You’re viewing a text-only version of this website that uses less data. View the main version of the website including all images and videos.
ਡੌਨਲਡ ਟਰੰਪ ਨੇ ਮੰਨਿਆ ਕਿ ਈਰਾਨ ਦੇ ਸੰਭਾਵਿਤ ਹਮਲੇ ਦੇ ਖ਼ਤਰੇ ਕਾਰਨ ਉਨ੍ਹਾਂ ਨੇ ਚੁੱਪਚਾਪ ਆਪਣਾ ਜਹਾਜ਼ ਬਦਲਿਆ ਸੀ
ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਪੁਸ਼ਟੀ ਕੀਤੀ ਹੈ ਕਿ ਪਿਛਲੇ ਮਹੀਨੇ ਤੁਰਕੀ ਵਿੱਚ ਨਾਟੋ ਸੰਮੇਲਨ ਤੋਂ ਰਵਾਨਾ ਹੁੰਦੇ ਸਮੇਂ ਉਨ੍ਹਾਂ ਨੇ ਚੁੱਪਚਾਪ ਜਹਾਜ਼ ਬਦਲ ਲਿਆ ਸੀ। ਇਹ ਸੰਭਾਵਿਤ ਖ਼ਤਰੇ ਦੇ ਕਾਰਨ ਕੀਤਾ ਗਿਆ ਸੀ।
ਟਰੰਪ ਨੇ ਮੰਗਲਵਾਰ ਨੂੰ ਪੱਤਰਕਾਰਾਂ ਨੂੰ ਕਿਹਾ, "ਮੈਂ ਸੀਕ੍ਰੇਟ ਸਰਵਿਸ ਅਤੇ ਫ਼ੌਜ ਦੀ ਗੱਲ ਮੰਨਦਾ ਹਾਂ। ਉਹ ਚਾਹੁੰਦੇ ਸਨ ਕਿ ਮੈਂ ਕਿਸੇ ਹੋਰ ਉਡਾਣ ਅਤੇ ਕਿਸੇ ਹੋਰ ਜਹਾਜ਼ ਰਾਹੀਂ ਜਾਵਾਂ। ਮੈਨੂੰ ਉਹੀ ਕਰਨਾ ਸੀ, ਜੋ ਉਨ੍ਹਾਂ ਨੇ ਕਿਹਾ।"
ਇਹ ਜਾਣਕਾਰੀ ਉਨ੍ਹਾਂ ਰਿਪੋਰਟਾਂ ਤੋਂ ਬਾਅਦ ਸਾਹਮਣੇ ਆਈ ਹੈ, ਜਿਨ੍ਹਾਂ ਵਿੱਚ ਕਿਹਾ ਗਿਆ ਸੀ ਕਿ 8 ਜੁਲਾਈ ਨੂੰ ਟਰੰਪ ਟੈਲੀਵਿਜ਼ਨ ਕੈਮਰਿਆਂ ਦੀ ਮੌਜੂਦਗੀ ਵਿੱਚ ਏਅਰ ਫ਼ੋਰਸ ਵਨ ਵਿੱਚ ਸਵਾਰ ਹੋਏ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਇੱਕ ਕੈਟਰਿੰਗ ਟਰੱਕ ਦੀ ਮਦਦ ਨਾਲ ਇੱਕ ਫ਼ੌਜੀ ਜਹਾਜ਼ ਤੱਕ ਪਹੁੰਚਾਇਆ ਗਿਆ ਸੀ।
ਆਖ਼ਰੀ ਵੇਲੇ ਜਹਾਜ਼ ਬਦਲਣ ਦੇ ਇਸ ਫ਼ੈਸਲੇ ਨੇ ਸਵਾਲ ਖੜ੍ਹੇ ਕੀਤੇ ਹਨ ਕਿ ਕੀ ਜਿਸ ਜਹਾਜ਼ ਨੂੰ ਦਿਖਾਵੇ ਲਈ ਵਰਤਿਆ ਗਿਆ ਸੀ, ਉਸ ਵਿੱਚ ਮੌਜੂਦ ਲੋਕਾਂ ਨੂੰ ਖ਼ਤਰੇ ਵਿੱਚ ਛੱਡ ਦਿੱਤਾ ਗਿਆ ਸੀ।
ਹਾਲਾਂਕਿ, ਮੰਗਲਵਾਰ ਨੂੰ ਟਰੰਪ ਨੇ ਕਿਹਾ ਕਿ ਜਿਸ ਫ਼ੌਜੀ ਜਹਾਜ਼ ਵਿੱਚ ਉਹ ਬਾਅਦ ਵਿੱਚ ਸਵਾਰ ਹੋਏ ਸਨ, ਉਹ "ਵੱਧ ਖ਼ਤਰੇ" ਵਿੱਚ ਸੀ।
ਅਧਿਕਾਰੀਆਂ ਨੇ ਬੀਬੀਸੀ ਦੇ ਅਮਰੀਕੀ ਭਾਗੀਦਾਰ ਸੀਬੀਐਸ ਨਿਊਜ਼ ਨੂੰ ਦੱਸਿਆ ਕਿ ਇਹ ਖ਼ਦਸ਼ਾ ਸੀ ਕਿ ਈਰਾਨ ਜਹਾਜ਼ 'ਤੇ ਮਿਸਾਈਲ ਹਮਲਾ ਕਰ ਸਕਦਾ ਹੈ।
ਜਹਾਜ਼ ਵਿੱਚ ਸਵਾਰ ਪੱਤਰਕਾਰਾਂ ਅਤੇ ਵ੍ਹਾਈਟ ਹਾਊਸ ਦੇ ਕੁਝ ਕਰਮਚਾਰੀਆਂ ਨੂੰ ਇਹ ਪਤਾ ਨਹੀਂ ਸੀ ਕਿ ਸੰਭਾਵਿਤ ਈਰਾਨੀ ਖ਼ਤਰੇ ਦੇ ਜਵਾਬ ਵਜੋਂ ਇੱਕ ਯੋਜਨਾ ਤਹਿਤ ਅਮਰੀਕੀ ਰਾਸ਼ਟਰਪਤੀ ਨੂੰ ਉੱਥੋਂ ਚੁੱਪਚਾਪ ਕੱਢ ਲਿਆ ਗਿਆ ਸੀ।
ਟਰੰਪ ਪਹਿਲਾਂ ਕਹਿ ਚੁੱਕੇ ਹਨ ਕਿ ਅੰਕਾਰਾ ਵਿੱਚ ਹੋਏ ਸੰਮੇਲਨ ਦੌਰਾਨ ਉਹ ਈਰਾਨ ਦੇ 'ਟਾਰਗੇਟ ਨੰਬਰ ਵਨ' ਸਨ।
ਟਰੰਪ ਨੇ ਮੰਗਲਵਾਰ ਨੂੰ ਕਿਹਾ, "ਮੇਰਾ ਅੰਦਾਜ਼ਾ ਹੈ ਕਿ ਕੋਈ ਖ਼ਤਰਾ ਸੀ। ਮੈਂ ਇਸ ਬਾਰੇ ਵੱਧ ਜਾਣਕਾਰੀ ਨਹੀਂ ਮੰਗੀ। ਮੈਨੂੰ ਬਹੁਤ ਸਾਰੀਆਂ ਧਮਕੀਆਂ ਮਿਲਦੀਆਂ ਹਨ।"
ਉਨ੍ਹਾਂ ਨੇ ਅੱਗੇ ਕਿਹਾ, "ਮੈਨੂੰ ਅਜਿਹੀਆਂ ਬਹੁਤ ਸਾਰੀਆਂ ਧਮਕੀਆਂ ਮਿਲਦੀਆਂ ਹਨ, ਜਿਨ੍ਹਾਂ ਬਾਰੇ ਤੁਹਾਨੂੰ ਪਤਾ ਵੀ ਨਹੀਂ ਹੈ।"
ਬੀਬੀਸੀ ਪੱਤਰਕਾਰ ਜੈਸਿਕਾ ਰੌਨਸਲੇ ਦੀ ਰਿਪੋਰਟ ਮੁਤਾਬਕ, ਡੌਨਲਡ ਟਰੰਪ ਨੇ ਪਿਛਲੇ ਮਹੀਨੇ ਤੁਰਕੀ ਵਿੱਚ ਨਾਟੋ ਸੰਮੇਲਨ ਤੋਂ ਰਵਾਨਾ ਹੁੰਦੇ ਸਮੇਂ ਇੱਕ ਸੰਭਾਵਿਤ ਇਰਾਨੀ ਖ਼ਤਰੇ ਕਰ ਕੇ ਗੁਪਤ ਢੰਗ ਨਾਲ ਜਹਾਜ਼ ਬਦਲ ਲਿਆ ਸੀ।
'ਵਾਸ਼ਿੰਗਟਨ ਪੋਸਟ' ਨੇ ਕਿਹਾ ਕਿ ਅਮਰੀਕੀ ਰਾਸ਼ਟਰਪਤੀ ਟੈਲੀਵਿਜ਼ਨ ਕੈਮਰਿਆਂ ਦੀ ਨਜ਼ਰ ਵਿੱਚ ਏਅਰ ਫੋਰਸ ਵਨ 'ਤੇ ਸਵਾਰ ਹੋਏ, ਇਸ ਤੋਂ ਬਾਅਦ ਇੱਕ ਕੇਟਰਿੰਗ ਵਾਲੇ ਟਰੱਕ ਦੀ ਮਦਦ ਨਾਲ ਉਨ੍ਹਾਂ ਨੂੰ ਇੱਕ ਫੌਜੀ ਜਹਾਜ਼ ਵਿੱਚ ਪਹੁੰਚਾਇਆ ਗਿਆ।
ਜਹਾਜ਼ ਵਿੱਚ ਸਵਾਰ ਪੱਤਰਕਾਰਾਂ ਅਤੇ ਵ੍ਹਾਈਟ ਹਾਊਸ ਦੇ ਕੁਝ ਕਰਮਚਾਰੀਆਂ ਨੂੰ ਇਹ ਨਹੀਂ ਪਤਾ ਸੀ ਕਿ ਉਨ੍ਹਾਂ ਨੂੰ ਗੁਪਤ ਤੌਰ 'ਤੇ ਬਾਹਰ ਕੱਢ ਲਿਆ ਗਿਆ ਸੀ।
ਅਧਿਕਾਰੀਆਂ ਨੇ ਬੀਬੀਸੀ ਦੇ ਅਮਰੀਕੀ ਭਾਈਵਾਲ ਸੀਬੀਐੱਸ ਨਿਊਜ਼ ਨੂੰ ਦੱਸਿਆ ਕਿ ਅਮਰੀਕਾ ਨੇ ਇੱਕ ਭਰੋਸੇਯੋਗ ਇਰਾਨੀ ਖਤਰੇ ਦਾ ਪਤਾ ਲਗਾਇਆ ਸੀ ਕਿ ਜਹਾਜ਼ 'ਤੇ ਮਿਜ਼ਾਈਲ ਦਾਗ਼ੀ ਜਾ ਸਕਦੀ ਹੈ। ਵ੍ਹਾਈਟ ਹਾਊਸ ਨੇ ਗੁਪਤ ਤੌਰ 'ਤੇ ਜਹਾਜ਼ ਬਦਲਣ ਦੀ ਪੁਸ਼ਟੀ ਨਹੀਂ ਕੀਤੀ ਹੈ।
ਟਰੰਪ ਨੇ ਇਸ ਤੋਂ ਪਹਿਲਾਂ ਅੰਕਾਰਾ ਵਿੱਚ ਸੰਮੇਲਨ ਦੌਰਾਨ ਕਿਹਾ ਸੀ ਕਿ ਉਹ ਇਰਾਨ ਦਾ "ਨੰਬਰ ਇੱਕ ਨਿਸ਼ਾਨਾ" ਹਨ।
ਇਹ ਗੁਪਤ ਕਾਰਵਾਈ ਉਸ ਇੱਕ ਦਿਨ ਬਾਅਦ ਕੀਤੀ ਗਈ, ਜਦੋਂ ਜੰਗ ਖ਼ਤਮ ਕਰਨ ਲਈ ਵਾਸ਼ਿੰਗਟਨ ਅਤੇ ਤੇਹਰਾਨ ਵਿਚਾਲੇ ਗੱਲਬਾਤ ਟੁੱਟਣ ਤੋਂ ਬਾਅਦ ਅਮਰੀਕਾ ਨੇ ਇਰਾਨ 'ਤੇ ਮੁੜ ਫੌਜੀ ਹਮਲੇ ਸ਼ੁਰੂ ਕਰ ਦਿੱਤੇ ਸਨ।
ਟਰੰਪ ਤੁਰਕੀ ਵਿੱਚ ਕਤਰ ਵੱਲੋਂ ਤੋਹਫ਼ੇ ਵਜੋਂ ਦਿੱਤੇ ਗਏ ਇੱਕ ਨਵੇਂ ਬੋਇੰਗ 747-8 ਰਾਹੀਂ ਪਹੁੰਚੇ ਸਨ, ਪਰ ਉਨ੍ਹਾਂ ਨੇ ਐਲਾਨ ਕੀਤਾ ਸੀ ਕਿ ਉਹ "ਪੁਰਾਣੇ ਸਮੇਂ ਦੀ ਖ਼ਾਤਰ" ਪੁਰਾਣੇ ਏਅਰ ਫੋਰਸ ਵਨ ਰਾਹੀਂ ਵਾਪਸ ਜਾਣਗੇ।
8 ਜੁਲਾਈ ਨੂੰ ਸਾਹਮਣੇ ਆਈਆਂ ਵੀਡੀਓਜ਼ ਵਿੱਚ ਉਨ੍ਹਾਂ ਨੂੰ ਅੰਕਾਰਾ ਹਵਾਈ ਅੱਡੇ 'ਤੇ ਰਾਸ਼ਟਰਪਤੀ ਜਹਾਜ਼ ਵਿੱਚ ਸਵਾਰ ਹੁੰਦੇ ਦਿਖਾਇਆ ਗਿਆ। ਪਰ 'ਵਾਸ਼ਿੰਗਟਨ ਪੋਸਟ' ਮੁਤਾਬਕ, ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਗੁਪਤ ਢੰਗ ਨਾਲ ਇੱਕ ਛੋਟੇ ਸੀ-32A ਫੌਜੀ ਜਹਾਜ਼ ਵਿੱਚ ਭੇਜ ਦਿੱਤਾ ਗਿਆ।
ਇੱਕ ਸੋਧਿਆ ਹੋਇਆ ਬੋਇੰਗ 757 ਹੈ, ਜਿਸ ਦੀ ਵਰਤੋਂ ਅਕਸਰ ਉਪ ਰਾਸ਼ਟਰਪਤੀ ਕਰਦੇ ਹਨ।
ਉਨ੍ਹਾਂ ਨੂੰ ਇੱਕ ਕੇਟਰਿੰਗ ਟਰੱਕ ਰਾਹੀਂ ਉੱਥੇ ਪਹੁੰਚਾਇਆ ਗਿਆ ਸੀ, ਜਿਸ ਨੂੰ ਦੂਜੇ ਪਾਸੇ ਜਹਾਜ਼ ਦੇ ਪੱਧਰ ਤੱਕ ਉੱਪਰ ਚੁੱਕਿਆ ਗਿਆ ਸੀ, ਜੋ ਉਸ ਪਾਸੇ ਦੇ ਬਿਲਕੁਲ ਉਲਟ ਸੀ ਜਿੱਥੋਂ ਉਹ ਸਵਾਰ ਹੋਏ ਸਨ।
ਅਖ਼ਬਾਰ ਮੁਤਾਬਕ, ਰੱਖਿਆ ਮੰਤਰੀ ਪੀਟ ਹੇਗਸੇਥ ਵੱਖਰੇ ਤੌਰ 'ਤੇ ਬਾਹਰੀ ਪੌੜੀਆਂ ਦੀ ਵਰਤੋਂ ਕਰਕੇ ਸੀ-32A ਵਿੱਚ ਸਵਾਰ ਹੋਏ, ਤਾਂ ਜੋ ਉਡਾਣ ਨੂੰ ਆਮ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਸਕੇ।
ਪੱਤਰਕਾਰ ਅਤੇ ਵ੍ਹਾਈਟ ਹਾਊਸ ਦੇ ਕੁਝ ਕਰਮਚਾਰੀ ਏਅਰ ਫੋਰਸ ਵਨ ਵਿੱਚ ਸਵਾਰ ਸਨ ਅਤੇ ਕਥਿਤ ਤੌਰ 'ਤੇ ਉਨ੍ਹਾਂ ਨੂੰ ਆਪਣੀਆਂ ਖਿੜਕੀਆਂ ਦੇ ਪਰਦੇ ਬੰਦ ਕਰਨ ਲਈ ਕਿਹਾ ਗਿਆ। ਉਨ੍ਹਾਂ ਨੂੰ ਇਹ ਪਤਾ ਨਹੀਂ ਸੀ ਕਿ ਰਾਸ਼ਟਰਪਤੀ ਹੁਣ ਜਹਾਜ਼ ਵਿੱਚ ਮੌਜੂਦ ਨਹੀਂ ਸਨ।
ਟਰੰਪ ਇਸ ਤੋਂ ਬਾਅਦ ਅਮਰੀਕਾ ਵੱਲ ਜਾਂਦੇ ਹੋਏ ਯੂਕੇ ਗਏ, ਜਿੱਥੇ ਉਨ੍ਹਾਂ ਨੇ ਮੁੜ ਪੁਰਾਣੇ ਏਅਰ ਫੋਰਸ ਵਨ ਵਿੱਚ ਸਵਾਰ ਹੋਏ ਅਤੇ ਆਰਏਐੱਫ ਮਿਲਡਨਹਾਲ 'ਤੇ ਜਹਾਜ਼ ਦੇ ਉਤਰਣ ਤੋਂ ਬਾਅਦ ਉਨ੍ਹਾਂ ਨੂੰ ਇਸ ਤੋਂ ਹੇਠਾਂ ਉਤਰਦੇ ਦੇਖਿਆ ਗਿਆ। ਇਹ ਸਪੱਸ਼ਟ ਨਹੀਂ ਹੈ ਕਿ ਉਹ ਸੀ-32A ਤੋਂ ਮੁੜ ਪੁਰਾਣੇ ਜਹਾਜ਼ ਵਿੱਚ ਕਿਵੇਂ ਪਹੁੰਚੇ।
ਇਸ ਤੋਂ ਬਾਅਦ ਰਾਸ਼ਟਰਪਤੀ ਵਾਸ਼ਿੰਗਟਨ ਵਾਪਸ ਜਾਣ ਲਈ ਕਤਰ ਵੱਲੋਂ ਤੋਹਫ਼ੇ ਵਜੋਂ ਦਿੱਤੇ ਗਏ ਨਵੇਂ ਏਅਰ ਫੋਰਸ ਵਨ ਵਿੱਚ ਸਵਾਰ ਹੋ ਗਏ।
ਉਸ ਉਡਾਣ ਦੌਰਾਨ ਟਰੰਪ ਨੇ ਜਹਾਜ਼ ਵਿੱਚ ਮੌਜੂਦ ਪੱਤਰਕਾਰਾਂ ਨਾਲ ਗੱਲ ਕੀਤੀ, ਜਿਸ ਵਿੱਚ ਉਨ੍ਹਾਂ ਨੇ ਇਰਾਨ ਵੱਲੋਂ ਪੈਦਾ ਕੀਤੇ ਖ਼ਤਰਿਆਂ ਦਾ ਜ਼ਿਕਰ ਕੀਤਾ, ਪਰ ਜਹਾਜ਼ ਬਦਲਣ ਬਾਰੇ ਕੁਝ ਨਹੀਂ ਕਿਹਾ।
ਜਦੋਂ ਪੁੱਛਿਆ ਗਿਆ ਕਿ ਤੁਰਕੀ ਤੋਂ ਆਉਣ ਵਾਲੇ ਜਹਾਜ਼ ਵਿੱਚ ਪੱਤਰਕਾਰਾਂ ਨੂੰ ਖਿੜਕੀਆਂ ਦੇ ਪਰਦੇ ਹੇਠਾਂ ਕਰਨ ਲਈ ਕਿਉਂ ਕਿਹਾ ਗਿਆ ਸੀ, ਤਾਂ ਟਰੰਪ ਨੇ ਕਿਹਾ, "ਕਿਉਂਕਿ ਸ਼ਾਇਦ ਤੁਸੀਂ ਇੱਕ ਖ਼ਤਰਨਾਕ ਉਡਾਣ 'ਤੇ ਹੋ, ਉਨ੍ਹਾਂ ਘਟੀਆ ਲੋਕਾਂ ਕਾਰਨ ਜਿਨ੍ਹਾਂ ਨਾਲ ਸਾਨੂੰ ਨਜਿੱਠਣਾ ਪੈਂਦਾ ਹੈ।"
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਜ਼ਿੰਦਗੀ 'ਤੇ "ਹਰ ਸਮੇਂ ਖ਼ਤਰਾ" ਰਹਿੰਦਾ ਹੈ ਅਤੇ ਉਹ ਇਰਾਨ ਦੀ "ਸੂਚੀ" ਵਿੱਚ "ਨੰਬਰ ਇੱਕ" 'ਤੇ ਹਨ।
ਉਨ੍ਹਾਂ ਕਿਹਾ, "ਪਰ ਜੇ ਮੈਂ ਜਾਂਦਾ ਹਾਂ, ਤਾਂ ਤੁਸੀਂ ਵੀ ਜਾਓਗੇ ਹੋ, ਠੀਕ ਹੈ? ਸ਼ਾਇਦ ਕਿਸੇ ਦਿਨ ਤੁਸੀਂ ਆਪਣਾ ਪੇਸ਼ਾ ਬਦਲਣਾ ਚਾਹੋ।"
ਵ੍ਹਾਈਟ ਹਾਊਸ ਦੇ ਸੰਚਾਰ ਨਿਰਦੇਸ਼ਕ ਸਟੀਵਨ ਚਿਊਂਗ ਨੇ ਇਨ੍ਹਾਂ ਰਿਪੋਰਟਾਂ ਦੀ ਸਿੱਧੇ ਤੌਰ 'ਤੇ ਨਾ ਤਾਂ ਪੁਸ਼ਟੀ ਕੀਤੀ ਅਤੇ ਨਾ ਹੀ ਇਨਕਾਰ ਕੀਤਾ ਪਰ ਕਿਹਾ ਕਿ ਨਵਾਂ ਏਅਰ ਫੋਰਸ ਵਨ ਇੱਕ "ਅਤਿ-ਆਧੁਨਿਕ ਜਹਾਜ਼" ਹੈ, ਜਿਸ ਵਿੱਚ ਰਾਸ਼ਟਰਪਤੀ ਅਤੇ ਉਨ੍ਹਾਂ ਦੇ ਸਟਾਫ਼ ਦੀ ਸੁਰੱਖਿਆ ਲਈ ਸੁਰੱਖਿਆ ਉਪਾਅ ਕੀਤੇ ਗਏ ਹਨ।
ਸੀਬੀਐੱਸ ਨਿਊਜ਼ ਦੀ ਪਹਿਲਾਂ ਦੀ ਰਿਪੋਰਟਿੰਗ ਮੁਤਾਬਕ, ਅਮਰੀਕੀ ਖ਼ੁਫ਼ੀਆ ਏਜੰਸੀਆਂ ਨੇ ਪਹਿਲਾਂ ਹੀ ਟਰੰਪ ਜਾਂ ਉਨ੍ਹਾਂ ਦੇ ਜਹਾਜ਼ 'ਤੇ ਹਮਲੇ ਦੇ ਇੱਕ ਖ਼ਾਸ ਖ਼ਤਰੇ ਬਾਰੇ ਚੇਤਾਵਨੀ ਦਿੱਤੀ ਸੀ।
'ਦਿ ਨਿਊਯਾਰਕ ਟਾਈਮਜ਼' ਨੇ ਇਸ ਤੋਂ ਪਹਿਲਾਂ ਕਤਰ ਵੱਲੋਂ ਤੋਹਫ਼ੇ ਵਜੋਂ ਦਿੱਤੇ ਗਏ ਜਹਾਜ਼ ਨਾਲ ਜੁੜੀਆਂ ਸੁਰੱਖਿਆ ਚਿੰਤਾਵਾਂ ਬਾਰੇ ਰਿਪੋਰਟ ਕੀਤੀ ਸੀ, ਜਿਸ ਵਿੱਚ ਇਹ ਵੀ ਸ਼ਾਮਲ ਸੀ ਕਿ ਸੀਕ੍ਰੇਟ ਸਰਵਿਸ ਨੇ ਟਰੰਪ ਨੂੰ ਨਾਟੋ ਸੰਮੇਲਨ ਤੋਂ ਵਾਪਸੀ ਦੌਰਾਨ ਜਹਾਜ਼ ਬਦਲਣ ਦੀ ਸਲਾਹ ਦਿੱਤੀ ਸੀ।
ਇਸ ਦੇ ਜਵਾਬ ਵਿੱਚ ਪ੍ਰਕਾਸ਼ਨ ਦੇ ਕਈ ਪੱਤਰਕਾਰਾਂ ਨੂੰ ਹਲਫ਼ 'ਤੇ ਗਵਾਹੀ ਦੇਣ ਲਈ ਬੁਲਾਇਆ ਗਿਆ। ਇਸ ਤੋਂ ਬਾਅਦ ਨਿਆਂ ਵਿਭਾਗ ਨੇ ਬੀਬੀਸੀ ਨੂੰ ਦੱਸਿਆ ਕਿ ਉਹ ਗ਼ੈਰ-ਕਾਨੂੰਨੀ ਤਰੀਕੇ ਨਾਲ ਜਾਣਕਾਰੀ ਲੀਕ ਕੀਤੇ ਜਾਣ ਦੀ ਜਾਂਚ ਕਰ ਰਿਹਾ ਹੈ।
ਅਮਰੀਕਾ ਨੇ 40 ਕਰੋੜ ਡਾਲਰ ਦੇ ਬੋਇੰਗ 747-8 ਵਿੱਚ ਰਾਸ਼ਟਰਪਤੀ ਲਈ ਬਦਲਾਅ ਕਰਨ 'ਤੇ ਕਈ ਮਹੀਨੇ ਲਗਾਏ ਹਨ। ਸੂਤਰਾਂ ਨੇ ਸੀਬੀਐੱਸ ਨਿਊਜ਼ ਨੂੰ ਦੱਸਿਆ ਹੈ ਕਿ ਪੁਰਾਣੇ ਏਅਰ ਫੋਰਸ ਵਨ ਜਹਾਜ਼ਾਂ ਵਿੱਚ ਆਉਣ ਵਾਲੀਆਂ ਮਿਜ਼ਾਈਲਾਂ ਨੂੰ ਅੰਨ੍ਹਾ (ਬੇਅਸਰ) ਕਰਨ ਲਈ ਲੇਜ਼ਰ ਤਕਨਾਲੋਜੀ ਮੌਜੂਦ ਹੈ। ਇਹ ਸਪੱਸ਼ਟ ਨਹੀਂ ਹੈ ਕਿ ਕਤਰ ਦੇ ਜਹਾਜ਼ ਵਿੱਚ ਕਿਹੜੇ ਸਿਸਟਮ ਮੌਜੂਦ ਹਨ।
ਵ੍ਹਾਈਟ ਹਾਊਸ ਦੀ ਪ੍ਰੈੱਸ ਸਕੱਤਰ ਕੈਰੋਲਾਈਨ ਲੀਵਿਟ ਨੇ ਸੀਬੀਐੱਸ ਨਿਊਜ਼ ਨੂੰ ਦਿੱਤੇ ਇੱਕ ਬਿਆਨ ਵਿੱਚ ਕਿਹਾ, "ਨਵਾਂ ਏਅਰ ਫੋਰਸ ਵਨ ਰਾਸ਼ਟਰਪਤੀ ਦੀ ਯਾਤਰਾ ਲਈ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ, ਪਰ ਪਤਝੜ ਵਿੱਚ ਇਸ ਵਿੱਚ ਵਾਧੂ ਅਪਗ੍ਰੇਡ ਅਤੇ ਸੁਧਾਰ ਕੀਤੇ ਜਾਣਗੇ, ਜਿਨ੍ਹਾਂ ਨੂੰ ਪੂਰਾ ਕਰਨ ਵਿੱਚ ਲਗਭਗ ਇੱਕ ਮਹੀਨਾ ਲੱਗੇਗਾ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
