How Super Falcons and Black Queens fit qualify for 2027 Women's World Cup afta disappointing Wafcon exit

Afta di Super Falcons of Nigeria don comot di 2026 Wafcon, di focus now shift to how dem fit make am to di 2027 World Cup.

Cameroon sama Nigeria 1-0 for di quarterfinal wit ogbonge performance from dia keeper Michaely Bihina wey make nine saves to keep clean sheet.

Di 20-year-old also win player of di match award for di game, as di Super Falcons fail to reach di semifinal.

Dat failure also mean say di Falcons no fit get automatic qualification for di 2027 Women's World Cup wey go happun for Brazil from 24 June to 25 July 2027.

Falcons attacker Uchenna Kanu tok say "we just dey disappointed about di result, many tins no happun in our favour especially di officiating. I dey proud of di girls, we bin fight till di last minute."

She tok say "we gatz regroup and prepare for di qualification playoffs, we ask say make Nigerians support us make we try to qualify for di World Cup."

Coach Justin Madugu afta di game don tok say im "take full responsibility" for di exit.

"We apologise for how di game go, I dey take responsibility for wetin happun. Di girls create many chances today but dem no dey clinical today."

"I dey understand di pain everibody dey go thru as a kontri, but we still get second chance to qualify, we go try our best to reach di World Cup and hope we no go disappoint una like how di men do," di coach tok afta di game.

Di 10-time Wafcon champions no fit defend dia title, wey dem also no qualify for di World Cup to try and improve for dia 2023 knockout shootout defeat to England.

But all hope no lost yet.

Wit dia semifinal qualification for di Wafcon, Cameroon, Algeria, Morocco and Malawi don secure World Cup qualification.

But no be only di Super Falcons disappoint for di Wafcon, di Black Queens of Ghana also no show for dis competition.

Ghana suffer shock defeat to debutants Malawi

Di Black Queens of Ghana also bin comot di competition afta debutants Malawi sama dem 2-1.

Malawi player Rose Kadzere take advantage of poor defending by di Black Queens to score di winning goal for di 79th minute.

Di Black Queens struggle to create chances afta dem score di early goal wey dem miss two oda ogbonge chances for di first half.

Temwa Chawinga wey be player of di match bin score wey she provide di assist for di winning goal to dump Ghana out of di Wafcon.

By dat win, Malawi also qualify for di Women's World Cup for di first time.

Malawi also bin defeat di Super Falcons 3-2 for dia group stage for di Wafcon; sabi pipo say di Southern African kontri bin surprise everibodi wit dia performance.

Ghana finish di previous Wafcon wit bronze medal afta dia shootout win ova South Africa, but dem fail to reach di semifinals for dis edition.

Dia coach Kim Lars Björkegren tok say di elimination for dis stage be di "most painful feeling for im 20-year coaching career."

"I bin dey feel for dis team, I really want help Ghana to dia first World Cup in 20 years, but we no perform well enough."

Dis be how Falcons and Black Queens fit qualify

For di qualification format for di tournament, di four losing quarterfinalists go play for one African playoff.

Di two winners for those playoff games go now qualify for di Fifa Women's World Cup intercontinental playoffs to stand a chance to qualify.

Di Super Falcons go first jam wit South Africa for di African playoffs for 13 August for di Moulay Rachid stadium for Casablanc.

Afta dem win, dem now go join di oda winner from di oda playoff between Ghana and Ivory Coast, to enta di Intercontinental playoffs.

According to Fifa, two kontris each from Africa, Concacaf and South America togeda wit one rep each from Oceania and Europe go jam for di intercontinental playoffs.

Di tournament go happun for two phases – di first phase go happun for November and December 2026 wey di final phase dey set for February 2027.

Teams from di same confederation no go dey di same pathway for di Intercontinental playoffs.

Super Falcons gatz win dia pathway for dis Intercontinental playoff tournament to qualify for di World Cup.

Same tin wit di Ghana Black Queens.

Ghana go jam Ivory Coast for one of di playoff games – if dem manage to win dat game, dem fit keep dia hope alive.

Dat game go happun on 13 August for di Larbi Zaouli stadium for Casablanca.

Di Black Queens go now enta di 10-kontri Fifa Intercontinental playoff tournament and hope say dem win all dia games for dia side of di bracket to book place for Brazil.

For dis stage, room neva dey for error or draw. Ghana gatz win all dia matches for di playoffs to secure dia first World Cup spot in 20 years.

For many pundits, dis route dey complicated but Ghana and Nigeria gatz negotiate am well, if only dem want play for di 32-team Women's World Cup for Brazil.

As to whether dem fit do am or not, na time go tell.

Meanwhile experts say Ghana and Nigeria gatz begin to restructure dia women's football to return to di top.

Both kontris get old players wey don pass dia prime, most of dem flop for dis Wafcon.

For sabi pipo, di time don reach for di two teams to begin to scout for fresh talent wey go boost di teams and bring new energy.

Dem gatz structure di youth teams also, to grow players from di junior ranks to feed di national team.

But dis kind tin go need heavy investment and planning – but dem fit start from somewia.