As E Dey Happen, Osun governorship election live updates: Vote counting don start for Osun poll - PDP chairman chop arrest

Live Coverage

Victor Ezeama and Adebola Ajayi

1. 15 minutes wey don passGovnor Ademola Adeleke condemn alleged arrest of Osun PDP chairman

   Di govnor of Osun State and candidate of di Accord Party for di ongoing election don condemn di alleged arrest of state Peoples Democratic Party chairman, Sunday Bisi.

   Di govnor say security pipo gbab Sunday Bisi for im house afta e cast im vote.

   “Information wey reach me indicates say Hon. Bisi bin dey accosted for im home for Ilesa shortly afta e returned afta voting, and dem take am away to location wey neva dey known,” e tok for statement.

   E say di security pipo no tell anyone di reason for im arrest.

2. one hour wey don passSorting and counting of votes don start for some polling units

   Sorting and counting of votes don start for some polling units for Osun State as di govnorship election still dey go on.

   Electoral officials don begin count votes for Unit 1, Ward 1, Itakogun/Egbe-Idi, Ilesa West LGA, Osun East Senatorial District.

   Counting of ballot papers don also start for Polling Unit 007, Ward 02, Ede North.

   Meanwhile, confusion dey for Polling Unit 007, Ward 02, Ede North ova void votes on ballot paper.

   Di Coordinating DIG for di Osun State Govnorship Election Isyaku Mohammed, during one aerial surveillance and real-time monitoring of security deployments across di state tok say di police tanda gidigba to protect lives and secure di electoral process.

3. one hour wey don passFormer Osun state govnor Adegboyega Oyetola don cast im vote

   Former govnor of Osun State Adegboyega Oyetola don cast im vote for di Ward 1, Unit 10, Iragbiji, for di ongoing election.

   Oyetola wey also be di Minister of Marine and Blue Economy tok say di voting exercise dey peaceful across di state.

   E advise evrione to remain peaceful and allow di will of di pipo to prevail. Oyetola also tok say pipo turn out well-well for di exercise.

   Oyetola also hail di security personnel for dia professionalism and dedication to maintain peace throughout di exercise.

4. one hour wey don passParty agents for one polling unit unite for peace

   Party agents gada togeda to show say dem dey peaceful during di election process.

   At least dem unite to show say kasala no dey for dia side, evriwia dey okay.

5. 2 hours wey don passLines for some polling units dey empty but pipo wey don vote dey wait for counting

   For some areas, voters no too show face like dat.

   BBC News Pidgin tori pesin wey dey cova di election say for polling unit 001 Baptist Day Primary School, Ward 09 Ojo/Aro Egbedore LGA, out of ova 700 registered voters na only 300 pipo don vote so far.

   E send dis tori around few minutes past 1pm for afternoon.

   Di line dey empty. Plenti pipo neva come out to come vote, while dose wey don vote still hang around to wait for counting of votes.

6. 2 hours wey don passOsun election 2026: Young pipo still come out to vote, Even though some polling unit dey almost empty odas get plenti pipo

   Young pipo come out to cast dia vote for di Osun State govnorship election.

   While some polling unit dey almost empty, Polling unit 10 Ejigbo get crowd.

   Voting process dey go on as men and women queue for different lines to cast dia votes.

   Some.young voters also dey queue as dem dey enjoy di peaceful process.

7. 2 hours wey don passOsun State election result across 30 LGAs

8. 3 hours wey don passADC candidate comot from wia dem destroy im polling unit, Tori be say pipo bin no know wia im dey wen di kasala happun

   Tori pipo don confam say di candidate of di African Democratic Congress (ADC) safely comot for di area wey kasala bin happun.

   Tori be say e escape through anoda route.

   Kasala bin burst for di African Democratic Congress (ADC) candidate polling unit.

   BBC News Pidgin tori pesin wey dey on ground wen e happun tok say some guys come di polling unit wia dem break all di ballot box.

   According to him police showface for di polling unit to intervene for di mata.

9. 3 hours wey don passFotos of destruction wey happun for ADC candidate polling unit

   Dis na fotos of di destruction wey happun almost immediately afta di African Democratic Congress (ADC) govnorship Candidate Najeem Salam cast im vote for Polling unit 13 Ward 04 Ejigbo LGA

   BBC News Pidgin tori pesin wey bin dey on ground wen e happun tok say some guys come di polling unit and dem break all di ballot box.

   According to him police showface for di polling unit to intervene for di mata.

   Nigeria secret police di DSS don arrest di man.

10. 4 hours wey don passMoment wey thugs scata polling unit wia ADC candidate vote

    We don confam say candidate of di ADC Najeem Salam don comot for di area wey violence happun.

    E escape through anoda route.

11. 4 hours wey don passBreaking, APC candidate Bola Oyebamiji cast im vote

    Bola Oyebamiji, govnorship candidate of All Progressives Congress (APC) don cast im vote for im polling unit, for Irewole for Osun State on Saturday.

    Di candidate arrive for im polling unit 11, ward 9, Gantry Are for Ikire, Irewole LGA wit im wife and party faithfuls to vote dis morning.

    Na 15 candidates dey contest for di election, including di top contenders, Ademola Adeleke of Accord Party and Bola Oyebamiji of All Progressive Party.

    Osun get 2,339,233 registered voters, but na only 1,906,390 of dem, wey be 81.50%, don collect dia Permanent Voter Cards (PVCs) wey dey eligible to participate for di Saturday poll.

12. 4 hours wey don passAbout 100 pipo dey police custody for di last one month - Osun State Commissioner of Police tok

    Osun State Commissioner of Police wey dey in charge of di 2026 election, Mr Erale Samuel Etaif say dem don arrest about 100 pipo.

    Im add say di pipo wey dey dia custody come from neighbouring states of Ondo and Ekiti to scata di election for di past one month.

    Howeva, im clarify say dem neva arrest anybody becos of electoral violence today (election day)

13. 5 hours wey don passDSS arrest man wey cause kasala for ADC candidate polling unit

    Kasala burst for di African Democratic Congress (ADC) candidate polling unit.

    BBC News Pidgin tori pesin wey dey on ground wen e happun tok say some guys come di polling unit wia dem break all di ballot box.

    According to him police showface for di polling unit to intervene for di mata.

    "We no know wia di ADC candidate dey currently...some guys don scata dis polling unit" im tok

    Latest tori be say Nigeria secret police di DSS don arrest di man.

14. 5 hours wey don passHusband carry im wife wey no fit waka to go vote

    Elderly husband and wife come to vote.

    Even though di mama no fit waka, she still try come out to vote for Polling unit 13 Ward 04 Ejigbo LGA

15. 5 hours wey don passOsun state govnor Ademola Adeleke call for free and fair election

    Govnor of Osun State, Ademola Adeleke don call on di Inspector General of Police, Olatunji Disu say dem want only free and fair elections for di Osun state election.

    Di Accord Party gubernatorial candidate tok dis on Saturday morning afta im cast im vote for ward 2, Ede North, Osun State as im dey run for im second term in office.

    Adeleke tok say dem no want any kasala for Osun State during dis govnorship election.

    Adeleke tok say make police no just move di ballot paper go di state capital as e suppose go ward, local govment bifor e go reach di capital.

    "I don tell di inspector general of police say we no want violence. Na free and fair election we want," Adeleke tok.

16. 5 hours wey don passBreaking, ADC govnorship candidate Najeem Salam don vote

    African Democratic Congress (ADC) govnorship Candidate Najeem Salam don cast im vote for Polling unit 13 Ward 04 Ejigbo LGA

17. 6 hours wey don passAllegations of vote buying dominate Osun election

    Tori of alleged vote buying dey happun for some polling units for di Osun State govnorship election.

    Polling Unit 13 Iroyin Ayo Open Space Ward 04 Ejigbo LGA

    around 10:17am dem see case of vote buying and vote selling.

    Dem catch some party members wey dey carry cash dey try buy pipo vote.

    Di voters catch dem and collect di money from dem.

18. 6 hours wey don passBola Tinubu tell Inec to avoid mago-mago, Many threats and alleged tori of attack bin dey fly upandan during di build-up to di election

    President Tinubu tell Inec, security pipo to make sure say magomago no dey for Osun govnorship election and make dem dey peaceful, transparent, and credible.

    Oga Tinubu tok for statement on Friday wey im Special Adviser on Information and Strategy, Bayo Onanuga post ahead of di election on Saturday, 15 August, 2026.

    “As di pipo of Osun State dey go dia polling units to elect vote who go govern dem for di next four years, I call on di Independent National Electoral Commission to ensure orderly conduct of di election.

    Di election must dey transparent, free and fair. I urge Inec to ensure di integrity of di process”

19. 7 hours wey don passVoting stop for Ademola Adeleke PU sake of poor internet

    Voters wey dey on ground for polling unit 9, ward 2, Ede North, Osun state complain about di slow electoral process for dia polling unit due to di poor internet connection for di area.

    Dis na di polling unit wia Osun state govnor, Ademola Adeleke just cast im votes some minutues ago

    Di voters tok say di BVAS for di polling unit dey dey function slowly and e make am difficult for INEC officials to accredit voters.

    As at 8:33 am, Ademola Adeleke bin arrive for di polling unit wit im party supporters to cast im vote for Ward 2, Abogunde Compound, Ede North for during di Osun state govnorship election.

    Di flagbearer for di Accord Party dey bid to return back into office for im second term.

20. 7 hours wey don passBreaking, Govnor Adeleke don vote

    Governor Ademola Adeleke don cast im vote for im polling unit 9, ward 2 for Ede North Local Government Area of di state.

    Our tori pesin Adesola Abisoye say di govnor come di polling unit wit some members of im family.

    E vote around 8:33am.

    Di govnor follow for one of di first voters.