Ekiti governorship election results

Voting don end for many polling units across Ekiti State as sorting and counting of ballots don start for di govnorship election wey hold on Saturday, 20 June.

Polls open by 8:30am and e dey expected to close by 2:30pm.

Voting take place across all di 16 local govment areas, 177 wards and 2,445 polling units of di state.

14 candidates dey run for dis off-cycle govnorship race including di incumbent, Biodun Oyebanji, wey dey seek second term in office on di ticket of di All Progressives Congress (APC), as im first-term mandate go end for October.

Di oda contenders na Oluwole Oluyede (PDP), Oluwadare Bejide (ADC), Oyebanji Olajuyin (LP), Blessing Abegunde (NNPP), Samuel Akande (AAC), Ayodeji Ojo (ADP), Opeyemi Felegan (Accord), Joseph Anifowose (APM), Bidemi Awogbemi (APP), Olaniyi Ayodele (PRP), Victor Adetunji (ZLP), Olu Omotosho (AA), and Ayodele Osinkolu (YPP).

Di election go determine who go lead di state for di next four years and shape conversations around governance, development and political direction for one of Nigeria politically engaged states.

Ekiti get 1,059,360 registered voters. However, na only 1,028,929 collect Permanent Voter Cards (PVCs) and dey eligible to participate for di election.

Di election dey expected to serve as litmus test for di Independent National Electoral Commission (INEC) as dem dey prepare for di 2027 general election.

Dis go be di first major election wey go hold since President Bola Tinubu sign di amended Electoral Act 2026 into law for February.