ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
E-Visa: වත්මන් කැබිනට් මණ්ඩලයට නොතීසි නිකුත් කරන්නැයි අධිකරණය නියෝග කරයි
පසුගිය රජය සමයේ විද්යුත් වීසා නිකුත් කිරීමේ කටයුතු පෞද්ගලික සමාගම් වෙත පැවරීම සඳහා ඇතිකර ගෙන තිබෙන ගිවිසුම්වල නීත්යනුකූලභාවය පිළිබඳව යළි සලකා බැලීමට වත්මන් අමාත්ය මණ්ඩලය තීරණය කර ඇතැයි නීතිපතිවරයා අද (ජූලි 10) ශ්රේෂ්ඨාධිකරණයට දැනුම් දුන්නේ ය.
ඉකුත් රජය සමයේ විද්යුත් වීසා නිකුත් කිරීමේ ක්රියාවලිය පෞද්ගලික සමාගම්වලට පැවරීමට එවක අමාත්ය මණ්ඩලය විසින් ගනු ලැබූ තීරණය අභියෝගයට ලක් කරමින් හිටපු පාර්ලිමේන්තු මන්ත්රීවරුන් වන ජනාධිපති නීතීඥ එම්.ඒ. සුමන්දිරන්, පාඨලී චම්පික රණවක සහ වත්මන් පාර්ලිමේන්තු මන්ත්රී රවුෆ් හකීම් විසින් ගොනු කරන ලද මූලික අයිතිවාසිකම් පෙත්සම් අද (ජූලි 10) කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විවේකා සිරිවර්ධන එය දැනුම් දුන්නා ය.
අගවිනිසුරු ප්රීති පද්මන් සූරසේන, අචල වෙංගප්පුලි හා අර්ජුණ ඔබේසේකර යන විනිසුරුවරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් කැඳවනු ලැබ තිබිණි.
අදාළ පෙත්සම් කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල්වරිය අධිකරණය හමුවේ කරුණු දක්වමින් මෙම විද්යුත් වීසා නිකුත් කිරීමේ ක්රියාවලිය සම්බන්ධයෙන් පෞද්ගලික සමාගම් සමග ඇති කර ගත් ගිවිසුම්වල නීත්යනුකූලභාවය පිළිබඳව පරීක්ෂා කිරීම සඳහා වත්මන් අමාත්ය මණ්ඩලය විසින් අනුකමිටුවක් පත් කරනු ලැබ ඇති බව පැවසුවා ය.
එම කමිටුව අදාළ කරුණු අධ්යයනය කරමින් සිටින බව සඳහන් කළ අතිරේක සොලිසිටර් ජනරාල්වරිය එම කටයුතුවල ප්රගතිය දැනුම් දීම සඳහා දිනයක් ලබා දෙන ලෙස ඉල්ලා සිටියා ය.
එම අවස්ථාවේදී පෙත්සම්කරුවෙකු වූ ජනාධිපති නීතිඥ එම්.ඒ. සුමන්දිරන් අධිකරණය හමුවේ කරුණු දක්වමින් පැවසුවේ, මෙම ගනුදෙනුව අවලංගු කිරීමට වත්මන් රජය තීරණය කර තිබුණ ද මෙම පෙත්සම ඉදිරියට පවත්වාගෙන යාමට අපේක්ෂා කරන බව ය.
වත්මන් කැබිනට් මණ්ඩලයේ සාමාජිකයන් මෙම පෙත්සමේ වගඋත්තරකරුවන් ලෙස නම් කර ඇති බව ද ජනාධිපති නීතිඥවරයා පැවසුවේය.
ඒ අනුව, වත්මන් අමාත්ය මණ්ඩල සාමාජිකයින්ට නොතීසි නිකුත් කිරීමට පියවර ගන්නා ලෙස පෙත්සම්කාර පාර්ශවයට නියම කළ විනිසුරු මඩුල්ල, මෙම පෙත්සම යළි සැප්තැම්බර් මස 29 වන දා කැඳවන ලෙස ද නියෝග කර තිබේ.
