لائیو, شام کے دارالحکومت دمشق کے ایک کیفے میں بم دھماکہ، چھ افراد ہلاک، متعدد زخمی

شام کی وزارتِ داخلہ اور سرکاری میڈیا کے مطابق دارالحکومت دمشق کے مرکزی علاقے حجاز میں ایک کیفے میں دیسی ساختہ بم دھماکے کے نتیجے میں کم از کم چھ افراد ہلاک اور متعدد زخمی ہو گئے ہیں۔

خلاصہ

دمشق کے مرکزی علاقے حجاز میں ایک کیفے میں دیسی ساختہ بم دھماکے کے نتیجے میں کم از کم پانچ افراد ہلاک اور متعدد زخمی ہو گئے ہیں
شام کے وزیر خارجہ اسد الشیبانی نے عندیہ دیا ہے کہ اگر 'مفادات کا تقاضا ہوا' تو دمشق حزب اللہ سے ملاقات کے لیے تیار ہے
یوکرین کے دارالحکومت کیئو میں روسی حملوں میں 20 افراد ہلاک اور تقریباً 90 زخمی ہو گئے ہیں
لاہور میں زیرِ تعمیر عمارت کی چھت گرنے سے 10 سالہ بچہ ہلاک جبکہ چار افراد زخمی ہو گئے
ترجمان دفتر خارجہ نے تصدیق کی ہے کہ وزیر اعظم شہباز شریف ایرانی سپریم لیڈر آیت اللہ خامنہ ای کی نماز جنازہ میں شرکت کریں گے

لائیو کوریج

5 گھنٹے قبلتربت میں بلوچ یکجہتی کمیٹی کا احتجاجی مظاہرہ نہ ہو سکا، مظاہرین کی گرفتاریاں
،تصویر کا ذریعہVideograb
بلوچ یکجہتی کمیٹی کی سربراہ ڈاکٹر ماہ رنگ بلوچ اور مرکزی رہنما صبغت اللہ کو عمر قید کی سزا سنائے جانے کے خلاف بلوچستان کے ایران سے متصل سرحدی ضلع کیچ کے مرکزی شہر تربت میں تنظیم کو مظاہرہ کرنے کی اجازت نہیں دی گئی۔
مقامی صحافیوں کے مطابق مظاہرے کو روکنے کے لیے تربت میں پولیس اور دیگر سیکورٹی اہلکاروں کی بھاری نفری تعینات کی گئی تھی۔
بلوچ یکجہتی کمیٹی کا دعویٰ ہے کہ مظاہرے سے قبل ہی تربت شہر میں متعدد افراد کو گرفتار کیا گیا۔دوسری جانب سرکاری حکام نے جمعرات کو سات خواتین کی گرفتاری کی تصدیق کی ہے۔
اس مظاہرے سے ایک روز قبل محکمہ داخلہ حکومت بلوچستان کی جانب سے ضلع کیچ میں 30 یوم کے لیے دفعہ 144 نافذ کردی گئی تھی۔
محکمہ داخلہ حکومت بلوچستان کے معاون برائے میڈیا بابر یوسفزئی نے ایک بیان میں دعویٰ کیا لوگوں نے بلوچ یکجہتی کمیٹی کی کال کو مسترد کیا ہے۔
’تربت شہر میں فدا شہید چوک پر مظاہرے کی کال دی گئی تھی‘
بلوچ یکجہتی کمیٹی کی جانب سے کوئٹہ کے بعد دو جولائی کو ڈاکٹر ماہ رنگ اور صبغت اللہ کو انسداددہشت گردی کی عدالت سے دی جانے والی سزا کے خلاف تربت شہر میں مظاہرے کی کال دی گئی تھی۔
اس ٘مظاہرے کو شام میں شہر کے مرکزی علاقے فدا شہید چوک پر منعقد ہونا تھا۔ مظاہرے سے ایک روز قبل ضلع کیچ میں ایک ماہ کے لیے دفعہ 144 کے تحت ہرقسم کی جلسے جلوسوں پر ایک ماہ کے لیے پابندی بھی عائد کی گئی تھی۔
مقامی صحافیوں نے بتایا کہ مظاہرے سے قبل شہر میں پولیس اور دیگر سیکورٹی اہلکاروں کی بھاری نفری تعینات کی گئی تھی جس کی وجہ سے شہر کے بعض علاقے ویرانی کا منظر پیش کرتے رہے۔
انھوں نے بتایا کہ بھاری نفری کے باوجود کچھ خواتین اور بچے مظاہرے کے لیے جمع ہوئے لیکن ان کو مظاہرہ نہیں کرنے دیا گیا۔
ایک پولیس اہلکار نے نام ظاہر نہ کرنے کی شرط پر بی بی سی اردو بتایا کہ سات کے قریب خواتین کو گرفتار کرلیا گیا ہے۔
تاہم بلوچ یکجہتی کمیٹی کی رہنما ڈاکٹر صبیحہ بلوچ کا دعویٰ ہے کہ گرفتاریوں کی تعداد اس سے زیادہ ہے۔
ایک بیان میں انھوں نے کہا کہ مظاہرے کو روکنے کے لیے شہر میں سیکورٹی اہلکاروں کی بھاری نفری تعینات کی گئی تھی، جس کے باعث ان کے بقول شہر کے مرکزی علاقے میں کرفیو کا سماں تھا۔
سرکاری حکام کا کیا کہنا ہے؟
اس مظاہرے کے حوالے محکمہ داخلہ حکومت بلوچستان کے معاون برائے میڈیا بابریوسفزئی کا کہنا ہے کہ بلوچیکجہتی کمیٹی کی کال ناکام رہی ہے۔
انھوں نے کہا کہ تربت میں احتجاج کی کال کو لوگوں نے مسترد کیا اور وہاں معمولات زندگی جاری رہی۔ ان کا کہنا ہے کہ عوام نے امن و استحکام کے حق میں اپنا فیصلہ دے دیا۔
7 گھنٹے قبلدمشق کے ایک کیفے میں بم دھماکہ، چھ افراد ہلاک اور متعدد زخمی
،تصویر کا ذریعہGetty Images
شام کے سرکاری ٹی وی کے مطابق وسطی دمشق کے ایک پُرہجوم کیفے میں ایک دبم دھماکے کے نتیجے میں چھ افراد ہلاک اور کم از کم 22 افراد زخمی ہوگئے ہیں۔
شام کی وزارتِ داخلہ اور سرکاری میڈیا کے مطابق دارالحکومت دمشق کے مرکزی علاقے حجاز میں ایک کیفے میں دیسی ساختہ بم دھماکے کے نتیجے میں کم از کم چھ افراد ہلاک اور متعدد زخمی ہو گئے ہیں۔
تاحال کسی گروہ یا فرد نے اس کی ذمہ داری قبول نہیں کی ہے۔
حکام کے مطابق ملبہ ہٹانے اور متاثرین کی تلاش کا کام جاری ہے جبکہ ہلاکتوں اور زخمیوں کی تعداد میں اضافے کا خدشہ ظاہر کیا جا رہا ہے۔
رپورٹس کے مطابق زور دار دھماکے سے علاقے میں خوف و ہراس پھیل گیا جبکہ کیفے اور اس کے اطراف کی متعدد عمارتوں کو بھی نقصان پہنچا۔
حادثے کے بعد ایمبولینسوں اور سول ڈیفنس کی ٹیموں نے موقع پر پہنچ کر زخمیوں کو ہسپتال منتقل کرنا شروع کر دیا ہے۔
دوسری جانب سکیورٹی فورسز نے جائے وقوع کو گھیرے میں لے کر تحقیقات کا آغاز کر دیا ہے تاکہ دھماکے کی نوعیت اور اس کے محرکات کا تعین کیا جا سکے۔
سکیورٹی فورسز نے دمشق میں انصاف کے محل کے قریب نصر سٹریٹ کے اطراف حفاظتی حصار قائم کر دیا ہے۔
8 گھنٹے قبلفاروق آباد گردوارہ مذہبی رسومات کے لیے استعمال نہیں ہو رہا تاہم اس کی مرمت کے تمام اقدامات کیے جا رہے ہیں: دفتر خارجہ
،تصویر کا ذریعہMOFA
ترجمان دفتر خارجہ طاہر اندرابی کا کہنا ہے کہ پاکستان کے صوبہ پنجاب میں موجود فاروق آباد کا گردوارہ مذہبی رسومات کے لیے استعمال نہیں ہو رہا تھا اور اس کی خستہ حالت قریبی آبادی کے لیے خطرہ بن چکی تھی تاہم اس کی مرمت کے ہر ممکن اقدامات کیے جا رہے ہیں۔
یاد رہے کہ انڈین وزارتِ خارجہ کے ترجمان نے گزشتہ روز دعویٰ کیا تھا کہ پاکستان میں فاروق آباد نامی مقام پر واقع ایک گردوارے کو بعض نامعلوم افراد نے مسمار کر دیا ہے۔
اس حوالے سے ہفتہ وار بریفنگ میں صحافی کی جانب سے کیے گئے سوال کے جواب میں ترجمان دفتر خارجہ نے کہا کہ پاکستان نے اس معاملے کی تفصیلات حاصل کر لی ہیں جس کے مطابق یہ گردوارہ اب عبادت کے لیے استعمال نہیں ہو رہا تھا۔
ان کے مطابق ’علاقے میں سکھ برادری موجود نہیں تھی اسی بنا پر یہ عمارت نجی کرایہ داری کے تحت تھی۔عمارت کافی پرانی اور خستہ حال ہو چکی تھی اور انسانی جانوں اور اردگرد موجود نجی املاک کے لیے بھی ممکنہ خطرہ بن گئی تھی۔‘
ترجمان کے مطابق ’مقامی افراد کو خدشہ تھا کہ برسات کے موسم میں یہ عمارت گر سکتی ہے۔ احتیاطی اقدام کے طور پر کرایہ داروں نے 24 جون کو سات حصوں پر مشتمل گردوارے کے دو حصوں پر کام شروع کیا۔ تاہم یہ واضح رہے کہ یہ کارروائی متروکہ وقف املاک بورڈ کی اجازت کے بغیر اور بورڈ کے قواعد و ضوابط کی خلاف ورزی کرتے ہوئے کیا گیا۔‘
ترجمان کے مطابق ’اس صورتحال کے تدارک کے لیے فوری اقدامات کیے گئے۔ بورڈ نے 24 جون ہی کو کرایہ داروں کا غیر مجاز کام رکوا دیا۔ عمارت کا کچھ حصہ متاثر ہوا، تاہم بڑے حصے کو نقصان سے بچا لیا گیا۔ اس کی کرایہ داری اور لیز منسوخ کر دی گئی ہے۔‘
ترجمان کے مطابق ’ہم اس بات کو یقینی بنائیں گے کہ عمارت برقرار رہے اور ممکن ہوا تو اس کی مرمت اور تزئین و آرائش کا کام بھی کیا جائے۔‘
ترجمان دفتر خارجہ نے انڈیا پر تنقید کرتے ہوئے کہا کہ ’دوسروں پر انگلی اٹھانے کے بجائے انڈیا کو چاہیے کہ وہ اپنے ملک کے اندر مسلمانوں اور دیگر مذہبی برادریوں کو درپیش مسائل کا سامنا کرے۔‘
8 گھنٹے قبلشام کا حزب اللہ سے رابطوں کا عندیہ، ضرورت ہوئی تو حزب اللہ سے ملاقات کریں گے: شامی وزیر خارجہ اسد الشیبانی
،تصویر کا ذریعہEPA
شام کے وزیر خارجہ اسد الشیبانی نے عندیہ دیا ہے کہ اگر ’مفادات کا تقاضا ہوا‘ تو دمشق حزب اللہ سے ملاقات کے لیے تیار ہے۔
لبنان کی سرکاری خبر رساں ایجنسی کے مطابق جمعرات کو بیروت کے دورے کے دوران شام کے وزیر خارجہ اسد الشیبانی نے لبنانی صدر جوزف عون، وزیر اعظم نواف سلام اور پارلیمان کے سپیکر نبیہ بری سمیت ملک کی اعلیٰ قیادت سے ملاقاتیں کیں۔
لبنان میں حزب اللہ اور شامی افواج کے درمیان ممکنہ تصادم سے متعلق امریکی صدر ٹرمپ کے حالیہ بیان کے بعد یہ اسد الشیبانی کا لبنان کا پہلا دورہ تھا۔
لبنان کی سرکاری خبر رساں ایجنسی کے مطابق اسد الشیبانی نے کہا کہ لبنانی رہنماؤں کے ساتھ ملاقاتوں میں حزب اللہ کا معاملہ زیر بحث نہیں آیا تاہم انھوں نے کہا کہ شام اس گروپ سے ملاقات کے لیے تیار ہے۔
گزشتہ ماہ امریکی صدر ڈونلڈ ٹرمپ نے کہا تھا کہ انھوں نے شامی صدر احمد الشراع سے حزب اللہ کے حوالے سے بات چیت کی ہے۔ یہ بیان ایسے وقت میں سامنے آیا تھا جب ٹرمپ نے لبنان میں متعدد شہریوں کی ہلاکت پر اسرائیل کو تنقید کا نشانہ بنایا تھا۔
اسد الشیبانی کا یہ دورہ اکتوبر 2025 میں دونوں ممالک کے درمیان تعلقات میں نئے مرحلے کے آغاز کے بعد شام کے کسی سینئر عہدیدار کا لبنان کا پہلا دورہ تھا۔ شام میں اسلامی اتحاد کے اقتدار سنبھالنے کے بعد دونوں ممالک کے روابط میں نمایاں پیش رفت دیکھی گئی ہے۔
لبنان کے وزیر اعظم نواف سلام بھی مئی میں شام کا دورہ کر چکے ہیں۔
شام کی نئی قیادت کے حزب اللہ کے ساتھ تعلقات خوشگوار نہیں سمجھے جاتے۔ حزب اللہ سابق شامی صدر بشار الاسد کی اہم اتحادی رہی ہے۔
2024 کے اواخر سے شام کے راستے حزب اللہ کو فنڈنگ اور اسلحے کی فراہمی کے سابقہ راستے منقطع ہو چکے ہیں۔ دمشق کا کہنا ہے کہ لبنان میں اسلحے کی سمگلنگ کی متعدد کوششیں بھی ناکام بنائی گئی ہیں۔
احمد الشراع کی قیادت میں شام کی نئی حکومت اب امریکہ کی اتحادی سمجھی جاتی ہے۔ نئی حکومت نے بڑی حد تک امریکہ، اسرائیل اور ایران کے درمیان علاقائی کشیدگی سے خود کو دور رکھا ہے۔
ادھر اسرائیل اور حزب اللہ کے درمیان جنگ نے جنوبی لبنان کے وسیع علاقوں کو تباہ کر دیا ہے۔ اگرچہ امریکی حمایت سے ہونے والی کوششوں کے نتیجے میں لڑائی میں کمی آئی ہے، تاہم تنازع مکمل طور پر ختم نہیں ہوا۔
9 گھنٹے قبلیوکرین کے دارالحکومت کیئو میں روسی حملوں میں ہلاکتوں کی تعداد 20 ہو گئی، 90 افراد زخمی
،تصویر کا ذریعہGetty Images
،تصویر کا کیپشنحکام کے مطابق حملہ 11 گھنٹوں سے زیادہ وقت تک جاری رہا اور کئی مراحل میں کیا گیا
روسی افواج نے بدھ اور جمعرات کی شب یوکرین کے دارالحکومت کیئو پر ڈرونز اور میزائلوں کا شدید حملہ کیا جس میں کم از کم 20 افراد ہلاک اور تقریباً 90 زخمی ہو گئے جبکہ ایک ایمبولینس سٹیشن بھی اس حملہ کا نشانہ بنا ہے۔
شہر کے میئر نے اسے کیئو پر کیا جانے والا ’سب سے شدید حملہ‘ قرار دیتے ہوئے جمعے کو یومِ سوگ کا اعلان کیا ہے۔
اس سے قبل ہونے والے بعض حملوں میں ہلاکتوں کی تعداد زیادہ رہی ہے تاہم اس تازہ حملے میں دارالحکومت کے خلاف سب سے زیادہ تعداد میں ہتھیار استعمال کیے گئے اور شہر کے وسیع علاقے میں مختلف مقامات کو نشانہ بنایا گیا۔
یہ حملے یوکرینی صدر زیلینسکی کی جانب سے روسی حملے کی تیاری سے متعلق انتباہ کے چند گھنٹوں بعد ہوئے۔
،تصویر کا ذریعہEPA
،تصویر کا کیپشنعلاقے میں تباہ شدہ گاڑیاں، ٹوٹے ہوئے شیشے اور سرمئی راکھ کی موٹی تہہ دیکھی جا سکتی ہے
دوسری جانب روسی وزارتِ دفاع نے کہا کہ اس نے وسطی اور مشرقی یوکرین میں فوجی اڈوں کو نشانہ بنایا ہے۔
روس کا کہنا ہے کہ اس نے روسی شہری بنیادی ڈھانچے کے خلاف کیئو حکومت کے ’دہشت گرد حملوں‘ کے جواب میں یوکرین کے دفاعی اور توانائی کے بنیادی ڈھانچے پر حملے کیے۔
کیئو کی فوجی انتظامیہ کے سربراہ تیمور تکاچینکو نے کہا کہ ہلاک اور زخمی ہونے والوں میں بچوں کی بھی بڑی تعداد شامل ہے۔
انھوں نے جمعرات کی صبح کہا کہ دشمن ایک بار پھر جان بوجھ کر رہائشی علاقوں کو نشانہ بنا رہا ہے اور شہریوں کو قتل کر رہا ہے۔
کیئو کے میٹرو حکام کے مطابق رات کے دوران بچوں سمیت 52 ہزارسے زائد افراد نے زیرِ زمین سٹیشنوں میں پناہ لیے رہے۔ حکام کا کہنا ہے کہ حالیہ برسوں میں یہ سب سے زیادہ تعداد تھی۔
حملوں میں جنوب مشرقی کیئو میں واقع ایک بلند رہائشی عمارت بھی متاثر ہوئی جس کا ایک حصہ دھماکے سے تباہ ہو گیا۔
حملے کے نتیجے میں ایک کنڈرگارٹن کے قریب ایک بڑا گڑھا بن گیا جبکہ اردگرد کی عمارتیں آگ سے بری طرح متاثر ہوئیں اور ان کی دھات سے بنی بالکونیاں مڑ گئیں۔
ایک دوسرا میزائل چند قدم کے فاصلے پر گرا اور نو منزلہ رہائشی عمارت کے ایک سرے سے ٹکرایا۔ عمارت کا متاثرہ حصہ منہدم ہو کر کنکریٹ کے ملبے کے ڈھیر میں تبدیل ہو گیا۔
ایک مقامی رہائشی نے بی بی سی کو بتایا کہ کئی افراد لاپتہ ہیں۔
علاقے میں تباہ شدہ گاڑیاں، ٹوٹے ہوئے شیشے اور سرمئی راکھ کی موٹی تہہ دیکھی جا سکتی ہے۔
،تصویر کا ذریعہReuters
،تصویر کا کیپشنکیئو کے رہائشیوں کے مطابق اب حملے نسبتاً کم ہوتے ہیں لیکن زیادہ دیر تک جاری رہتے ہیں اور زیادہ وسیع پیمانے پر کیے جاتے ہیں
امدادی کارکن ملبے تلے دبے افراد تک پہنچنے کی کوشش کر رہے ہیں۔ حکام کے مطابق حملہ 11 گھنٹوں سے زیادہ وقت تک جاری رہا اور کئی مراحل میں کیا گیا۔
اس حملے کا آغاز کیئو کے تاریخی علاقے پر ڈرون حملے سے ہوا جس کے نتیجے میں شہر کے مرکز میں واقع ایک ہوٹل میں آگ لگ گئی۔
مقامی وقت کے مطابق رات ایک بجے درجنوں بیلسٹک اور کروز میزائل داغے گئے جس کے بعد ڈرونز کی ایک بڑی تعداد نے طلوعِ فجر تک دارالحکومت کو نشانہ بنایا۔
ساڑھے چار سال سے جنگ کا سامنا کرنے والے کیئو کے رہائشیوں کا کہنا ہے کہ گزشتہ دو ماہ کے دوران روسی حملوں کے انداز میں تبدیلی آئی ہے۔ ان کے مطابق حملے نسبتاً کم ہوتے ہیں لیکن زیادہ دیر تک جاری رہتے ہیں اور زیادہ وسیع پیمانے پر کیے جاتے ہیں۔
حملوں کے بعد یوکرین نے اپنے اتحادیوں سے مزید فضائی دفاعی نظام فراہم کرنے کی اپیل کی ہے۔
صدر زیلینسکی نے واشنگٹن سے درخواست کی ہے کہ یوکرین کو پیٹریاٹ دفاعی میزائل تیار کرنے کے لائسنس دیے جائیں۔
2 جولائی 2026لاہور میں زیرِ تعمیر عمارت کی چھت گرنے سے 10 سالہ بچہ ہلاک، چار افراد زخمی: ریسکیو 1122
،تصویر کا ذریعہRescue 1122
لاہور کے علاقے باغبانپورہ میں زیرِ تعمیر عمارت کی چھت گرنے سے 10 سالہ بچہ ہلاک ہو گیا جبکہ چار افراد زخمی ہو گئے۔
ریسکیو 1122 کے ترجمان کے مطابق اس حادثہ میں ایک بچہ ہلاک ہو گیا جس کی شناخت 10 سالہ عبداللہ سے ہوئی،جبکہ چار لوگ زخمی ہوئے جن کو ابتدائی طبی امداد دینے کے بعد سروسز ہاسپٹل منتقل کیا گیا۔
ریسکیو 1122 کے ترجمان فاروق احمد کے مطابق ریسکیو کنٹرول میں دوپہر 12 بجے کے بعد باغبانپورہ کے علاقے سے چھت گرنے کی کال موصول ہوئی۔
،تصویر کا ذریعہRescue1122
ان کے مطابق ’باغبانپورہ نزد ویمن کالج روڈ لاہور سے فون کال کرنے والے نے ریسکیو 1122 کو بتایا کہ زیر تعمیر عمارت کی تیسری منزل کی چھت گر گئی ہے جس کے بعد فوری طور پر ریسکیو کی سات گاڑیاں امدادی اہلکاروں کے ہمراہ پہنچیں۔‘
واضح رہے کہ منگل کو لاہور کے علاقے کاہنہ میں ٹیوشن سینٹر کی چھت گرنے سے 14 بچے ہلاک ہو گئے تھے۔
2 جولائی 2026آبنائے ہرمز میں امریکی مداخلت پر فیصلہ کن اور فوری جواب دیں گے: ایرانی فوج کا انتباہ
،تصویر کا ذریعہGetty Images
،تصویر کا کیپشنجہاز رانی سے متعلق یونینوں اور کمپنیوں نے گزشتہ روز اعلان کیا تھا کہ آبنائے ہرمز کو کم از کم اگلے آٹھ دن تک ’جنگی آپریشنز زون‘ تصور کیا جائے گا
ایران کے خاتم الانبیاء ہیڈ کوارٹر (ایرانی فوج) نے خبردار کیا ہے کہ ایران کی جانب سے مقرر کردہ بحری راستوں سے انحراف یا ایران کے ضوابط کو نظر انداز کرنے والے جہازوں کی سلامتی خطرے میں پڑ سکتی ہے۔
خاتم الانبیاء ہیڈ کوارٹر نے ایک بیان میں کہا ہے کہ آبنائے ہرمز میں کسی بھی امریکی مداخلت کا ایرانی مسلح افواج کی جانب سے فیصلہ کن اور فوری جواب دیا جائے گا۔
اس بیان میں آبنائے ہرمز کو ایران کی غیر متنازع خودمختاری کے دائرے میں قرار دیتے ہوئے آئل ٹینکرز اور تجارتی جہازوں سمیت تمام بحری جہازوں پر زور دیا گیا ہے کہ وہ محفوظ گزرگاہ کے لیے ایران کے مقرر کردہ راستوں کی پیروی کریں۔
بیان کے مطابق اگر کوئی جہاز ان راستوں سے انحراف کرتا ہے یا ایران کے نیویگیشن پروٹوکول کو نظر انداز کرتا ہے تو مسلح افواج کی جانب سے ’فوری اور سخت ردِعمل‘ سامنے آ سکتا ہے۔
ایرانی فوج نے آبنائے ہرمز کے اوپر امریکی لڑاکا طیاروں اور ڈرونز کی مسلسل موجودگی کو بھی اس اہم آبی گزرگاہ کی سلامتی اور علاقائی استحکام کے لیے خطرہ قرار دیا ہے۔
اس سے قبل ایران کے نائب وزیر خارجہ کاظم غریب آبادی نے سوشل میڈیا پلیٹ فارم ایکس پر دعویٰ کیا تھا کہ ’آبنائے ہرمز کی نگرانی سینٹکام نہیں بلکہ ایران کی کمان کے تحت ہوتی ہے۔‘
دوسری جانب جہاز رانی سے متعلق یونینوں اور کمپنیوں نے گزشتہ روز اعلان کیا تھا کہ آبنائے ہرمز کو کم از کم اگلے آٹھ دن تک ’جنگی آپریشنز زون‘ تصور کیا جائے گا۔
یہ فیصلہ ایران اور امریکہ کے درمیان جنگ بندی کے باوجود دو بحری جہازوں پر حالیہ حملوں کے بعد کیا گیا۔
اُس بیان کے مطابق آبنائے ہرمز کم از کم نو جولائی تک ’جنگی آپریشنز زون‘ رہے گی، جبکہ صورتحال کا ہفتہ وار جائزہ لیا جائے گا۔
2 جولائی 2026شہباز شریف علی خامنہ ای کی نماز جنازہ میں شرکت کریں گے: دفتر خارجہ
،تصویر کا ذریعہGetty Images
ترجمان دفتر خارجہ نے تصدیق کی ہے کہ وزیر اعظم شہباز شریف سابق ایرانی رہبر اعلیٰ آیت اللہ خامنہ ای کی نماز جنازہ میں شرکت کریں گے۔
ہفتہ وار بریفنگ میں ترجمان دفتر خارجہ طاہر اندرابی نے بتایا کہ شہباز شریف ایران اور ترکی کے دورے پر جمعرات کے روز روانہ ہوں گے۔
بیان کے مطابق وزیراعظم شہباز شریف تین سے پانچ جولائی تک ایران اور ترکی کا سرکاری دورہ کریں گے جہاں وہ تہران میں آیت اللہ خامنہ ای کی نمازجنازہ میں شرکت کرنے کے علاوہ دونوں ممالک کی قیادت سے اہم ملاقاتیں بھی کریں گے۔‘
ترجمان کے مطابق وزیراعظم شہباز شریف اپنے دورۂ ایران کے دوران پاکستان کی حکومت اور عوام کی جانب سے ایران کی حکومت اور عوام کے ساتھ اظہارِ یکجہتی کریں گے۔ انھوں نے بتایا کہ وزیراعظم ایران کے سابق سپریم لیڈر آیت اللہ علی خامنہ ای کی نمازجنازہ میں بھی شرکت کریں گے۔
2 جولائی 2026اب تک کی اہم خبروں کا خلاصہ
بی بی سی اردو کی لائیو کوریج کا سلسلہ جاری ہے تاہم اس مرحلے پر ہم آپ کے لیے اہم خبروں کا خلاصہ پیش کر رہے ہیں تاکہ جنھوں نے ابھی ہمیں پڑھنا شروع کیا ہے وہ اب تک کی خبروں سے باخبر رہیں۔
- پاکستان کے صوبہ خیبرپختونخوا میں حالیہ تیز بارشوں، آندھی اور فلیش فلڈ کے نتیجے میں مختلف حادثات میں چھ افراد ہلاک اور 19 زخمی ہوگئے، جبکہ 38 گھروں کو نقصان پہنچا ہے۔
- پاکستان کی وزارتِ خارجہ کے مطابق دوحہ میں پاکستان اور قطر کے ثالثوں نے امریکہ اور ایران کے مذاکرات کاروں سے الگ الگ ملاقاتیں کی ہیں۔ بیان میں کہا گیا ہے کہ مذاکرات کا اگلا دور ایرانی رہبرِ اعلیٰ آیت اللہ علی خامنہ ای کے جنازے کے بعد ہو گا۔
- امریکی فوج نے اعلان کیا ہے کہ بدھ کے روز بحیرہ عرب میں ایک ’ایم ایچ 60 ایس‘ سی ہاک ہیلی کاپٹر کی ہنگامی لینڈنگ کے بعد ایک امریکی سروس ممبر لاپتہ ہو گیا جبکہ تین دیگر اہلکار زخمی ہوئے۔
- امریکہ کے نائب صدر جے ڈی وینس نے کہا ہے کہ صدر ٹرمپ کسی واضح اور متعین مقصد کے بغیر ایران میں فوجی کارروائیاں دوبارہ شروع کرنے کے حق میں نہیں ہیں۔
- قطری وزارتِ خارجہ کے مطابق پاکستان اور قطر کے ثالثوں نے بدھ کو امریکہ اور ایران کے مذاکرات کاروں کے ساتھ الگ الگ ملاقاتیں مکمل کر لی ہیں۔
- ایرانی پارلیمان کے سپیکر محمد باقر قالیباف نے کہا ہے کہ ایران کے جن جوہری مراکز کو بمباری سے نقصان پہنچا ہے، وہاں عالمی توانائی ایجنسی کے معائنہ کاروں کو رسائی کی کسی صورت اجازت نہیں دی جائے گی۔
- سعودی عرب کے وزیرِ داخلہ نے پاکستانی ہم منصب محسن نقوی کے ہمراہ سکیورٹی کے شعبے میں دونوں ممالک کے درمیان تعاون کو فروغ دینے کے لیے ریاض میں مفاہمتی یادداشت پر دستخط کیے ہیں۔
2 جولائی 2026پاکستان کے مختلف شہروں میں 48 گھنٹوں کے دوران تیز آندھی، بارش اور طوفان کے باعث تباہی، 11 افراد ہلاک
،تصویر کا ذریعہZhob Administration
پاکستان کے صوبہ پنجاب، خیبر پختونخوا اور بلوچستان میں دو روز کے دوران بارشوں اور طوفان سے ہونے والی تباہی کے نتیجے میں کم ازکم 11 افراد ہلاک اور متعدد زخمی ہو گئے ہیں۔
سب سے زیادہ صوبہ خیبر پختونخوا متاثر ہوا ہے جہاں گذشتہ 48 گھنٹوں کے دوران تیز بارش، آندھی اور فلیش فلڈز کے باعث گھروں کی چھتیں اور دیواریں گرنے سے سات افراد ہلاک اور 19 افراد زخمی ہوئے ہیں۔
صوبائی ڈیزاسٹر مینجمنٹ اتھارٹی (پی ڈی ایم اے) کے مطابق ہلاک ہونے والوں میں دو مرد، چار بچے اور ایک خاتون شامل ہیں۔
پی ڈی ایم اے کے مطابق تیز بارشوں اور فلیش فلڈز کے باعث مجموعی طور پر 38 گھروں کو نقصان پہنچا جس میں 36 گھروں کو جزوی جبکہ دو گھر مکمل طور پر منہدم ہو گئے۔
،تصویر کا ذریعہZhob Administration
پنجاب میں گذشتہ 24 گھنٹوں کے دوران بارش اور آندھی سے دیواریں اور چھتیں گرنے سے دو افراد ہلاک اور نو زخمی ہوئے ہیں۔
ترجمان ریسکیو 1122 پنجاب کے مطابق اٹک میں تیز آندھی اور بارش کے باعث دیوار گرنے سے دو افراد جان کی بازی ہار گئے جبکہ تین افراد زخمی ہوئے ہیں۔
ترجمان کے مطابق خوشاب میں آسمانی بجلی گرنے سے ایک شخص زخمی ہوا جبکہ سرگودھا میں تیز آندھی اور بارش کے باعث سائن بورڈ گرنے سے ایک شخص زخمی ہوا۔
بلوچستان کے ضلع ژوب میں بارشوں کے باعث ایک ہی خاندان کے دو افراد ہلاک اور تین زخمی ہو گئے۔ سرکاری حکام کے مطابق یہ واقعہ شہر کی نئی آبادی والے علاقے اکاخیل میں پیش آیا۔
ژوب شہر اور اس کے نواحی علاقوں میں طوفانی بارشیں ہوئیں جس کے نتیجے میں اس علاقے میں واقع مکان کے ایک کمرے کی چھت گر گئی۔
ان کا کہنا تھا کہ اس واقعے میں خاندان کی ایک خاتون اور دو بچے زخمی ہو گئے۔ زخمیوں کو طبی امداد کی فراہمی کے لیے ژوب منتقل کردیا گیا۔
2 جولائی 2026پاکستان اور سعودی عرب کے درمیان سکیورٹی کے شعبے میں مفاہمتی یادداشت پر دستخط
،تصویر کا ذریعہ@AbdulazizSNA
سعودی عرب کے وزیرِ داخلہ نے پاکستانی ہم منصب محسن نقوی کے ہمراہ سکیورٹی کے شعبے میں دونوں ممالک کے درمیان تعاون کو فروغ دینے کے لیے ریاض میں مفاہمتی یادداشت پر دستخط کیے ہیں۔
سعودی وزیرِ داخلہ عبدالعزيز بن سعود بن نايف کی جانب سے جاری کیے گئے بیان میں کہا گیا ہے کہ ’ہم نے دونوں ممالک کے درمیان سکیورٹی تعاون کو مضبوط بنانے کے لیے اپنے مشترکہ عزم کا اعادہ کیا اور سکیورٹی کے شعبے میں ایک مفاہمت کی یادداشت پر دستخط کیے۔‘
اُن کا کہنا تھا کہ یہ اقدام مملکت اور اسلامی جمہوریہ پاکستان کے درمیان سٹریٹجک شراکت کی مضبوطی اور دیرینہ تعلقات کی وسعت کا عکاس ہے۔
دورے کے دوران پاکستان کے وزیرِ داخلہ نے ریاض ریجن میں متحدہ سکیورٹی آپریشنز سینٹر 911 کا دورہ کیا۔
2 جولائی 2026امریکہ اور ایران کے درمیان مذاکرات کا اگلا دور آیت اللہ خامنہ ای کے جنازے کے بعد ہو گا: ترجمان پاکستانی وزارتِ خارجہ
پاکستان کی وزارتِ خارجہ کے مطابق دوحہ میں پاکستان اور قطر کے ثالثوں نے امریکہ اور ایران کے مذاکرات کاروں سے الگ الگ ملاقاتیں کی ہیں۔
وزارتِ خارجہ کے بیان میں کہا گیا ہے کہ بات چیت میں سوئٹزرلینڈ مذاکرات اور اسلام مفاہمتی یادداشت پر پیش رفت ہوئی ہے۔
بیان میں کہا گیا ہے کہ مذاکرات کا اگلا دور ایرانی رہبرِ اعلیٰ آیت اللہ علی خامنہ ای کے جنازے کے بعد ہو گا۔
2 جولائی 2026یوکرین کے دارالحکومت کیئو میں روسی میزائل اور ڈرون حملہ، کم از کم 13 افراد ہلاک
،تصویر کا ذریعہAFP via Getty Images
یوکرین کے دارالحکومت کیئو میں بدھ اور جمعرات کی درمیانی شب روسی میزائل اور ڈرون حملے میں کم از کم 13 افراد ہلاک ہو گئے ہیں۔
وسطی اور مشرقی کیئو میں موجود اے ایف پی کے صحافیوں نے 12 سے زائد دھماکوں کی آوازیں سنیں اور رہائشیوں کو پناہ گاہوں کے طور پر استعمال ہونے والے میٹرو سٹیشنز کی جانب تیزی سے جاتے ہوئے دیکھا۔
کیئو کے میئر نے ٹیلی گرام پر کہا کہ کیئو پر بیلسٹک میزائلوں اور ڈرونز سے بمباری کی جا رہی ہے اور پورے شہر میں دھماکوں کی آوازیں سنی جا سکتی ہیں۔
روس نے فروری 2022 میں اپنے حملے کے آغاز کے بعد سے یوکرین کے شہروں بشمول کیئو پر اپنے میزائل اور ڈرون حملے جاری رکھے ہوئے ہیں۔
یہ حملہ یوکرین کی فضائیہ کی جانب سے دارالحکومت کے قریب آنے والے بیلسٹک میزائلوں کے بارے میں جاری کردہ انتباہ کے بعد ہوا۔
زیلنسکی نے بدھ کو انٹیلی جنس اطلاعات موصول ہونے کے بعد ڈبلن کا اپنا دورہ یہ کہتے ہوئے مختصر کر دیا کہ روس ان کے ملک پر حملہ کرنے کی تیاری کر رہا ہے۔
اُنھوں نے ایک پریس کانفرنس میں کہا کہ میں اپنے لوگوں پر زور دیتا ہوں کہ وہ انتہائی احتیاط برتیں، اپنے بچوں اور اپنے اہلخانہ کی حفاظت کریں اور بنکروں میں پناہ لیں۔
اُن کا کہنا تھا ک روسی یوکرین کے خلاف اس بڑے حملے کی تیاری طویل عرصے سے کر رہے ہیں۔
2 جولائی 2026صدر ٹرمپ کسی واضح مقصد کے بغیر ایران میں دوبارہ فوجی کارروائی کے حق میں نہیں ہیں: نائب صدر وینس
،تصویر کا ذریعہGetty Images
امریکہ کے نائب صدر جے ڈی وینس نے کہا ہے کہ صدر ٹرمپ کسی واضح اور متعین مقصد کے بغیر ایران میں فوجی کارروائیاں دوبارہ شروع کرنے کے حق میں نہیں ہیں۔
بدھ کو صحافیوں سے گفتگو کرتے ہوئے جے ڈی وینس کا کہنا تھا کہ ’میں جس بات کی تصدیق کر سکتا ہوں وہ یہ ہے کہ صدر ٹرمپ ہماری فوج کو دوبارہ وہاں بھیجنے کے خواہشمند نہیں ہیں، جب تک کہ ایسا کرنا ناگزیر نہ ہو جائے۔‘
امریکی نائب صدر نے خبردار کیا کہ ایران کی جانب سے اپنے جوہری پروگرام کی بحالی یا تجارتی جہازوں کو نشانہ بنانے کی کوئی بھی کوشش واشنگٹن کو اپنی حکمت عملی تبدیل کرنے پر مجبور کر سکتی ہے۔
وینس نے تصدیق کی کہ دوحہ میں ہونے والے مذاکرات ’اچھے انداز میں آگے بڑھ رہے ہیں‘ اور اس بات کا اعادہ کیا کہ امریکی انتظامیہ اب بھی ’نیک نیتی‘ کے ساتھ ان مذاکرات پر توجہ مرکوز رکھے ہوئے ہے۔
2 جولائی 2026’ہمیں تنگ کرنا اور ٹرمپ کے الفاظ دہرانا بند کریں‘، باقر قالیباف ایران-امریکہ مذاکرات کے ناقدین پر برہم
،تصویر کا ذریعہIRIB
ایرانی پارلیمان کے سپیکر محمد باقر قالیباف نے کہا ہے کہ ایران کے جن جوہری مراکز کو بمباری سے نقصان پہنچا ہے، وہاں عالمی توانائی ایجنسی کے معائنہ کاروں کو رسائی کی کسی صورت اجازت نہیں دی جائے گی۔
ایک انٹرویو میں باقر قالیباف کا کہنا تھا کہ ایران کی پارلیمنٹ اور سپریم نیشنل سکیورٹی کونسل نے اس قانون کی منظوری دی ہے جس کے تحت ان معائنہ کاروں کو دی جانے والی رسائی کا تعین کیا جائے گا۔
اُن کا کہنا تھا کہ قانون کے مطابق جن مقامات پر بمباری ہوئی ہے اور جو مقامات متاثر ہوئے ہیں، ان تک کسی صورت بھی رسائی نہیں جائے گی۔
امریکہ اور ایران کے درمیان مذاکرات پر بعض اندرونی حلقوں کی جانب سے تنقید پر سخت جواب دیتے ہوئے باقر قالیباف کا کہنا تھا کہ سوئٹزرلینڈ میں امریکی حکام سے مذاکرات میں ایران چھ ارب ڈالرز کے منجمد اثاثوں سے متعلق دستاویز کو حتمی شکل دینے میں کامیاب رہا ہے۔
مذاکرات اور مذاکراتی ٹیم کی کارکردگی پر ہونے والی اندرونی تنقید کا حوالہ دیتے ہوئے اُنھوں نے ناقدین سے کہا کہ ’آپ لوگ جو نہ تو سفارت کاری میں مدد کرتے ہیں اور نہ ہی جنگ میں، ہمیں تنگ کرنا اور ٹرمپ کے الفاظ دہرانا بند کریں... یہ مناسب نہیں ہے۔ عوام کو پرسکون رہنے دیں اور اسلامی جمہوریہ پر فخر کرنے دیں۔‘
2 جولائی 2026برطانیہ میں 26 سال بعد ایک ماہ کے دوران ڈیزل کی قیمت میں بڑی کمی کی وجہ کیا ہے؟
،تصویر کا ذریعہMaskot/Getty Images
برطانیہ میں جون میں ڈیزل کی فی لیٹر قیمت میں 17 پینس کی کمی ہوئی ہے۔ یہ 26 سال بعد برطانیہ میں ایک ماہ کے دوران ڈیزل کی قیمتوں میں سب سے بڑی کمی ہے۔
جب 28 فروری کو ایران کے ساتھ امریکہ اسرائیل جنگ شروع ہوئی تو ایندھن کی قیمتوں میں اضافہ ہوا کیونکہ تنازعہ نے مشرق وسطیٰ میں توانائی کی پیداوار اور نقل و حمل کو بری طرح متاثر کیا۔
تاہم، جب سے امریکہ اور ایران نے جون میں لڑائی ختم کرنے کے لیے ایک فریم ورک ڈیل پر اتفاق کیا تھا، قیمتیں گھٹ گئی ہیں۔
برطانیہ کے رائل آٹو موبائل کلب (آر اے سی) کے مطابق قیمتیں ابھی بھی ایران جنگ سے پہلے والی نہیں ہیں۔
آر اے سی کے مطابق 28 مئی کو پیٹرول کی اوسط قیمت 53-159 پینس فی لیٹر کی بلند ترین سطح پر پہنچ گئی تھی جبکہ ڈیزل کی فی لیٹر قیمت 54-191 پینس فی لیٹر کی بلند ترین سطح پر تھی۔ ایک برطانوی پاؤنڈ میں 100 پینس ہوتے ہیں۔
اس کے بعد سے قیمتوں میں نمایاں کمی آئی ہے۔ آر اے سی کا کہنا ہے کہ جون کے دوران ڈیزل کی اوسط قیمت 183.75 پینس فی لیٹر سے کم ہو کر 167.14 پینس فی لیٹر پر آ گئی۔
اسی عرصے کے دوران پیٹرول کی اوسط قیمت 159.37 پینس فی لیٹر سے کم ہو کر 151.40 پینس فی لیٹر ہو گئی۔
تاہم، آر اے سی کا کہنا ہے کہ قیمتیں اب بھی تنازعے کے آغاز سے قبل کی سطح کے مقابلے میں کافی زیادہ ہیں؛ اس وقت پیٹرول کی اوسط قیمت 132 پینس فی لیٹر اور ڈیزل کی اوسط قیمت 142 پینس فی لیٹر تھی۔
تنازعے کے باوجود، پیٹرول اور ڈیزل کی قیمتیں ان سطحوں سے نیچے ہیں جو یوکرین پر روس کے حملے کے بعد 2022 کے موسمِ گرما میں دیکھی گئی تھیں، جب پیٹرول 191.5 پینس فی لیٹر اور ڈیزل 199 پینس تک پہنچ گیا تھا۔
مشرقِ وسطیٰ کے تنازعے نے عالمی سطح پر تیل کی قیمتوں میں زبردست اضافہ کر دیا ہے کیونکہ اس کے نتیجے میں آبنائے ہرمز بند ہو گئی تھی جو دُنیا کے 20 فیصد تیل اور گیس کی آمدورفت کا ذریعہ ہے۔
برطانیہ تیل اور گیس کی درآمدات پر بہت زیادہ انحصار کرتا ہے، جن میں سے زیادہ تر امریکہ اور ناروے سے آتی ہیں۔
عالمی منڈی میں تیل کی قیمت اس بات کا تعین کرتی ہے کہ برطانیہ اس کے لیے کتنی قیمت ادا کرتا ہے۔
2 جولائی 2026دوحہ میں امریکہ اور ایران کے درمیان بلواسطہ مذاکرات میں پیش رفت ہوئی ہے: قطری وزارتِ خارجہ
قطری وزارتِ خارجہ کے مطابق پاکستان اور قطر کے ثالثوں نے بدھ کو امریکہ اور ایران کے مذاکرات کاروں کے ساتھ الگ الگ ملاقاتیں مکمل کر لی ہیں۔
بیان میں کہا گیا ہے کہ برگن سٹاخ سربراہی اجلاس کے نتائج کی بنیاد اور ’اسلام آباد مفاہمت یادداشت‘ سے متعلق اُمور پر مثبت پیش رفت ہوئی ہے۔
قطری وزارتِ خارجہ کے مطابق فریقین نے آئندہ عرصے میں بات چیت جاری رکھنے پر اتفاق کیا ہے اور ایرانی کے سابق سپریم لیڈر آیت اللہ علی خامنہ ای کے جنازے کے بعد بات جلد از جلد دوبارہ مذاکرات کیے جائیں گے۔
2 جولائی 2026بریکنگ, بحیرہ عرب میں امریکی ہیلی کاپٹر حادثے کا شکار، ایک فوجی لاپتہ، تین زخمی
،تصویر کا ذریعہGetty Images
،تصویر کا کیپشنفائل فوٹو
امریکی فوج نے اعلان کیا ہے کہ بدھ کے روز بحیرہ عرب میں ایک ’ایم ایچ 60 ایس‘ سی ہاک ہیلی کاپٹر کی ہنگامی لینڈنگ کے بعد ایک امریکی سروس ممبر لاپتہ ہو گیا جبکہ تین دیگر اہلکار زخمی ہوئے۔
امریکی بحریہ کی جانب سے جاری بیان میں بتایا گیا ہے کہ ابتدائی معلومات اور اطلاعات کے مطابق اس واقعے میں کسی بھی جانب سے ہیلا کاپٹر کو نشانہ بنائے جانے کا کوئی اشارہ نہیں ملا ہے۔‘
بحریہ کے مطابق ’علاقے میں موجود نیوی یونٹس لاپتہ عملے کی تلاش میں مصروف ہیں جبکہ حادثے کی وجوہات کی تحقیقات جاری ہیں۔‘
بیان میں مزید کہا گیا ہے کہ ’یہ ہیلی کاپٹر بحری بیڑے یو ایس ایس جارج ایچ ڈبلیو بش کے ساتھ خطے میں نگرانی کے لیے تعینات تھا۔‘
ماہرین کا کہنا ہے کہ ’پانی پر موجود بیڑے یا بحری جہاز پر ہیلی کاپٹر کی لینڈنگ انتہائی خطرناک ثابت ہو سکتی ہے حتیٰ کہ تجربہ کار پائلٹس کے لیے بھی، کیونکہ زیادہ اونچے مرکزِ ثقل کے باعث پانی کی صطح پر موجود بیڑے پر اترنے کے بعد ہیلی کاپٹر الٹنے کا خطرہ ہوتا ہے۔‘
2 جولائی 2026خیبرپختونخوا میں بارشوں اور فلیش فلڈ سے چھ افراد ہلاک، 19 زخمی: پی ڈی ایم اے
،تصویر کا ذریعہGetty Images
،تصویر کا کیپشنفائل فوٹو
پاکستان کے صوبہ خیبرپختونخوا میں حالیہ تیز بارشوں، آندھی اور فلیش فلڈ کے نتیجے میں مختلف حادثات میں چھ افراد ہلاک اور 19 زخمی ہوگئے، جبکہ 38 گھروں کو نقصان پہنچا ہے۔
صوبہ خیبرپختونخوا میں قدرتی آفات سے نمٹنے والے ادارے کے ترجمان کے مطابق ہلاک ہونے والوں میں دو مرد، تین بچے اور ایک خاتون شامل ہیں، جبکہ زخمیوں میں سات مرد، ایک خاتون اور گیارہ بچے شامل ہیں۔
پی ڈی ایم اے کے ترجمان کی جانب سے جاری ہونے والے بیان میں کہا گیا ہے کہ ’شدید بارشوں اور فلیش فلڈ کے باعث مجموعی طور پر 38 گھروں کو نقصان پہنچا، جن میں 36 گھروں کو جزوی جبکہ دو گھر مکمل طور پر منہدم ہوگئے۔
ترجمان کے مطابق یہ حادثات ضلع خیبر، لوئر دیر، اپر دیر، مردان، شانگلہ، باجوڑ اور لوئر چترال میں پیش آئے۔
پی ڈی ایم اے نے بتایا کہ ریسکیو 1122، ضلعی انتظامیہ اور دیگر متعلقہ ادارے باہمی رابطے میں ہیں اور متاثرہ علاقوں میں امدادی سرگرمیاں جاری ہیں۔ ادارے نے متاثرہ اضلاع کی انتظامیہ کو ہدایت کی ہے کہ متاثرین کو جلد از جلد امدادی سامان فراہم کیا جائے اور امدادی کارروائیوں میں مزید تیزی لاتے ہوئے متاثرین کو فوری معاونت فراہم کی جائے۔
ڈی جی پی ڈی ایم اے نے عوام سے اپیل کی ہے کہ بلا ضرورت سفر سے گریز کریں، حساس سیاحتی مقامات کا رخ نہ کریں اور موسمی صورتحال کے حوالے سے جاری حکومتی الرٹس اور ایڈوائزری پر عمل کریں۔
1 جولائی 2026کالام کی سیف اللہ جھیل میں کشتی حادثہ، چھ افراد ہلاک: ریسکیو 1122
،تصویر کا ذریعہUpper swat development authority
سوات کے علاقے کالام کی سیف اللہ جھیل میں سیاحوں سے بھری کشتی کو حادثہ پیش آگیا ہے۔ ریسکیو 1122 نے اس حادثے میں چھ افراد کے ہلاک ہونے کی تصدیق کی ہے۔
ریسکیو 1122 کے مطابق ابتدائی اطلاعات کے تحت کشتی میں سوار سیاحوں کا تعلق صوبہ پنجاب سے تھا۔
بی بی سی کے نامہ نگار عزیز اللہ خان کو ڈی سی سہیل خان نے اس حادثے کی تصدیق کرتے ہوئے بتایا کہ متاثرہ افراد کی لاشوں کو سول ہسپتال منتقل کیا جا رہا ہے۔
ڈپٹی کمشنر سہیل خان نے مزید بتایا کہ ’ ان کے مطابق جھیل سیف اللہ پر اکثر سیاح اس موسم میں گھومنے آتے ہیں تاہم یہاں سیکشن 144 نافذ تھا اور اس دوران اہلکاروں کو بھی تعینات کیا جاتا ہے۔
ان کا کہنا تھا کہ وہ خود اب کالام ہسپتال جا رہے ہیں جہاں معلوم ہو سکے گا کہ کل کتنا نقصان ہوا ہے اور کشتی میں سوار افراد کی تعداد کتنی تھی۔
ریسکیو 1122 کے بیان کے مطابق سوات کے کنٹرول روم کو سیف اللہ جھیل کالام میں کشتی حادثے کی اطلاع موصول ہونے پر امدادی ٹیمیں اور ایمبولینسز فوری طور پر جائے وقوع کی جانب روانہ کر دی گئیں۔
گورنر خیبرپختونخوا فیصل کریم کنڈی نے کالام کشتی حادثے میں قیمتی انسانی جانوں کے ضیاع پر دلی دکھ اور افسوس کا اظہار کیا ہے اور اپنے بیان میں کہا ہے کہ متعلقہ ادارے لاپتہ افراد کی تلاش تک سرچ آپریشن بلا تعطل جاری رکھیں جبکہ انھوں نے سیاحتی مقامات پر حفاظتی اقدامات اور کشتی رانی کے قواعد پر سختی سے عملدرآمد یقینی بنانے کی ہدایات بھی جاری کی ہیں۔