महाराष्ट्रात पावसाची स्थिती कशी? कुठे कोणता अलर्ट, जाणून घ्या हवामानाचा अंदाज

महाराष्ट्रात मान्सून पुन्हा एकदा सक्रिय झाला आहे. भारतीय हवामान विभागाने आज (27 जुलै) राज्यात कुठे कोणता अलर्ट आहे हे जारी केलं आहे.

यानुसार, काही ठिकाणी मध्यम स्वरुपाचा तर काही ठिकाणी मुसळधार ते अतिमुसळधार पावसाचा इशारा देण्यात आला आहे.

मुंबई, ठाणे, नाशिक, नागपूरसह राज्यातील इतर भागात हवामानाची काय स्थिती आहे? कोकण, मराठवाडा, विदर्भात कुठे पावसासाठी काय इशारे दिले आहेत आणि मागील 24 तासात राज्यात कुठे किती पाऊस झाला? जाणून घेऊयात.

ऑरेंज अलर्ट कुठे?

रायगड, रत्नागिरी, पुणे घाट परिसर, सातारा घाट परिसर या भागात ऑरेंज अलर्ट आहे.

या भागात काही ठिकाणी मुसळधार ते अतिमुसळधार पावसाची शक्यता वर्तवण्यात आली आहे.

यलो अलर्ट कुठे?

ठाणे, मुंबई, सिंधुदुर्ग, जळगाव, कोल्हापूर घाट परिसर, छत्रपती संभाजीनगर, जालना, हिंगोली, नांदेड, लातूर, भंडारा, बुलढाणा, गडचिरोली, गोंदिया, नागपूर या ठिकाणी यलो अलर्ट देण्यात आला आहे.

या भागात काही ठिकाणी तुरळक ठिकाणी विजांच्या कडकडाटासह वादळे, हलका ते मध्यम पाऊस आणि सोसाट्याचा वारा (30-50 किमी प्रतितास) येण्याची शक्यता आहे.

आतापर्यंत कुठे किती पाऊस?

हवामान विभागानुसार, 27 जुलैला सकाळी 8.30 वाजेपर्यंतच्या कोकण-गोवा, मध्य महाराष्ट्र, मराठवाडा आणि विदर्भातील बहुतांश ठिकाणी मध्यम ते जोरदार पावसाची नोंद झाली आहे.

कोकण-गोवा विभागात 24 तासांमध्ये सर्वाधिक पाऊस रत्नागिरी येथे पडला. तेथे 65.5 मिमी इतक्या पावसाची नोंद झाली. हर्णई येथे 42.2 मिमी, मुंबई (सांताक्रूझ) येथे 12 मिमी आणि मुंबई (कुलाबा) येथे 9.6 मिमी पावसाची नोंद झाली. या विभागात सकाळी सापेक्ष आर्द्रता 85 ते 98 टक्क्यांच्या दरम्यान होती.

मध्य महाराष्ट्रात 24 तासात महाबळेश्वर येथे 62 मिमी पावसाची नोंद झाली. नाशिक येथे 47.4 मिमी, जळगाव येथे 20 मिमी, कोल्हापूर येथे 7.8 मिमी, सातारा येथे 6.4 मिमी आणि पुणे 2.5 मिमी पाऊस झाला. या विभागात महाबळेश्वर येथे किमान तापमान 18.2 अंश सेल्सिअस इतके नोंदवले गेले.

मराठवाड्यात पावसाचा जोर तुलनेने कमी राहिला. नांदेड येथे 21.2 मिमी, परभणी येथे 12.6 मिमी, नागपूर (मराठवाडा विभागातील केंद्र) येथे 8.3 मिमी आणि धाराशिव येथे 1 मिमी पावसाची नोंद झाली.

विदर्भात बहुतांश ठिकाणी पावसाची नोंद अत्यल्प किंवा शून्य होती. अकोला येथे 1 मिमी पाऊस झाला, तर अमरावती, ब्रह्मपुरी, चंद्रपूर, नागपूर, वर्धा आणि यवतमाळ येथे पावसाची नोंद झाली नाही.

तापमानाचा विचार करता, विदर्भातील चंद्रपूर येथे कमाल तापमान 34.2 अंश सेल्सिअस इतके सर्वाधिक नोंदले गेले. त्याखालोखाल यवतमाळ येथे 32.2, अमरावती येथे 32.4 आणि अकोला येथे 32.5 अंश सेल्सिअस तापमानाची नोंद झाली.

हंगामातील (1 जूनपासून) पावसाच्या आकडेवारीनुसार मुंबई (सांताक्रूझ) येथे 1895.9 मिमी पाऊस झाला आहे. त्यानंतर हर्णई येथे 1613.7 मिमी, मुंबई (कुलाबा) 1600 मिमी आणि डहाणू येथे 1543.3 मिमी पावसाची नोंद झाली आहे.

(बीबीसीसाठी कलेक्टिव्ह न्यूजरूमचे प्रकाशन)