa afisa wa zamani wa usalama wa Iran Ali Shamkhani.

    Anatuhumiwa kuhusika katika usafirishaji na uuzaji wa mafuta ya Iran kupitia mtandao mpana wa majini.

    Kwa mujibu wa maafisa wa Marekani, mtandao huo umeingiza mapato ya mabilioni ya dola.

    Idara hiyo pia imeweka vikwazo dhidi ya malengo yanayohusishwa na mpango tata wa kifedha unaohusishwa na kundi la Lebanon la Hezbollah, unaodaiwa kupangwa kupitia vituo vya kubadilisha dhahabu na hatimaye kunufaisha utawala wa kijeshi wa Iran.

    Kwa mujibu wa maafisa wa Marekani, mpango huo unahusisha kubadilisha akiba ya dhahabu kuwa fedha taslimu, ambazo hutumika kufadhili shughuli za Hezbollah huku ukikwepa vikwazo kupitia mitandao ya biashara na usambazaji.

    Soma zaidi:

    'Natumai vita havitaanza tena': Wairan wana wasiwasi baada ya mazungumzo kutibuka

    Lebanon yaanza mazungumzo na Israel lakini haina nguvu ya ushawishi

11. Saa 7 zilizopitaMohsen Rezaei: Sikubaliani na kuongeza muda wa usitishaji mapigano

    

    Chanzo cha picha, EPA

    Mohsen Rezaei, mwanachama wa Baraza la Uamuzi wa Maslahi ya Mfumo nchini Iran, amesema: “Hatutauacha Mlango wa Hormuz hadi haki zetu zitakapopatikana kikamilifu.”

    Rezaei, ambaye pia aliwahi kuwa Kamanda Mkuu wa Jeshi la Walinzi wa Mapinduzi (IRGC), amesema katika mahojiano yake mapya yaliyoripotiwa na vyombo vya habari vya ndani ya Iran: “Tofauti na Wamarekani wanaoogopa vita vya muda mrefu, sisi tumejiandaa kikamilifu na tumezoea vita vya muda mrefu.”

    Katika mahojiano hayo, akirejelea kauli za Donald Trump na Waziri wa Vita wa Marekani Pete Hegseth kuhusu kuharibiwa kwa Jeshi la Wanamaji la Iran, alihoji: “Ikiwa Jeshi la Wanamaji la Iran limeharibiwa, kwa nini Marekani haijathubutu kupita katika Mlango wa Hormuz?”

    Rezaei pia amesisitiza kuwa licha ya kufuata maamuzi ya viongozi wa nchi, maoni yake binafsi ni kwamba Iran haipaswi kukubali kurefushwa kwa usitishaji mapigano wa wiki mbili na Marekani.

    Soma zaidi:

    Je, vita dhidi ya Iran vinamnyima usingizi Kim Jong-un?

    Jinsi ujasusi wa Marekani na Uingereza ulivyopindua serikali ya Iran mwaka wa 1953

12. Saa 7 zilizopitaIsrael yaendelea na operesheni dhidi ya Hezbollah nchini Lebanon - Netanyahu

    

    Chanzo cha picha, Reuters

    Waziri Mkuu wa Israel Benjamin Netanyahu amesema Jeshi la nchi yake linaendelea na operesheni dhidi ya wanamgambo wanaoungwa mkono na Iran Hezbollah nchini Lebanon licha ya shinikizo la kimataifa kufikia makubaliano ya kusitisha mapigano.

    Bwana Netanyahu amesema majeshi ya Israel yako karibu kuudhibiti mji wa kusini mwa Lebanon wa Bint Jbeil ambao anautaja kuwa ngome ya Hezbollah.

    Baraza la Mawaziri la Israel linaripotiwa kukutana kujadili uwezekano wa kufikiwa makubaliano ya kusitisha mapigano lakini bado hakujatangazwa uamuzi wao kuhusiana na hilo.Iran inasisitiza kuwa Lebanon sharti ijumuishwe katika makubaliano yoyote ya kuvimaliza vita vya Mashariki ya Kati.

    Soma zaidi:

    Changamoto za kisiasa zinazomkabili Netanyahu nchini Israel

13. Saa 7 zilizopitaPapa Leo akemea ufisadi, aihimiza Cameroon kuheshimu haki za binadamu

    

    Chanzo cha picha, Reuters

    Kiongozi wa Kanisa Katoliki Duniani Papa Leo ametoa wito kwa Serikali ya Cameroon kupambana dhidi ya ufisadi.

    Baada ya kukaribishwa kwa vifijo na nderemo na maelfu ya waumini waliojitokeza katika Mji Mkuu Yaounde, Papa Leo aliwahutubia viongozi wa Serikali akiwemo Rais wa muda mrefu wa Cameroon Paul Biya akiwataka viongozi wa nchi hiyo kuzisuta nafsi zao, kuvunja minyororo ya ufisadi na kuheshimu haki za binadamu.

    Kiongozi huyo wa Kanisa Katoliki amesema viongozi wanapaswa kuwa madaraja na sio chanzo cha migawanyiko.

    Asasi za kiraia zimelaani ukandamizaji unaofanywa na Serikali dhidi ya wanaopinga kuchaguliwa tena kwa muhula wa nane kwa Rais Biya katika uchaguzi uliofanyika mwezi Oktoba mwaka jana.

    Soma zaidi:

    Fahamu siri za Papa mpya kuchagua jina Leo

14. Saa 8 zilizopitaMarekani na Iran zajadili duru ya pili ya mazungumzo kukiwa na wasiwasi wa muda wa usitishaji mapigano

    

    Chanzo cha picha, Getty Images

    Marekani imesema inajadili uwezekano wa kufanyika duru ya pili ya mazungumzo ya kutafuta amani na Iran.

    Gazeti la Wall Street Journal limeripoti kuwa pande hizo mbili zimefikia makubaliano ya awali ya kukutana tena, ingawa muda na mahali pa mkutano huo havijabainishwa. Hata hivyo, Tehran imesema kuwa “misimamo ya Marekani inayobadilika na kukinzana inafanya kuwa vigumu kudumisha uaminifu wa makubaliano yoyote.”

    Msemaji wa Ikulu ya White House amekanusha taarifa kwamba Marekani iliomba kurefushwa rasmi kwa usitishaji mapigano na Iran, akisema madai hayo “si ya kweli.”

    Caroline Leavitt amesema, “tunaendelea kushiriki kikamilifu katika mazungumzo haya,” na kuongeza kuwa mazungumzo hayo ni “ya kujenga na yanaendelea.”

    Akijibu taarifa kuhusu uwezekano wa mazungumzo ya moja kwa moja kati ya Iran na Marekani, Leavitt alisema: “Majadiliano haya yanaendelea, lakini hakuna jambo lililo rasmi hadi litakapotangazwa hapa Ikulu ya White House.”

    Aliongeza kuwa iwapo mazungumzo yatafanyika, kuna uwezekano mkubwa yakafanyika katika eneo lile lile la duru ya kwanza, yaani Islamabad, mji mkuu wa Pakistan.

    Leavitt pia alisema kuwa kutekeleza matakwa ya Donald Trump, ambayo aliyataja kuwa “wazi na yasiyo na utata,” kutakuwa “kwa manufaa ya Iran.”

    Ujumbe kutoka Pakistan ukiongozwa na mkuu wa majeshi Asim Munir uko Tehran kama sehemu ya juhudi za upatanishi.

    Duru ya kwanza ya mazungumzo iliyofanyika mwishoni mwa juma lililopita mjini Islamabad, ilifeli kufikia makubaliano yoyote ya kuumaliza mzozo wa Mashariki ya Kati uliozuka tangu mwishoni mwa mwezi wa Februari.

    Soma zaidi:

    Kizuizi cha kijeshi ni nini na kitafanyaje kazi katika Mlango-Bahari wa Hormuz?

    Lebanon yaanza mazungumzo na Israel lakini haina nguvu ya ushawishi

    Je, Trump atahatarisha wanajeshi wake kwa kufunga Mlango Bahari wa Hormuz?

15. Saa 8 zilizopitaHujambo na karibu katika matangazo yetu ya moja kwa moja ya Alhamisi ya tarehe 16 Aprili 2026.