You’re viewing a text-only version of this website that uses less data. View the main version of the website including all images and videos.
Why Israel reject Trump plan to disarm Hamas and im 15-point plan for Gaza
Israeli Prime Minister Benjamin Netanyahu don reject US President Donald Trump 15-point plan for Gaza.
E tok say no military pull-out go happun until Hamas don "genuinely" disarm.
Trump Board of Peace for last month tok say dem don reach agreement for di "complete disarmament" of Hamas plus oda armed groups for Gaza.
But Hamas tok say if dem want make dem hand ova dia heavy weapons, di condition na say Israel must end "all forms of aggression" and withdraw dia forces from Gaza.
Israel don continue to carry out strikes on Gaza since dem agree to one initial ceasefire for di territory last October.
"Israel don reject di 15-point document," Netanyahu tok for one cabinet meeting on Sunday.
Di Israeli military "no go carry out any withdrawal until Hamas don genuinely disarm and go continue to thwart threats against our forces and our citizens", e add.
One Hamas official tell BBC on Sunday say di group "reaffirm dia commitment" to di agreement and dem ready "to engage seriously and responsibly in implementing" di 15-point plan.
End of Di one wey oda users dey read well well
Dem call on di mediators to ensure "say all parties comply wit wetin dey agreed on".
Dis signal anoda blow for Trump Gaza peace plan wey dem announce for September last year.
Di plan include di creation of di Board of Peace to oversee di agreement implementation, di disarmament of Hamas, withdrawal of Israeli troops and reconstruction of Gaza.
Netanyahu statement does no come as surprise.
But e bin take some time to do am, maybe bicos e dey reason di difficult position di Israeli leader dey inside.
Clearly, e no dey happy wit Trump plan, but at di same time, im no wan vex for im closest ally.
Na recently, Trump bin announce wetin e call "monumental step toward lasting peace and security" - e say for di first time, Hamas don agree to disarm, on di condition say Israel go withdraw dia forces from Gaza.
On Sunday, Netanyahu make am clear say dat no go happun under im watch. E say Hamas disarm first, and e say di "disarmament no go be fake" - e gatz dey real.
Di reality na say any disarmament and withdrawal of Israeli forces go likely happun in phases.
Netanyahu say im dey discuss wit US officials now about how to go forward.
"Dem get ideas; some of dem dey acceptable to us and some no dey, and we know how to stand our ground on these matters," e tok.
Just months bifor Israeli elections, di Israeli prime minister most likely no go like make compromises.
E don face calls from im far-right allies to hold a new cabinet vote and end di Gaza plan, wey include National Security Minister Itamar Ben Gvir wey dismiss di draft as "not acceptable".
According to di United Nations, about 1.9 million pipo - 90% of Gaza population - dey displaced for di territory since di war for Gaza start.
Di war bin dey triggered by di Hamas-led attack on southern Israel on 7 October 2023, wey lead to di death of about 1,200 pipo and dem take 251 odas hostage.
Israel bin respond to di attack as dem launch one military campaign for Gaza, during which more dan 73,000 pipo dey killed, according to di territory health ministry, whose figures di United Nations consider reliable.
