ዋንጫ ዓለም፡ ደገፍቲ ሃገራውያን ጋንታታት ብዛዕባ ባህሊ ኣመሪካ ዘገረሞም ነገራት

ኣዮብ ባግዳድ፡ ንሃገራዊት ጋንታኡ ንምድጋፍ ናብ ኣመሪካ ካብ ዝኣቱ ሓጺር እዋን እኳ እንተ ገበረ፡ ምስ ኩዕሶ እግሪ ብዘይተሓሓዝ ሓደ ነገር ግን ኣዝዩ ተገሪሙ ኣሎ።

እዚ ድማ ኣብታ ሃገር ዘሎ ነገራት ኵሉ ካብ መጠን ንላዕሊ ግዙፍ ምዃኑ እዩ።

"ኵሉ ነገር ዓቢ እዩ፣ ኮካ ኮላ ከይተረፈ ዓቢ እዩ፡" ክብል ባግዳድ ተገሪሙ ይዛረብ። ንሱ፡ ካብ ዓዱ ሞሮኮ ንላዕሊ፡ ኣብ ኣመሪካ ዘለዉ ጐደናታት፡ መካይንን ህንጻታትን ኣዝዮም ገዘፍቲ ኰይኖም ከም ዝረኸቦም ይገልጽ።

ኣብዚ 75 ሚእታዊት ጸወታታት ዋንጫ ዓለም 2026 ኣብ ኣመሪካ፡ እቲ ዝተረፈ ድማ ኣብ መክሲኮን ካናዳን ዝካየደሉ ዘሎ እዋን፡ ሓያሎ ካብ ወጻኢ ሃገራት ዝመጽኡ ደገፍቲ፡ ባህልን ፍሉይ ነገራትን እታ ሃገር ንምርኣይ ብሃንቀውታ ይጽበዩ ኣለዉ። ደገፍቲ ኣብ ማሕበራዊ መራኸቢታት ዝዝርግሑዎም ዘለዉ ቪድዮታት፡ ካብ ምፍታን ዝተፈላለዩ መግብታት ክሳብ ኣብ ዓበይቲ ሱፐርማርኬታትን ቤት መግብታትን ዝቐርብ ዓቐን መግቢ ተገሪሞም ኣለዉ።

ብዛዕባ እቲ ኣብ ኣመሪካ ዘሎ ካብ መጠን ንላዕሊ ዝግዝፉ ነገራት፡ ሓያሎ ደገፍቲ ምስ ቢቢሲ ኣብ ዝገበሩዎ ዕላል ተመሳሳሊ ርእይቶ ሂቦም።

ካብ ስኮትላንድ ዝመጽአ ሻውን ዝተባህለ ቪሎገር፡ ንሓደ መዐደሊ ነዳዲ፡ ቤት መግቢ፡ መዕረፊ ጐደናን ሱፐርማርኬትን ዘጠቓለለ 'ባክ-ኢስ' (Buc-ee's) ዝተባህለ ዓቢ መኻን ድሕሪ ምብጽሑ፡ "ከምዚ ዓይነት ቦታ ኣብ ኣመሪካ ጥራይ እዩ ክህሉ ዝኽእል፣ ኣዝየ ድማ ፈትየዮ፡" ኢሉ።

ገለ ደገፍቲ፡ መግቢ ሓደ ካብቲ ንባህሊ ኣመሪካ ዝድህስስሉ መንገዲ ኰይኑ ረኺቦሞ ኣለዉ።

ካብ ኦክስፎርድ ዓዲ እንግሊዝ ዝመጽአ ኢረ ባሎጉን፡ "ኣብዚ ዘሎ መግቢ ልዕሊ ናይ ዓዲ እንግሊዝ ኣዝዩ ዝበለጸ ኰይኑ ረኺበዮ፡" ይብል። "ፋስት-ፉድ እኳ ከይተረፈ ምኡዝ መቐረት ኣለዎ፣ ርግጽ እዩ ንጥዕና ጽቡቕ ከይከውን ይኽእል እዩ፣ መቐረቱ ግን ጥዑም እዩ፡" ኢሉ።

ንፖርቱጋላውያን ተምሃሮ ዝሓዘ ጕጅለ'ውን ኣብ ጕዕዞኦም ነቲ ኣብ ሃገሮም ዘየሎ 'ፋስት-ፉድ' ይጥዕሙዎ ኣለዉ።

ሎውሬንሶ ሲልቫ ዝተባህለ ኣባል ናይቲ ጕጅለ፡ "እዚ ኣብ ፊልምታትን ተኸታተልቲ መደባትን ክንርእዮ ዝጸናሕና ኰይኑ፡ ኣካል ናይቲ ናብ ኣመሪካ ናይ ምምጻእ ተመኵሮና እዩ፡" ይብል።

ካብ ጋና ዝመጽአ ክርስትያን ቦኣተንግ ድማ ብዓቐን እቲ ዝቕረብ መኣዲ ተገሪሙ፤ "እቲ ዝዓደግናዮ መግቢ ክንውድኦ ኣይከኣልናን፣ ኣብ ዓዲ እንግሊዝ ከምኡ የሎን፡" ይብል።

ብተወሳኺ፡ ኣብ ኣመሪካ ዋጋ ሓደ ኣቕሓ ክጽሓፍ ከሎ እቲ ግብሪ ሽያጭ ዘይምውሳኹ፡ ሓደ ፍሉይ ኣሰራርሓ ኰይኑ ከም ዝረኸቦ ገሊጹ።

ባሎጉን ከም ዝተዓዘቦ፡ ኣመሪካ ዝበዝሕ ክፋል ዋንጫ ዓለም እተአንግድ እኳ እንተዀነት፡ እቲ ምንቅስቓስ ምስቲ ኣብ 2018 ኣብ ሩስያን ኣብ 2022 ኣብ ቐጠርን ዝነበረ ክወዳደር ከሎ ዝዝሓለ እዩ።

እዚ ድማ ኩዕሶ እግሪ ኣብ ኣመሪካ ዝዓበየ ተፈታውነት ዘለዎ ስፖርት ብዘይምዃኑ እዩ።

ጃሰን ባርነስን ሃሪ ቤክሊን ንዝተባህሉ ደገፍቲ ዓዲ እንግሊዝ ግን ጽቡቕ ኣጋጣሚ እዩ ኰይኑሎም። ኣብ ታይምስ ስኩዌር ኒው ዮርክ፡ ደገፍቲ ኩዕሶ-ሰክዔት ንፈለማ እዋን ኣብ 53 ዓመታት ዝተረኸበ ዓወት ኒክስ ክጽንብሉ ጸኒሖሞም። ባርነስ፡ "እዚ ካብ ኵሉ ዝረኣኽዎ ዝዓበየ ጽንብል እዩ፡" ይብል።

ካብ ወጻኢ ሃገራት ናብታ ሃገር ዝኣተዉ ደገፍቲ፡ ጸወታታት ኣብ ዝካየደሉ ከተማታት ጥራይ ኣይተሓጽሩን።

ቶማስ ሶዋረስን ሆሰ ደ ኣራውጆ ቪቶርያን ዝርከቡዎም ፖርቱጋላውያን፡ ባህላዊ መግቢ ኣመሪካ ንምፍታን ናብ ደቡባዊ ክፋል ኣመሪካ፡ ማለት ጆርጅያ፡ ፍሎሪዳን ካሮላይናን ክጕዓዙ እዮም።

ካብ ሞሮኮ ዝመጽአ ኣዮብ ባግዳድ፡ ዋጋታት ኣመሪካ ምስቲ ኣብ ቐጠር ዝነበረ ክወዳደር ከሎ ክቡር እኳ እንተዀነ፡ "ንሓደ ወይ ክልተ ጸወታታት ዝኸውን ባጀት ሒዝካ ምምጻእን እዚ ተመኵሮ እዚ ምውሳድን፡ ንምሉእ ህይወትካ ዝተርፍ ዓቢ ዓወት እዩ፡" ይብል።