महाराष्ट्रात पुढील दोन दिवस विदर्भात पावसाचा जोर; तीन जिल्ह्यांना यलो अलर्ट

देशाच्या काही भागांमध्ये सध्या कमी दाबाच्या क्षेत्रांची स्थिती सक्रिय आहे. उत्तर प्रदेशच्या आग्नेय दिशेला असलेलं कमी दाबाचं क्षेत्र आता उत्तर प्रदेशच्या ईशान्येकडे सरकलं आहे.

पुढील 24 तासांमध्ये हे कमी दाबाचं क्षेत्र कमकुवत होण्याची शक्यता हवामान विभागाने वर्तवली आहे.

दरम्यान, बंगालच्या उत्तरेकडील खाडीवर चक्राकार वाऱ्यांची स्थिती निर्माण झाली आहे. या चक्राकार वाऱ्यांच्या प्रभावामुळे 29 ऑगस्ट रोजी ओडिशाच्या किनारपट्टीवर नव्या कमी दाबाच्या क्षेत्राची निर्मिती होण्याची शक्यता आहे.

देशात सक्रिय असलेल्या या हवामान प्रणालींचा परिणाम मध्य भारतातील काही भागांवर होण्याची शक्यता आहे.

28 ऑगस्ट ते 3 सप्टेंबर या कालावधीत पश्चिम मध्य प्रदेश, छत्तीसगडच्या बहुतांश भागात आणि विदर्भातील काही जिल्ह्यांमध्ये हलका ते मध्यम स्वरूपाचा पाऊस पडण्याची शक्यता आहे.

महाराष्ट्रात उद्या कुठे पाऊस?

आज, म्हणजेच 28 ऑगस्टला हिंगोली, नांदेड, लातूर आणि धाराशिव या जिल्ह्यांमध्ये पावसाच्या हलक्या सरी बरसण्याची शक्यता वर्तवण्यात आली होती. मात्र, महाराष्ट्रातील इतर भागांसाठी हवामान विभागाने पावसाचा कोणताही अंदाज दिलेला नव्हता.

आता उद्या, म्हणजेच 29 ऑगस्टला महाराष्ट्रातील पावसाची स्थिती पाहिली, तर विदर्भात पावसाचा जोर राहण्याची शक्यता आहे.

नागपूर, भंडारा आणि गोंदिया या तीन जिल्ह्यांना पावसाचा यलो अलर्ट देण्यात आला आहे. या जिल्ह्यांमध्ये हलका ते मध्यम स्वरूपाचा पाऊस पडण्याची शक्यता आहे.

विदर्भातील या जिल्ह्यांव्यतिरिक्त हिंगोली, नांदेड आणि लातूर या जिल्ह्यांमध्ये तुरळक पाऊस पडण्याची शक्यता आहे.

मात्र, उत्तर महाराष्ट्र, मध्य महाराष्ट्र, कोकण आणि मराठवाड्यातील इतर जिल्ह्यांसाठी 29 ऑगस्ट रोजी पावसाचा कोणताही अंदाज देण्यात आलेला नाही. या भागांमध्ये पावसाचा कोणताही अलर्टही देण्यात आलेला नाही.

30 ऑगस्टला विदर्भात तीन जिल्ह्यांना यलो अलर्ट

30 ऑगस्ट, म्हणजेच रविवारीही विदर्भातील काही जिल्ह्यांमध्ये पावसाची शक्यता कायम राहणार आहे.

हवामान विभागाने गोंदिया, भंडारा आणि गडचिरोली या तीन जिल्ह्यांना पावसाचा यलो अलर्ट दिला आहे. त्यामुळे या जिल्ह्यांमध्ये हलका ते मध्यम स्वरूपाचा पाऊस पडण्याची शक्यता आहे.

याशिवाय हिंगोली, नांदेड आणि लातूर या जिल्ह्यांमध्ये पावसाच्या हलक्या सरी बरसण्याची शक्यता आहे.

या जिल्ह्यांना वगळता महाराष्ट्रातील उर्वरित भागांसाठी 30 ऑगस्ट रोजी पावसाचा कोणताही अंदाज हवामान विभागाने दिलेला नाही.

म्हणजेच, पुढील दोन दिवस महाराष्ट्रात पावसाचा मुख्य प्रभाव विदर्भातील काही जिल्ह्यांमध्ये राहण्याची शक्यता आहे. 29 ऑगस्टला नागपूर, भंडारा आणि गोंदिया, तर 30 ऑगस्टला गोंदिया, भंडारा आणि गडचिरोली या जिल्ह्यांमध्ये यलो अलर्ट देण्यात आला आहे.

दरम्यान, 29 ऑगस्ट ते 2 सप्टेंबर या कालावधीत बंगालची खाडी आणि अरबी समुद्रात समुद्र खवळलेला राहण्याची शक्यता आहे.

या काळात समुद्रात ताशी 40 ते 50 किलोमीटर वेगाने वारे वाहण्याची शक्यता आहे. त्यामुळे बंगालच्या खाडी आणि अरबी समुद्रातील मच्छिमारांनी या कालावधीत समुद्रात जाऊ नये, असं आवाहन करण्यात आलं आहे.

महाराष्ट्रासाठी मात्र मच्छिमारांना समुद्रात न जाण्याबाबत हवामान विभागाकडून कोणतंही स्वतंत्र आवाहन करण्यात आलेलं नाही.

एकूणच, महाराष्ट्रात पुढील दोन दिवस पावसाचा प्रभाव प्रामुख्याने विदर्भातील काही जिल्ह्यांमध्ये दिसण्याची शक्यता आहे. 29 ऑगस्टला नागपूर, भंडारा आणि गोंदिया, तर 30 ऑगस्टला गोंदिया, भंडारा आणि गडचिरोली या जिल्ह्यांसाठी यलो अलर्ट देण्यात आला आहे. हिंगोली, नांदेड आणि लातूरमध्ये तुरळक किंवा हलक्या सरींची शक्यता आहे, तर राज्यातील बहुतांश इतर भागांसाठी सध्या पावसाचा अंदाज नाही.

(बीबीसीसाठी कलेक्टिव्ह न्यूजरूमचे प्रकाशन.)