دالبندین میں نامعلوم مسلح افراد کا پولیس تھانے پر حملہ, محمد کاظم، بی بی سی اردو ڈاٹ کام، کوئٹہ
بلوچستان کے شہر دالبندین میں سینیچر کے روز نامعلوم مسلح افراد داخل ہوئے اور انھوں پولیس تھانے پر حملہ کیا۔
سرکاری حکام کا کہنا ہے کہ مسلح افراد نے شہر میں تین مقامات پر ناکہ بندی بھی کی ۔ مسلح افراد کے شہر میں داخل ہونے اور پولیس کی جوابی کاروائی کے دوران کسی جانی نقصان کی اطلاع نہیں ملی۔
محکمہ داخلہ حکومت بلوچستان کے معاون برائے میڈیا بابر یوسفزئی کا کہنا ہے کہ حملے کے بعد پولیس نے بروقت کارروائی کرتے ہوئے صورتحال کو کنٹرول میں لے لیا۔
حملے میں تھانے کو معمولی نقصان پہنچا اور اس حملے کے حوالے سے چاغی پولیس کے سربراہ سے فون پر رابطہ کیا گیا تو انھوں نے بات کرنے سے گریز کیا۔
تاہم کوئٹہ میں ایک سینیئر سرکاری اہلکار نے نام ظاہر نہ کرنے کی شرط پر بتایا کہ شہر میں مسلح افراد داخل ہوئے۔
ان کا کہنا تھا کہ مسلح افراد نے تھانے پر حملہ کیا جس کے باعث وہاں حوالات میں موجود دس سے زائد زیر تفتیش قیدی فرار ہوگئے۔
تھانے پر حملے کے حوالے سے ایک ویڈیو جس کی بی بی سی آزادانہ طور پر تصدیق نہیں کرسکا، سماجی رابطوں کی میڈیا پر گردش کرنے لگی۔
اس ویڈیو میں تھانے کے گیٹ اور باہر کے دیوار پر گولیوں کے نشانات کے علاوہ تھانے کے مین گیٹ پر ایک بڑا سوراخ دکھائی دیتا ہے۔
اس کے علاوہ ویڈیو میں تھانے کے اندر بعض حصے جلے ہوئے بھی دکھائی دیتے ہیں ۔ سرکاری اہلکار نے بتایا کہ تھانے پر حملے کے علاوہ مسلح افراد نے شہر میں تین مقامات پر ناکہ بندی بھی کی۔
انھوں نے بتایا کہ پولیس نے جوابی کاروائی کی جس سے مسلح افراد شہر سے فرار ہوگئے۔ ان کا کہنا تھا کہ 'پولیس کی کاروائی کے باعث شہر میں کوئی بڑا نقصان نہیں ہوا'۔
اس حوالے سے ایک بیان میں محکمہ داخلہ حکومت بلوچستان کے معاون برائے میڈیا بابر یوسفزئی نے کہا کہ حملہ آوروں نے تھانہ سٹی پر حملے کے ساتھ تین مختلف مقامات پر ناکے قائم کیے تھے۔ ان کا کہنا تھا کہ ایس ایس پی چاغی کی قیادت میں پولیس نے ان کے خلاف بھرپور جوابی کارروائی کی جس کے باعث مسلح افراد فرار ہوگئے۔
انھوں نے کہا کہ شہر میں صورتحال مکمل طور پر کنٹرول میں ہے جبکہ علاقے میں سرچ اور کلیئرنس آپریشن جاری ہے تاکہ ملوث مسلح شرپسندوں کو گرفتار یا ہلاک کیا جا سکے۔ میڈیا کو ایک بیان میں کالعدم بی ایل اے کے ترجمان جیئند بلوچ نے دالبندین شہر میں اس کاروائی کی ذمہ داری اپنی تنظیم کی جانب سے قبول کی ہے۔
دالبندین کہاں واقع ہے ؟
دالبندین شہر بلوچستان کے دارالحکومت کوئٹہ سے اندازاً ساڑھے تین سو کلومیٹر کے فاصلے پر مغرب میں کوئٹہ تفتان شاہراہ پر واقع ہے۔
یہ شہر بلوچستان کے ایران اور افغانستان سے متصل سرحدی ضلع چاغی کا ہیڈکوارٹر ہے۔ دالبندین اور ضلع چاغی کے بعض دیگر علاقوں میں بلوچستان کی حالات کی خرابی کے بعد سے سنگین بدامنی کے واقعات رونما ہوتے رہے ہیں تاہم ان کی تعداد دیگر شہروں کے مقابلے میں کم رہی ہے۔
