தவெக அரசின் முதல் வேளாண் பட்ஜெட்: வெற்றி வான்மகள் திட்டம் அறிவிப்பு

முதலமைச்சர் விஜய் தலைமையிலான தவெக அரசின் முதல் நிதிநிலை அறிக்கை புதன்கிழமை சட்டப்பேரவையில் தாக்கல் செய்யப்பட்டது. இதைத் தொடர்ந்து, தவெக அரசின் முதலாவது வேளாண் பட்ஜெட்டை தமிழக வேளாண்துறை அமைச்சர் வினோத் இன்று தாக்கல் செய்தார்.

வேளாண் பட்ஜெட்டின் முக்கிய அம்சங்கள்

அமைச்சர் வினோத் வேளாண் பட்ஜெட் தாக்கல் செய்து பேசியதன் விவரம்:

தலைவர்கள் கருத்து

உதயநிதி ஸ்டாலின், எதிர்க்கட்சி தலைவர்

"முதல்வருக்கு தைரியம் இருந்தால் அவையில் பதில் சொல்லட்டும்" என்று வேளாண் பட்ஜெட் குறித்து தனது கருத்துகளை தெரிவித்த எதிர்க்கட்சித் தலைவர் உதயநிதி ஸ்டாலின் கூறியுள்ளார். காவிரி விவகாரம் குறித்து அவையில் பேச சபாநாயகரிடம் அனுமதி கேட்டிருப்பதாகவும், தைரியம் இருந்தால் முதல்வர் அவையில் தங்களுக்கு பதில் சொல்லட்டும் என்று உதயநிதி ஸ்டாலின் கூறியுள்ளார்.

சட்டப்பேரவை வளாகத்தில் செய்தியாளர்களை சந்தித்த அவர், " திமுக அரசின் திட்டங்களை பெயர் மாற்றி தற்போது தவெக அரசு அறிவித்திருக்கிறது. முதல்வருக்கு புகழ் பாடும் விதமாக, மரபை மீறி அமைச்சர் முதல்வரை புகழ்ந்து பேசியுள்ளார்.

"5 ஏக்கர் வரை நிலம் வைத்திருக்கும் விவசாயிகளுக்கு பயிர் கடன் முழுமையாக தள்ளுபடி என்று முதல்வர் சென்று பேசிய கூட்டங்களில் எல்லாம் வாக்குறுதி அளித்தார். ஆனால் ஆட்சிக்கு வந்த பிறகு ரூ.75 ஆயிரம் மட்டுமே தள்ளுபடி என அறிவித்துள்ளார்.

காவிரி விவகாரத்தில் அனைத்துக் கட்சிக் கூட்டத்தை கூட்ட வேண்டும் என்று தொடர்ந்து கோரிக்கை வைத்து வருகிறோம். காவிரி விவகாரம் குறித்து அவையில் பேச சபாநாயகரிடம் அனுமதி கேட்டுள்ளோம். முதல்வர் வாய் திறந்து பேசுவார் என்று விவசாய மக்களை போல நாங்கள் காத்திருக்கிறோம். தைரியம் இருந்தால் முதல்வர் பதில் சொல்லட்டும்" என்று உதயநிதி தெரிவித்தார்.

எடப்பாடி பழனிசாமி, அதிமுக பொதுச் செயலாளர்

தவெக அரசின் வேளாண் பட்ஜெட் விவசாயிகளுக்கு ஏமாற்றம் அளிப்பதாக அதிமுக பொதுச் செயலாளர் எடப்பாடி பழனிசாமி தெரிவித்துள்ளார்.

சட்டப்பேரவை வளாகத்தில் இது குறித்து செய்தியாளர்களிடம் பேசிய அவர், " வேளாண் பட்ஜெட்டை அமைச்சர் இரண்டரை மணி நேரம் வாசித்தார். ஆனால் முக்கிய திட்டம் எதுவும் அறிவிக்கப்படவில்லை.

விவசாயிகளுக்கு ஒரு குவின்டால் நெல்லுக்கு ரூ.3500, கரும்புக்கு ஒரு மெட்ரிக் டன்னுக்கு ஆதார விலை ரூ.4500 வழங்கப்படும் என்று தவெக தேர்தல் வாக்குறுதி அளித்தது. ஆனால் இவை எதுவும் இந்த பட்ஜெட்டில் இடம் பெறவில்லை.

இனிக்க இனிக்க விவசாயிகளிடம் பேசி, தற்போது அவர்களை ஏமாற்றுகின்றனர்.

கடந்த ஆட்சியைப் போலவே இந்த அரசும் வேளாண் பட்ஜெட் என்ற நாடகத்தை அரங்கேற்றியுள்ளது." என தெரிவித்தார்.

அதிமுக ஆட்சியில் குடிமராமத்து பணிகள் உட்பட பல திட்டங்கள் விவசாயிகளுக்கு செயல்படுத்தப்பட்டன, ஆனால் தற்போது விவசாய மக்களுக்கு நன்மை பயக்கும் விதத்தில் எந்த அறிவிப்பும் இல்லை என குறிப்பிட்ட அவர், கடந்த ஆட்சியை போலவே, தவெக அரசும் மக்களை ஏமாற்றுகிறது என்றும் இந்த பட்ஜெட்டுக்கு மைனஸ் பூஜ்ஜியம் மதிப்பெண் தான் கொடுக்க முடியும் என்றும் தெரிவித்தார்.

"காவிரி விவகாரம் குறித்து முதல்வர் வாய் திறந்து பேசுவதில்லை. ஜூன், ஜூலை மாதத்தில் கிடைக்க வேண்டிய நீர் வரவில்லை. இப்போது உபரி நீரை தான் தருகின்றனர். அது தவிர ஒட்டுமொத்த தமிழக மக்களுக்கும் தலைகுனிவை ஏற்படுத்தும் விதத்தில், முதல்வர் கர்நாடகாவுக்கு செல்வேன் என்கிறார், ஆனால் கர்நாடக முதல்வர் வேண்டாம் என்று கூறுகிறார். எந்த அளவுக்கு இது தமிழ்நாட்டுக்கு தலைகுனிவை ஏற்படுத்தியுள்ளது என்று முதல்வர் எண்ணிப் பார்க்க வேண்டும்." என்று தெரிவித்தார்.

பிரேமலதா விஜயகாந்த், தேமுதிக பொதுச் செயலாளர்

வேளாண் பட்ஜெட் குறித்து தனது கருத்தை தெரிவித்த தேமுதிக பொதுச் செயலாளர் பிரேமலதா, "முதல்வர் அடுத்த ஜென்மத்தில் விவசாய குடும்பத்தில் பிறக்க வேண்டும் என்று கூறியுள்ளார். நாங்கள் விவசாய குடும்பத்தில் பிறந்து, விவசாயிகளாக இருந்து தான் இன்று தேமுதிக பொதுச் செயலாளராக உள்ளேன். முதல்வர் நினைத்தால் இந்த ஜென்மத்திலேயே விவசாயிகளுக்கு நல்லது செய்ய முடியுமே.

பட்ஜெட்டில் வாசிக்கப்பட்ட அனைத்தும் செயல் வடிவம் பெற வேண்டும். 100 நாள் வேலை வாய்ப்புத் திட்டம் குறித்து அறிவிப்பு இல்லை. நெல் கதிர்கள் கிடங்குகள் இல்லாமல் திறந்தவெளியில் உள்ளன. இது குறித்த அறிவிப்பு இல்லாததை தேமுதிக கடுமையாக கண்டிக்கிறது. மேலும் உப்பளங்கள் குறித்தும் அவர்களின் பாதிப்பு குறித்தும் பேசவே இல்லை" என்றார்.

- இது பிபிசிக்காக கலெக்டிவ் நியூஸ்ரூம் வெளியீடு